SAMUEL BAA EJÔÉ DAVID 1 - Bible en langue Bulu

David a nyoñe foé awu Saül

¹ Valé Saül a wuya éyoñe David a nga bulan zu tabe Tiklag a soʼo mane wôé Beamalésite. Nde a nga bômbô valé melu mebaé.

² E môse lale, môt a nga so minkane mi Saül, mengômesan me too nyaban a fem nlô ôse, ndʼa nga ku si a kute fe meboñe si.

³ David a nga jô nye na: Wo so vé? A nga yalane na: Ma te tup minkan mi Israél.

⁴ David na jé ja lôt? Kate me foé! Ane môt a nga yalane na: Bôt ba te tube mewosan a bôt abui yʼayoñ ba te mane ku a wu, Saül émien a mone wé Yônatan be wuya.

⁵ Nde David a nga jô ndôman é nga kañete nye jame dina na: Wo yem aya na Saül a mone wé Yônatan be ne ñwuan?

⁶ Ndôman é nga Kañete nye mam mete é nga yalane na: Me too nkôle Gilbôa: Saül ki a yeʼe akoñe dé yôp, nde bevagoñ a bebebe bikabela bi nga bametane nye.

⁷ Eyoñ a Kôñelan, nde a yene ma a loone ma. Me na: Ma nyô!

⁸ Nde a jô ma na: Ô ne za? Nde ma yalane nye na: Me ne mone Amalésite.

⁹ Nde a jô me na: Tebeʼe ma fefel a wôé ma; amu bijôñ bi biya ma akôsa bo me ngenan me vee.

¹⁰ Nde ma tebe nye bebé a wôé nye, me tukaʼa fe yeme na a nji bo nguleya nyiñe bita bite. Me nyoñ ékate duma ja too nye nlô a akom da too nye wo a me zuya biôm bite e be masa wom.

¹¹ Ane David a nga bi mengômesane mé a nyabe me; bôte bese be nga too nye fefel be nga bo fe avale te.

¹² Be nga bo ékôan awu, be yônôk a tyi bidi a kui mamengôʼé ajô Saül, di mone wé Yônatan, di bôte Nti a nda Israél be nga mane wu a meyo me nkpwaté mekôn.

¹³ Ane David a nga kobô ndôman é nga zu kate nye foé na: Wo so vé? Nye na: Me ne mona ntabe a so e be Beamalésite.

¹⁴ David Nye nye na: Ô nji ko woñ amu jé ya same wo wôé a wôé nyôa Nti a ne ñwoʼone mbon?

¹⁵ Ajô te David a nga loone wua ya bendômane bé a jô nye na: Subuʼu nné a wôé nye! Nde môt ate a nga wôé mone Amalésite ate;

¹⁶ David a nga jô nye na: Metyi môé me tabeʼe nlô wôé yôp, amu anyu dôé nde é wôéya wo, amu wo te jô na: Ma te wôé nyôa Nti a ne ñwoʼone mbon.

David a yône Saül a Yônatan

¹⁷ Eyoñe te David a nga yia e jia ñyône ji asu Saül a mone wé Yônatan,

¹⁸ a nga bendé na be yeʼele je bone be Yuda; jia bewua élaé : é ne ntilan e kalate Nyô a ne zôsôô , David a nga jô na:

¹⁹ A Israél amu jé biwôlô bi bôte biôé ya mewosan bi maneya wu, biwôlô bi bôte biôé ya mewosan bi jôʼô mimbim e mevôm me nʼôyabe yôp?

²⁰ Te mialane foé nyô e tisone Gat teke mia miase je e minjoñ ya Askalôn. binga Befilisteñ be za bi avak, bengone be bôt be ne te ntyiʼibane metyele bete be za dañé.

²¹ A minkôle ya Gilbôa mfô mendim a mveñ bi boʼo momo be mia. Baa ye fe yen ateʼe mefup e meyo menan. Amu nne bibene ya bewosan bi nga tôban ôsame valé, ébene Saül, ba ye bo te beta woʼo je mbon.

²² Elaé Yônatan é nji bulane mvus ôsu besiñ a yiane wôé. A nkpwaté mekône Saül, O nga bo ésaé ja yiane wô éyoñ ése.

²³ Saül a Yônatan be nga nyeʼesan nté yʼényiñe jap ése Toʼo éyoñ yʼawu dap, be nji ke kandan. Bôte be mbe avôle mebo a dañe bendôé. Ayok a dañe bengbwengbwem.

²⁴ A binga ya Israél, yônane Saül! A mbe a jaléʼé mia abeñe mengômesan é nʼédima. Nyô a nga futi biôm bi or e bizingi bienane yôp.

²⁵ Amu jé mimben mi nga wu ézezañe mewosan? Amu jé Yônatan a nga wu e mevôm me ne mbetane yôp?

²⁶ Nleme wom wo tat amu wo, a Yônatan! Mojañ, e mvôé jam ja dañ! Nyeʼane wôé, mfaʼa wom, ô mbe jam ya semé, a dañe nyeʼan ya nyeʼe binga.

²⁷ Amu jé biwôlô bezimbi bite bi nga wu?