Rt 1 - Bible en langue Bulu

Nda bôt Elimélék ja tôban minjuʼu abui

¹ Melu betyiʼi mejô be nga jôô, mfumbale zaé a nga kui Israél. Nde môt éziñ ya Bétléhém, si ya Yuda, a nga kôlô baa ngal a bobefam bé bebaé; nalé be nga ke tabe nté éziñ mebôta me si me ne nteʼan e si ya Môab.

² Môt ate a mbe jôé na, Elimélék, minga wé ke jôé na Naômi; môé me bobefam bé bebaé ke na: Maklôn a Kiliôn. Be mbe bôte ya nda bôte Yuda é mbe é too Bétléhém be loʼone je na Efrata. Be ngenan be too e Môab,

³ nde Elimélék a wu, Naômi ve liʼi étam a bobefam bé bebaé.

⁴ Ane be nga luʼu bengone ya Môab: ngone jia jôé na Orpa, nyô foʼo ke jôé na Rut. Mimbu awôm mi lôteya, nde

⁵ Maklôn a Kiliôn be nga wu. Ane Naômi a nga liʼi étam étam teke fe nnôm nge bobefam bé bebaé.

Naômi a Rut ba bulan e Bétléhém si ya Yuda

⁶ A ngenan e si ya Môab, nde Naômi a nga nyoñe foé na Nti a maneya botane bôte ya si jé a ve be bidi. Ajô te a nga bo ngômesan ya bulan e si ya Yuda baa be mimbom mié mibaé.

⁷ Ane be nga ke nsamba. Be ngenan e zen ,

⁸ nde Naômi a nga jô mimbom mié mibaé na: Bulaʼan éyoñe ji, môt ase e nda nyia wé, Nti a boʼo mia mvaé avale fe mi nga bo ma a bôt be nga mane wu.

⁹ Nti a boʼo na mi bi awoʼon, môt ase e nda be nnôme wé: ane a nga wubane be. Nde mimbom mi nga bete metyiñe yôp a yôn.

¹⁰ Ane mi nga jô Naômi na: Bi nji ke kômbô liʼi wo, bia be wo bia ye ke e be bôte ya ayoñe dôé.

¹¹ Ve Naômi a nga yalane na: Bulaʼan, a bengo bam! Amu jé bia be mia bia ye ke? Ye me ngenane bobefam be ne bo benyo beyôm abume dam été?

¹² Bulaʼan, a bengo bam! Kelan, amu me ntoo étua nnôm ya beta luʼu fam. Jaʼana me too ndi ya bi nnôm alu di a biaé fe bobefam,

¹³ mi se ngule ya yange be na be yaé a toé miabebien te beyôm! Momo a bengo bam! Amu asuʼulane dam e nembaneya ayô a dañe éndenan; nalé fe na me lôô wo Nti ô keya ma e ngame yat.

¹⁴ Ane be nga beta taté na ba yôn; Orpa a nga wubane ntyi a kandane nye, ve Rut a nga lat a nye.

¹⁵ Nalé Naômi a nga jô Rut na: Ô lôô nyo mvan a bulaneya e be bôte bé a e be zambe wé: mia nye bulaʼan!

¹⁶ Ve Rut a nga yalane ntyi na: Te tindi me na me liʼi wo a bo te tôñe wo: amu vôm ase wo ke, ma fe ma ye ke; vôm ase ô too, ma fe ma ye tabe; e bôte bôé be ne émbam a e Zambe wôé a ne éñwom.

¹⁷ Ma ye wu a jambe e vôm wo ye wu. Zambe Emien a boʼo ma e jam da dañ abé , amu ma jô bebela na, awu étam nde da ye kandé bia wo.

¹⁸ Eyoñ Naômi a nga yene na Rut a tyiʼiya foʼo na baa nye ba ke, a nji ke fe beta jô jam afe.

¹⁹ Nalé be nga ke bebaane a kui anyiine tison Bétléhém ya Yuda. Eyoñ be nga nyiin e Bétléhém, tison ése é nga ngamelan, a binga be nga sili na: Ye Naômi foʼo nyô?

²⁰ Nde a nga yalane na: Te mia beta loone me na Naômi, nyô a ne njalan a mevak. Ve loʼone me na ayôlô, nyô a ne njalan a ôlun, amu Zambe a ne Ngul ése a litiya ma atyil a ayô.

²¹ Eyoñ me nga kôlô va me too njalan a afok, ve Nti a boya na me bulan teke jôme mo: amu jé mia beta loone me na Naômi? Nti a kuliya ma ôsame, a Nyô a ne Ngul ése a litiya ma bidim.

²² Avale di nde Naômi a nga bulan e si ya Môab baa Rut, mbome wé. Be nga suane Bétléhém ya Yuda melu ba taté nkôane nlisi.