SAMUEL BAA EJÔÉ DAVID 17 - Bible en langue Bulu

¹ Ane Ahitôfél a nga jô Absalom na: Jôkéʼé ma me tobe befam toyini awôm a ébaé! Ma ye kôlô si a tôñe David alu ébiene di.

² Ma ye suane nye yôp éyoñ a teʼeya, a éyoñe mo mé fe me ntoo nteʼan, ma ye futi woñ e vôm a né, a bôte bese ba be nye be né ba ye tup. Njô bôt étam nye ma ye wôé.

³ Nalé ma ye dutu bôte bese be wo; mbulane mvus ya bese ô tii be môt wo jeñ, éyoñe te bôte bese ba ye tabe mvoʼé .

⁴ Ane Absalom a nga yene nkobô te mvaé nalé fe bemvendé bese yʼIsraél.

⁵ Ve Absalom a nga jô na: Tame fe loon Usayi, mone Arkieñ, bia ye fe wôk jam a ye jô.

⁶ Ane Usayi a nga zu be Absalom, a Absalom a nga jô nye na: Avale di nde Ahitôfél a te kobô; ye bia yiane bo aval a te jô, ye momo? Wo fe kobôʼô!

⁷ Usayi a nga yalan Absalom na, éyoñe ji feʼe Ahitôfél a te ve é nji bo mvaé.

⁸ Nde Usayi a nga jô na: Wo yem ésoo a bôte bé! Be ne biwôlô bi bôt, ayok ane zoʼo ya afan ba te wôlé bon . Esoo a ne môta mewosan a a ye lôt alu ézezañe bôt;

⁹ tame yen, éyoñe ji, a solô ébé éziñ nge vôm éziñe mfe. Nge ataté éyoñe ji, ba wôé bôte bʼéziñ, foé ja ye mialan a bôt ba ye jô na: Be dañeya bôt be nga lat a Absalom bita!

¹⁰ Eyoñe te môt a dañ éwôlô, toʼo na a beʼe nleme ngbwegbwem, a ye bili atek; amu Israél ase a yeme na ésoo a ne mben a na ba be biwôlô bi bôt be ne nsamba.

¹¹ Ajô te ma ve feʼe na Israél ase a sulan e vôm ô né, ataté Dañ a kui Birséba, be too abui ane nselek ô né e nsaʼa mañ; éyoñe te womien wo ye ke wosane be.

¹² Bia ye kui be nye avale vôm ése a né a bia ye ku nye yôp avalʼane mfô a ku si. Teke wua a ye liʼi, toʼo nye, toʼo môte wua ya bôte ba be be be né.

¹³ Nge a wondé e tison éziñ, Israél ase a ye kee minkol e tison éte, a dutu je ôtôñ, akekui ba ye bo teke fe koon toʼo ve ôyôm ôkôk.

¹⁴ Eyoñe te Absalom a bôte bese yʼIsraél be nga jô na: E feʼe Usayi, mone Arkieñ, é nʼabeñ a dañe nyô Ahitôfél. Vʼé ne na Nti a nga tyiʼi na a kpwé e mbamba feʼe Ahitôfél, éyoñe te a ye zuu bidim be Absalom.

David a Lôt e Yordan

¹⁵ Ane Usayi a nga jô betuni Sadok a Abiatar na: Ahitôfél a te ve Absalom feʼe nyô a nalé fe e be bemvendé ya Israél; ve ma ma te liti jame di a di.

¹⁶ Eyoñe ji jikaʼa lômane foé be David a jô nye na: Te tabe alu di minjeʼese ya nkôte si, ve kele ôyap, njô bôt a bôte bese be ne nsamba wé be za bôé bebien vôme ya wu.

¹⁷ Yônatan a Ahimaas be mbe be tele En-Rôgel. Eyoñe te mbo ésaé minga a nga zu jô be na be ke kate njô bôte David foé, amu be nji bo ayoʼo ya yené nge nyiin e tison.

¹⁸ Ndôman éziñ é nga yene be a ke kate Absalom. Ve Bebaane bese be nga ke avôl a kui Bahurim, e nda môt éziñ a mbe a bili mfaʼan anjeñ e nseñ, nde be nga sis été.

¹⁹ Eyoñe te minga a nga nyoñ éyé a buti je anyu anjeñ a miase ntyaʼane nlisi été yôp na môt a bo te yeme jam éziñ.

²⁰ Eyoñe te bebo bisaé be Absalom be nga nyiine nda be minga ate a jô na: Ahimaas a Yônatan be ne vé? Minga a nga yalane be na: Be dañeya mon ôsôé. Be nga jeñ, vʼéyoñ be boya te yene be be nga bulane Yérusalém.

²¹ Eyoñ be keya, Ahimaas a Yônatan be nga jô David na: Kôlaʼane si boʼon avôle ya dañ ôsôé, amu Ahitôfél, a te ve feʼe ja wosane mia ana.

²² Eyoñe te David a bôte bese be mbe nsamba wé be nga kôlô si a dañe Yordañ; melenda me tyé, teke môte wua a nga liʼi fefel, teke môte wua a nga bo te dañe Yordan.

²³ Eyoñe Ahitôfél a nga yene na be nji ke belane feʼe jé, a nga dañ éjakase jé a ke nda jé ya tisone jé. Ndʼa nga ve mebendé e nda jé a wôé émien. Avale te nde a nga wu, be nga jame nye e soñ ésaa.

David a kui Mahanayim

²⁴ Ane David a nga kui e Mahanayim. Absalom a nga dañe yordan éyoñe te émien a bôte bese yʼIsraél nsamba wé.

²⁵ Nde Absalom a nga telé Amasa nlô ya nsamba mewosan éjiane Yôab; Amasa a mbe mona môt a too jôé na: Yitra, mon Israélite, nyô a nga ke be Abigayil, ngone Nahas, kale Séruya, nyia Yôab.

²⁶ Israél a Absalom be nga vule minkan e si ya Galad.

²⁷ Eyoñe David a nga kui Mahanayim, Koni, e mona Nahas ya Raba Beamônite, Makir, e mona Amiél ya Lôdebar, a Barsilayi mone Galadite ya Regelim,

²⁸ be nga soo binoñ, befandé, mendeʼe mʼékon, blé, fôn, avut, ñyañan mefes, mefese mefe, mefese me fôfoʼo, a ñyañan mefes,

²⁹ wôé, avoñ, bikela a mintômba, a befrômage be nyak. Be nga zuu biôm bite bise be David a bôt be mbe nsamba wé na be di; amu be nga jô na: Bôte ba be yianeya tôbane njuk a zaé, a nteʼan a évé, e nkôte si.