Rt 3 - Bible en langue Bulu

Rut a bômbô e mebo me Bôaze si

¹ Môs éziñ Naômi a nga jô Rut, mbome wé na: Ma ye jeñe wo awoʼon, nalé wo ye vak.

² Bôaz, e môte mia be bebo bisaé bé be ne binga mi nga saé vôme wua, ye a nji bo évuvumane jañgan? Alu ya den, a ye seʼese nlisi vôm ba vaa bidi bikôlaʼa.

³ Wobaʼane mendim, wobaʼane fe ôlobinda a nyume mvaé, éyoñe te wo jaé mbamba be biôm a ke e vôm ba vaa bidi bikôlaʼa, te jeñe na ô yene nye ndian a nyuan bi ngenan te man.

⁴ Eyoñ a ye ke bômbô si, wo ye tuʼa fombô e vôm a ke bômbô, éyoñe te wo ye ke a bete e jôm a vute nyô mfaʼa ya mebo nké, nalé ate wo ye bômbô si. Emien a ye kate wo e jam wo yiane bo.

⁵ Ane Rut a nga yalane ntyi na: Ma ye bo e jam ese ô jôya ma.

⁶ Nde a nga siliki a kui e vôm ba vaa bidi bikôlaʼa, a bo avale ntyi wé a nga lebe nye.

⁷ Bôaz a nga di a nyu, nde nleme wé ô nga jaé ne lut a mevak, ane a nga ke bômbô akuʼu ya vôm mimbom mi nlisi mi nga too. Nde Rut a nga zu ôteʼetek a vaa jôm é nga butu nye nyô e mfaʼa ya mebo nké, a bômbô si.

⁸ E zañ alu, Bôaz a nga liʼiban a avep, éyoñ a veñesan, ateme na minga a mbôô nye e mebo nké.

⁹ Nde a sili na: Za nyô? Ane éyalan é nga vebane na: Ma Rut, mbo ésaé wôé a ne minga, ndaméʼé afabe dôé e be mbo ésaé wôé a ne minga, amu e ne jam wo yiane bo na, ô kôté ma.

¹⁰ Nde Bôaz a nga jô nye na: A ngo jam, Nti a botaʼane wo! Mbamba ntabane wôé a suʼulan dañe nyô ya ôsu, amu ô nji ke jeñe bisoé bi bôt, toʼo bi bi ne azoé, nge bi bi ne minkukum.

¹¹ Eyoñe ji, a ngo jam, te beta ko woñ, ma ye bo wo e jam ese wo sili, amu bôte bese ya tison ba yeme na, ô ne e minga a yian.

¹² Eyoñe ji e ne bebela na, ma yiane kôté wo, ve môt a ne wo bebé a dañe ma a ne.

¹³ Tame lôt alu di va. Mametyé, nge a kômbô kôté wo, nalé a ne mvoʼé , ve nge a nji yene mvaé ya bo jame te, me ma ye bo de. A ne Nti a vee! A nto ve bômbô si a kui mametyé.

¹⁴ Nalé Rut a nga bômbô Bôaz e mfaʼa ya mebo nké akekui mametyé, ane fe a nga jiʼa kôlô si te na awolo môt a ne yem nyô mbok e kui. Ane Bôaz a nga jô émiene na: E nji bo mvaé na, môt éziñ a yeme na e minga nyô a te nyiin e vôm ba vaa bidi bikôlaʼa.

¹⁵ Eyoñe te a nga jô Rut na: Zaʼa éndelé ô beʼe le, kôme fe je bi; Rut a nga bo nalé: ane Bôaz a nga veʼe biate bi nlisi bisaman a ve nye bie. Nde Bôaz nyʼa nga bulan e tison.

¹⁶ Wônaa Rut ki a nga bulan e be ntyi wé Naômi. Ane Naomi a nga jô nye na: Ye wo le a ngo jam? Nde Rut a nga kañete nye mam mese Bôaz a nga bo nye.

¹⁷ Nye na, a te ve ma biate bi nlisi bina bisaman a jô na: Te bulane mo minsoé e be nyô ntyi.

¹⁸ Ane Naômi a nga jô na: Tabeʼe va a ngo jam, akekui ô yemeya avale jame di da ye suʼulan: amu nlem ô se ngule ya bômbô môte nyôna si e môse wu vʼakekui a maneya e jame di.