SAMUEL BAA EJÔÉ DAVID 11 - Bible en langue Bulu

David ba Bet-Séba

¹ Mbu ô nga tôñe valé éyoñe bejô bôt ba ke bita, David a nga lôme Yôab a bebo bisaé bé a Israél ase na be ke bôé Beamônite a dili Raba bita. Ve David a nga liʼi Yérusalém.

² Mamengôʼé, David a nga kôlô si énoñe jé, a nga ke a wulu andile ya nda njô bôte yôp, a too andile yôp, nde a nga yene minga a wobaʼan a too étua abeñ.

³ Nde David a nga lôme bôt be ke fas ajô ya minga ate. Be nga kate nye na: Bet-Séba le, ngone Eliam, nga Urie mone Hitite.

⁴ Ane David a nga lôme bôt be ke nyoñe nye. Ndʼa nga zu be nye, ane a nga bômbô nye a too na minga ate a mbe ézezañ ya ntunane wé amu mvine jé. Ane a nga bulan e nda jé.

⁵ Ane minga ate a nga nyoñ abum a lôme David tyiñe na: Me ntoo abum.

⁶ Eyoñe te a nga lôm be kate Yôab na: Lôme ma Urie, mone Hitite; nde Yôab a nga lôme Urie be David.

⁷ Ane Urie a nga ke be David, nde David a nga sili nye avale Yôab a too, avale bôt be né a avale bita bia wulu.

⁸ Eyoñe te David a nga jô Urie na: Kele nda jôé a sôbe mebo môé. Ane Urie a nga kui ndaa njô bôt atan a njô bôt a nga lôme nye atôm.

⁹ Ve Urie a nga bômbô e mbé ya nda njô bôt, ba be bebo bisaé be masa wé bese, a nji siliki e nda jé.

¹⁰ Ane be nga kate de David na: Urie a nji siliki nda jé. Eyoñe te David a nga sili Urie na: Nga wo so dulu? Amu jé ô nji siliki e nda jôé?

¹¹ Urie a nga yalane David na: Éwolo Zambe, Israél a Yuda be too bibem, masa wom Yôab a bebo bisaé ba vule minkan e miñyanebe, amu jé me ma yiane nyiin e nda jam a di a nyu a bômbô minga wom? Ane é ne bebela na womien ô vee, me se nguleya bo avale jame te!

¹² Ane David a nga jô Urie na: Betaʼa tabe vana den, a akiti ma ye suu wo. Nde Urie a nga tabe Yérusalém môs ôte a wu ô nga tôñe valé.

¹³ David a nga loone nye na a di a nyu émien a too, nde a nga bo nye na a ke sulé; mamengôʼé nde Urie a nga kui atan a ke vôm a bômbô ba be bebo bisaé be masa wé, ve a nji ke e nda jé.

¹⁴ Mametyé, David a nga tili Yôab kalate a lôme nye nye a Urie.

¹⁵ A nga tili e kalate ate été na: Telaʼane Urie asu bita da dañe ngu a tinekane nye mvus, nalé a ye biban a wu.

¹⁶ Eyoñe Yôab a maneya fombô tison, a nga telé Urie vôm a nga yeme na biwôlô bi bôte ya bita bi ne valé.

¹⁷ Bôte ya tison be nga kui a wosane Yôab; bôte ya jama bôt be nga wu, bevoʼo ya bebo bisaé be David fe, a Urie, mone Hitite a nga wu fe.

¹⁸ Ane Yôab a nga lôme David foé ya mam mese me nga boban e nseñ bita.

¹⁹ Nde a nga bendé mbeʼe foé na: Éyoñ wo ye mane kate njô bôt mam mese ya mewosan,

²⁰ nge njô bôt a yaa a jô wo na: Amu jé mia te zu bebé tison a wosan, Ye mi nji yeme na be ne wua mengaa bôt be tele mimfine yôp?

²¹ Za a nga wôé Abimélék e mona Yérubését? Ye sa minga a nga lume nye éfas akoʼo ba koʼo bidi e mfine yôp, ye a nji wu e Tébés? Amu jé mi nga subu bebé mfin? Eyoñe te wo ye yalane na: Mbo ésaé Urie a wuya fe.

²² Ane mbeʼe foé a nga ke. Eyoñ a nga kui, a nga kate David mam mese me mbe, amu ya Yôab a nga lôme nye.

²³ Mbeʼe foé a nga jô David na: Bôte bete ba te bi maʼa be bia; ba te zu wosane bia afan, a bia te tindi be a kui anyiine mbé .

²⁴ Bewua bilaé ba te lume bebo bisaé bôé mekoñ be too mfine yôp, ajô te bôte bevoʼo ya bebo bisaé be njô bôt ba te wu, a mbo ésaé wôé Urie, mone Hitite fe a wuya.

²⁵ Nde David a nga jô mbeʼe foé na: Wo ye kobô Yôab na: Te ndeñele womien ajô di, amu nkpwaté mekôn ô ne wôé môte nyô, éyoñ éfe ô ne wôé môte mfe; wosaʼane tison a ngul ése a kpwé je. A wo boʼo ngu!

²⁶ Nga Urie a nga wôʼô na nnôm a wuya, éyoñe te a nga bo mame ya yi nnôm.

²⁷ Eyoñe meyeb me maneya, David a nga lôme bôt be ke nyoñe nye, nde a nga nyoñe nye nda jé. Ane a nga bo minga wé a biaé nye monafam. Nti a nga wôʼô jame David a nga bo abé .