Oz 9 - Bible en langue Bulu

Ayoñe bôte Zambe da ye mane dimili biôm bise

¹ A Israél, te vak, nge fôn ane meyoñ me ne te yeme Zambe, e too na ô nga bo ébamba, éyoñ ô nga liʼi Zambe wôé, a nyoñe maʼan me ne mvin e minseñ mise ba tyaʼa bidi.

² Ve fôn ba tyaʼa nseñ, a mbon ba miat, bia ye bo te bo asu dôé. A mfefé woon wo yange, wo ye bo te dañe wo anyu.

³ Ba ye bo te tabe e sii Nti; Efrayim a ye bulan Ejipte, a ba ye di bidi bi ne mvin Asiri.

⁴ Ba ye bo te sôé Nti mimvean mi woon; mimveane miap a ye bo te yene mie mvaé. Ma ye bo mfaʼa wop ane belet ôlun, ba bese ba ye di mimveane mite ba ye bo te mfuban; amu belet jap ja ye volô ve zaé jap, ve be se nguleya zuu je e nda Nti.

⁵ Mia ye bo aya asu ya kômesane môse mia be Nti mia ye tôban, môse abôʼô Nti?

⁶ Tame yen ane ba mane tup, amu si jap é maneya tyamban; Ejipte ja ye nyoñe be, a Mañfis a ye ve be mesoñ; biôme biap bi nʼédima, mboon a argent, sas ja ye bi bie, a biyo bia ye bo e menda bindelé mab été.

⁷ Melu melep me kpwaneya, Israél a yiane yeme de. Akôsa bo mia jô na: nkulu mejô a soʼo étyi, môta Nsisim ate, befôtaʼamfô be bili nye. Ve mia vuane na, jama mbia mimboone wônan, a nkwala mia bo nye, mbie bia bo nye nalé.

⁸ Nyô a bômbô évévé ajô Israél, nkulu mejô, ba Zambe be ne nsamba. Ve ba lame nye melam e vôm ase a ke. Jaʼane si é ne nyô Zambe wé, a tôbane fe ve bita.

⁹ Mi keya kui édoʼo abé , avalʼane melu mvus e Gibéa. Ve Nti a nji vuane mbia mimboone mienan. A ye yaa bikobe bienan.

Atek e ntoo Nti nyô

¹⁰ Me nga som Israél ane bibuma bi ndiʼi woon e fé été. Me nga yene bʼésoo benan ane bibuma bi ôsu ya figié. Ve be nga viane ke be Bal-Péor. A ve bebiene ngume mvean e be mbia ngunemelan ate, a bo bebien mbia be biôm, ane jôme jap ba nyeʼe te.

¹¹ Duma Efrayim da ye yele anʼônon: abialé momo, abum momo, nyoñan abum momo.

¹² Nge ba yale bon , ma ye vaa be te na be bo bôt, a bidim a be éyoñ ma ye ke be ôyap!

¹³ Eyoñ ma fombô mfaʼa Tir, Efrayim a tele mbamba vôm. Vʼasuʼulane dé e ne na a kee bone bé e be nyô a ye wôé be.

¹⁴ A Nti, za melebe wo ye ve be? Vaʼa be mebume bon ba bialé minsolekan, a mebé ma mane kôt teke menyañ!

¹⁵ Mboon abé wob ôse ô nga yené e Gilgal: nne me nga taté be ñwôʼan ôlune valé. Ma ye titane be nda jam, amu mbia mimboone miap; ma ye bo tekʼôsu a nyeʼe be; bivete biabe bise bi ne bi bia bene njôan.

¹⁶ Efrayim a bibaneya, nkañe wé ô maneya kôt; ba ye bo te beta beʼe bibuma. Nge be bili bon , ma ye bo ébuma yʼabume dap ba nyeʼe na é wu.

¹⁷ Zambe wom a ye bene be, amu be nji ke wôʼô nye. Ba ye taté na ba ndeñendeñ meyoñ me bôt été.