SAMUEL BAA EJÔÉ DAVID 13 - Bible en langue Bulu

Amnon a bo Tamar abasa

¹ A nga bo na, éyoñe mam mete me maneya. Absalom, e mona David, a nga bili kal é too étua abeñ jôé na Tamar; Amnon, e mona David, a nga nyeʼe nye.

² Nsisim ô nji bômbô Amnon si a kui kui vôme ya kon amu ajô Tamar, e kale jé; amu a mbe éndun, a Amnon a nga yen ayaé ya bo nye jam éziñ.

³ Amnon a nga bili mvôé jôé na Yehônadab, e mona Siméa, monyañe David; Yehônadab a mbe atyeñ abui.

⁴ Nde a jô Amnon na: Amu jé tyé ése wo dañe dañe yené éngôngo? Amnon a nga yalane nye na: Ma nyeʼe Tamar, kale mojañe Absalom.

⁵ Yehônadab a nga jô nye na: Kele bômbô si a veñesan nkôkon. Eyoñ éso a ye zu jome wo wo ye jô nye na: Kañeseʼe na kale jam Tamar é zu ve ma bidi; ma yi a zu yame bidi bite mamien me lôô éyoñe te ma ye yen a nyoñe bie e mo mé.

⁶ Eyoñe te Amnon a nga bômbô si a veñesane nkôkon. Ane njô bôt a nga zu jome nye, nde Amnon a jô nye na: Ma yeʼelane wo na Kale jam é tame zu yame ma biwôlé bibaé e mise mam été, a ve ma bidi e wo wé été.

⁷ Nde David a nga lôme Tamar tyiñ e menda été na: Ma yeʼelane wo na ô ke e ndaa ndôme jôé Amnon a yame nye bidi.

⁸ Ane Tamar a nga ke e ndaa ndôme jé Amnon é mbe é bôô si. A nga nyoñe éko avut, a nga fuʼu je, a nga mame biwôlé ôsu vié a yame bie.

⁹ A nga nyoñ éyañgaʼa a vaa biôm bi mbe été ôsu Amnon. Ve Amnon a nga bene di, nye na: Kulaʼane bôte bese atan! Eyoñe te bôte bese be nga kui atan.

¹⁰ Eyoñe te Amnon a nga jô Tamar na: Zaʼa ve ma bidi étune nda nné, éyoñe te ma ye di e wo wôé été. Ane Tamar a nga nyoñ biwôlé a nga yam a ke ve bie ndôme jé Amnon étune nda été.

¹¹ Awolo a nga ve nye bidi nde Amnon a nga bi nye a jô nye na: Zaʼa bia wo bi bômbô, a kale jam!

¹² Nde Tamar a nga yalane nye na: Momo, a ndôme jam, te belane ma a ngule minsôn, amu nalé a nji boban Israél été; te bo aval akute jame te.

¹³ Ma ye ke tabe vé a aval ôsone jame te? Womiene fe wo ye yené Israél été ane akut; éyoñe ji, ma yeʼelane wo na ô kobô njô bôt, aa ye ke bene na ô luʼu ma.

¹⁴ Ve a nji ke kômbô vôʼôlô nye; ndʼa nga bi nye a ngule minsôn a bômbô nye;

¹⁵ Amané, mvinane Amnon a nga zu vini nye valé ô nga dañe ngu a dañe nyeʼan a nga nyeʼe nye, ane a nga jô nye na: Kôlôʼô si, kele wé!

¹⁶ Tamar a nga yalane nye na: Momo, éyoñe wo titane ma nalé, wo bo ma abé a dañ abim abé ô maneya bo ma!

¹⁷ Ve a nji kômbô vôʼôlô nye, ndʼa nga loone mone ndôman a mbe a saane nye a jô na: Titaʼane ma nyina atan a fete nye mbé mvus!

¹⁸ Tamar a nga beʼe ézingi é too menyôle menyô, amu ngômesan bindune bengone bi njô bôt bi nga beʼe nje le. Ane mongô bisaé Amnon a nga kuli nye atan a fete mbé mvuse jé.

¹⁹ Ane Tamar a nga mane futi asube nlô a nyab ézingi a nga beʼe é mbe menyôle menyôl; ane a nga beté mo nlô a nga ke a yôn.

²⁰ Ane ndôme jé Absalom é nga jô nye na: Ye mia ndôme jôé Amnon mia be? Eyoñe ji, a kale jam, tabeʼe évô, ndôme jôé le; te dañ nyoñe jame te anen e nleme wôé été. Ane Tamar a nga tabe e ndaa ndôme jé Absalom a too étua nteʼan.

²¹ Ane njô bôte David a nga nyoñe foé ya mam mete mese nde a nga wôʼôlun abui.

²² Absalom a nji jô Amnon jam; vʼa nga baʼale nye ziñ, amu a nga bômbô kale jé Tamar a ngu.

Bebo bisaé be absalom ba wôé Amnon: Absalom a tup

²³ Mimbu mibaé mi lôteya, Absalom a bili betyiʼi mintômba mevul e Baal-Asor bebé Efrayim, ndʼa nga bañete bobefam be njô bôt bese.

²⁴ Absalom a nga ke fe be njô bôt a jô nye na: Tame yen mbo ésaé wôé a bili betyiʼi mintômba mevul; ajô te njô bôt a kañeseʼe zu be mbo ésaé wé ba be bebo bisaé bé.

²⁵ Njô bôt a nga yalan Absalom na: Momo, a mone wom, bia ye bo te ke bese, mbeʼe ô za dañe wo adit. Ve Absalom a nga yemete nye, ve njô bôt a nji kômbô ke, nde a nga botane nye.

²⁶ Absalom a nga jô na: Kañeseʼe ve na mojañ Amnon a zu nsamba wongan. Njô bôt a nga yalane nye na: Amu jé a yiane zu be wo?

²⁷ Vʼamu Absalom a nga yemete tyiñe jé nde njô bôt a nga kañese na ba Amnon be ke a bobefam be njô bôt bese.

²⁸ Absalom a nga bendé bendômane bé na: Tukaʼa yemelan éyoñe nlem Amnon wo ye bo mevak amu woon, me ke me jô mia na: Bibaʼane Amnon! A ntoo ve wôane nye. Te koone woñ, ye sa mamien ma bendé mia jame te? Boʼone ngul a ôdidiʼi!

²⁹ Ane bendôman be Absalom, be nga bo Amnon avale Absalom a nga bendé. Eyoñe te bobefam be njô bôt bese be nga kôlô si, môt ase ve dañe tite mulé jé yôp a tup.

³⁰ Be ngenane zen , nde foé éte é nga kui be David be na: Absalom a maneya wôé bobefam be njô bôt bese wua teke liʼi.

³¹ Ane njô bôt a nga kôlô si a nyabe mengômesame mé, a bômbô tyia; bebo bisaé bé bese be mbe fe valé, mengômesan nyaban.

³² Yônadab, e mona Siméa, monyañe David a nga nyoñe nkobô a jô na: Masa wom a boʼo te jô na be maneya wôé bendôman bese, bobefam be njô bôt, amu Amnon étam nye a wuya; a jame te da so ntyiʼan Absalom a nga tyik, ataté môse Amnon a nga bômbô kale jé Tamar a ngu.

³³ Eyoñe ji njô bôt e masa wom a boʼo te nyoñe jame te anen e nleme wé été a buni na bobefam be njô bôt be maneya wu, amu Amnon étam nye a wuya.

³⁴ Ane Absalom a nga tup. Esoé ndôman é nga bo ésaé ya mombô é nga bete mis a yene na: Beta nsamba a zaʼak e zen é mbe nye mvus, mfaʼa ya nkô.

³⁵ Nde Yônadab a nga jô njô bôte na: Bobefam be njô bôte balé ba zu! Aval ébien mbo ésaé wôé a toʼo a jôʼôk.

³⁶ A ngenan te suu nkobô nde bobefam be njô bôt be nga suan; be nga yôn; njô bôte fe a bebo bisaé bé bese be nga kuli abui miliʼi mis.

³⁷ Absalom a nga tup a ke be Talmayi, e mona Amihud, njô bôte ya Gésur; David a nga beʼe meyebe ya mone wé môse mise.

³⁸ Absalom a nga tup a ke Gésur, a nga tabe wé mimbu mila.

³⁹ Ane njô bôt a nga jôʼé ntôñan ya tôñe Absalom, amu valé nlem ô voéya nye ajô awu Ammon.