SAMUEL BAA EJÔÉ DAVID 16 - Bible en langue Bulu

Bemvôé a besiñ be David

¹ Eyoñe David a lôteya abôbône nkô abim éziñ, a teme na Siba a nga zu nye ôsu, a mbe mbo ésaé Mefibôsét a bijakase bibaé bi bili bon , bi beʼe fe belet mintete mibaé, mimbom bibuma bi ndiʼi woon bi ne nkôt ntet, bibuma ya ésep ntet a ndeʼe woone jia.

² Nde njô bôt a nga jô Siba na: Wo ye bo biôme bite jé? Siba na: Bijakas bia ye volô mbeʼan ya beʼe bôte ya nda njô bôt belet a bibuma ya ésep bia ye bo bidi asu bendôman, a bôt ba ye tek e nkôte si ba ye nyu woon.

³ Njô bôt a nga jô na: E mon masa wôé a ne vé? Siba a nga yalane njô bôte na: A liʼiya Yérusalém amu a te jô na: Den ndaa Israél ja ye bulane ma éjôé ésaa wom.

⁴ Ane njô bôt a nga jô Siba na: Tame yen jôm ése é ne ji Méfibôsét é ne énjôé. Siba na: Ma kute meboñe si! Me tame yene mvam mise môé, a njô bôt masa wom!

Simeyi a yoʼé David

⁵ Njô bôte David a nga ke a kui Bahurim. Môt éziñ a nga so valé a too môte ya abume bôte nda Saül, jôé na: Siméyi, e mona Géra. Emien a nga so nalé a zu a tote mejô biyoʼé anyu dé.

⁶ Nde a nga wua David mekok a wua fe bebo bisaé be njô bôte David, wôna jama bôt a bôte mewosan be mbe môt ate mbo nnôm a mbo ngal.

⁷ Simeyi a mbe a kobôʼô nalé a yokéʼé David a jôʼô na: Kele atan, kele atan, ñwôé bôt, zesé jôm!

⁸ Nti a bo éyoñe jina na metyi mese ya ndaa Saül me sôé wo nyô amu wo jôô éjiane jé; a Nti a keya éjôé e mo me mone wôé Absalom, ô lôô ô ntoo éngôngo avale wo yiane de, amu ô ne ñwôé bôt!

⁹ Eyoñe te Abisayi, e mona Séruya, a nga jô njô bôte na: Amu jé mbime mvu wu wo yoʼé njô bôt e masa wom? Tame suu me lôt, a ma ye tyiʼi nye nlô.

¹⁰ Ve njô bôt a nga jô na: Me bili za ajôô a wo, mona Seruya? Nge a yoʼé ma nalé a ne na Nti a te jô nye na: Yokéʼé David! Za ñhe a ye jô nye na: Amu jé wo bo ana?

¹¹ David a nga jô Abisayi a bebo bisaé bé bese na: Mi lôô na, e mone wom a nga kui miñya miam a jeñ ényiñe jam, kô fé mone Bényaminite nyô! Jôkaʼane nye a yoʼé, amu Nti a te kobô nye de.

¹² Eko éziñe na Nti a ye fombô njuʼu wom a suʼulane bo ma mvaé éjiane biyoʼé ya den.

¹³ Ane David ba be bôte bé be nga kee e dulu dab ôsu; Simeyi a mbe a wuluʼu ayo nkô bebé a David, a wuluʼu a yokéʼé nye, a wuʼa nye mekok , a mialaʼane mbuluk.

¹⁴ Eyoñe te njô bôt a bôte bese ba be be be mbe nsamba be nga kui abuk é jaéya be nlem , a valé nye be nga bo ne suu édudu.

Absalom a suane Yérusalém Mefeʼe me Ahitôfél ba usayi

¹⁵ Absalom a bôte bese, bôte yʼIsraél, be nga nyiin e Yérusalém; a Ahitôfél a mbe nsamba wé.

¹⁶ Eyoñe Usayi, mone Arkieñ, mvôé David, a nga kui be Absalom a nga jô nye na: Ényiñe njô bôt é boʼo ayap! Enyiñe njô bôt é boʼo ayap!

¹⁷ Nde Absalom a nga jô Usayi na: Tame ñhe yene nyeʼan ô bili nyo mvôé! Amu jé mia nyô mvôé mi nji ke?

¹⁸ Usayi a nga yalan Absalom na: Momo! Amu me ne be nyô Nti a jama bôte nyôna ase a bôte bese yʼIsraél be tobeya, môt ate nye bia nye bia ye tabe.

¹⁹ Jame baa na: Za ma ye saane nye ye sa e mone wé? Avale me nga saan ésoo avale te ma ye saane wo.

²⁰ Ane Absalom a nga jô Ahitôfél na: Bôndaʼane feʼe ya jam bia ye bo.

²¹ Nde Ahitôfél a nga jô Absalom na: Kele be bibon ésoo a nga liʼi ndaa njô bôt be baʼale je, éyoñe te Israél ase a ye yeme na ésoo a yeneya wo abé , éyoñe te mo ya bôte bese be ne mvuse jôé ma ye yeme ngu.

²² Nde be nga lame nda éndelé andil asu Absalom, éyoñe te Absalom a nga ke bômbô bibon bi ésaa e mise mʼIsraél ase.

²³ Mefeʼe Ahitôfél a ve me mbe me bili ngu melu mete vʼane ba sili nkômbane Zambe Emien. E nne mefeʼe me Ahitôfél mese me mbe nalé, toʼo asu David nge asu Absalom.