SAMUEL BAA EJÔÉ DAVID 10 - Bible en langue Bulu

Njô bôt Beamônite a té bebo bisaé be David ntañete Mewosan ma boban e zañe David a Beamônite

¹ A nga bo na éyoñe mam mete me maneya, njô bôt Beamônite a nga wu, nde mone wé Anun, a nga jôô éjiane jé.

² Ane David a nga jô na: Ma ye liti Anun mvam , e mona Nahas, avalʼésaa a nga liti mvam mfaʼa wom. Nde David a nga lôme bebo bisaé bé be volô nye nlem amu awu ésaa. Ane bebo bisaé be David be nga kui e sii Beamônite.

³ Eyoñe te bôte ya éjôé Beamônite be nga jô Anun masa wobe na: Ye wo simesane na David a lôme wo bevolô minlem amu ésemé a semé ésoo? Ye sa asu ya yem a looé tison a bulekane je, nde a lôme bebo bisaé bé be wo?

⁴ Eyoñe te Anun a nga bi bebo bisaé be David, a tyeñe be zel éfas a tyiʼi be mengômesan ataté ézezañ a kui mfaʼa ya mvuse si; éyoñe te a nga bulane be e be masa wop.

⁵ Ane be nga kate de David, nde a nga lôme bôt be ke tôbane be amu bôte bete be nga wôʼô mbia ôson; a njô bôt a nga lôme be tyiñe na: Tabaʼan e Yérikô akekui zele jenan é maneya kui éyoñe te mia ye beta zu.

⁶ Eyoñe Beamônite be yeneya na be dutuya ziñ e be David, nde be nga nyoñe bezimbi ba wulu a mebo mfaʼa wop tañe bôte toyini mewôm mebaé e be Besirieñ ya Bét-Rehôb a e be Besirieñ ya Sôba, be nga nyoñe fe bôte toyini e be njô bôte Maaka, a bôte toyini awôm a ébaé e be bôte ya Tôb.

⁷ David a nga wôʼô de a lôme be Yôab, a nsamba mewosan ôse, biwôlô bi bôt be ke wosane be.

⁸ Ane Beamônite be nga kui atan a tebe minnoñ mi too ntaʼan asu mewosan anyiine mbé; Besirieñ ya Sôba a Rehôb, bôte ya Tôb a Maaka be nga tele ngume vôm e nseñ mewosan.

⁹ Yôab a nga yene na ba ye bi asu bita ôsu a mvus. Nde a nga tobe bôt ézezañ ya ba ba dañe yeme wosan, ane a nga tebe ba be Besirieñ be lôane mesu;

¹⁰ Eyoñe te a nga telé monyañ, Abisayi, évete ya bôte bevoʼo bese, be tele ba be Beamônite be lôane mesu.

¹¹ Ane a nga jô na: Nge Besirieñ be ne ngu a dañe ma, wo ye zu volô ma; a nge Beamônite be ne ngu a dañe wo, ma ye zu volô wo.

¹² Boʼo ngu, mvaʼan biabebiene ngu asu ayoñe dangan a bitisone bi Zambe wongan, a Nti a boʼo jam ése a yene mvaé!

¹³ Ane Yôab a nga ke ôsu ba be bôt be mbe nsamba wé a tyaʼa Besirieñ, be nga tup ôsu vié.

¹⁴ Beamônite be nga yene na Besirieñ be tubeya, nde be fe be nga tup asu Abisayi a bulan e tison. Ane Yôab a nga bulane Yérusalém a soʼo ôbane ya wosane Beamônite.

¹⁵ Eyoñe Besirieñ be yeneya na Israél a dañeya be, be nga fulane ngu.

¹⁶ Ane Adadézer a nga lôme na minsamba bezimbi Besirieñ mi ne ôsôé yat mi kôlô si, a ane be nga kui Elam. Sôbak, évete nsamba mewosan Adadézer a nga tele be ôsu.

¹⁷ Ane be nga kate de David, nye ve sulan Israél ase, be dañe Yordan a kui Elam. Ane Besirieñ be nga tebe be lôô David asu a wosane nye.

¹⁸ Besirieñ be nga tup asu Israél, a David a nga jiane be minsamba avale di: bevagoñ bita mintete zamgbwa a bebebe bikabela toyini mewôm menyin; a nga bibi fe évete ya nsamba mewosane wop jôé na Sôbak, nde a nga wulu valé.

¹⁹ Bejô bôt bese be nga tii a Adadézer, éyoñ be yeneya na Israél a dañeya be, be nga late ngbwa a Israél a tabe éjôé jé si; a Besirieñ be nga ko woñe ya volô Beamônite.