Oz 7 - Bible en langue Bulu

Nkoban ajô baa

¹ Awolo ebien ma kômbô yete Israél, nde ékob Efrayim a mewôé me bôt me Samari bia kulan: ba laane minsos, ñwuwup wo nyiine menda; ñwôé bôte ki a bole zoʼo atan.

² Be ne te jô e nleme wob été na: jam ese ba bo e too abé , ma baʼale de ôsimesane viam été; éyoñe jina ñhe, mimboone miap mia bômane be, mise mi ne ôsu viam.

³ Ba ve njô bôt avak. e abé dab été, a ve fe bivet avak a minsose miap.

⁴ Bese be ne bebo mejian ba funane mbum wo diʼi, ñwô nyañe belet a nji fe sooé njaʼa, ataté éyoñ a maneya fuʼu ébañ, a kui éyoñ ébañe te é maneya vus.

⁵ E môs abialé njô bôte wongan, ôtita woon wo bo bivete na bi kon. Ba same bekpweʼele mo.

⁶ Ba ba ve bebien mfaʼa ya bôndé mbia fek, be nʼayôñ ane mbume nduan. Ndum alu ayôñe dap e too njeʼeban, éyoñe tyé é lendéya, é nga yôñe nkabaʼa ane vôme jôme ja dik beta ndiʼan.

⁷ Eyoñe bese be maneya bili ayôñ ane mbume nduan, be nga wôé betebʼôsu bap. Bejô bôte bap ba ku mimbim, bana be tôñe ba bevok, ve teke môt a loone ma.

⁸ Meyoñ mefe me kôéya Efrayim mboone wop, éfunan ane éwôlé be nji ke kôñelan.

⁹ Bikuu bia viʼi ngule jé, ve nye teke yene jame te. Nyub é ntoo nye nlô, ve nye teke yeme nalé.

¹⁰ Mebune mʼayoñ Israél ma boʼolô nye. Israél a nji bulane be ma Nti, e Zambe wé. E mam mese ma, teke môt a nga zu yeme ma.

¹¹ Efrayim a ne zum. A bo mam ane mongô, a too fe teke yeme fas: a sili mvolan Ejipte, éyoñe te fe a ke Asiri.

¹² Ve nté a ke wé, me ke ve wua nye avote dam, a bo nye na a ku ane ônon, me nga ve nye melep abime da yian abé ba kañete mfaʼa wé.

¹³ Vʼéngôngol é ne na: bôte yʼEfrayim ba tube ma, bidime ñhe le mfaʼa wop, amu be beneya njôane wom, a ma ki me yiʼane kôté be, ve ba laane ma minsos awolo ba kobô ma!

¹⁴ Eyoñe ba loone me na me volô be, bebela a nji bo be be. Ve ba bômbô si be tatek, ba tene nyôle jabe mimbak, ndi é too be nleme na: nkôane bidi a mmiatane woon bia ye bo be étua mvaé. Nalé ate ba kôlô si a wosane ma.

¹⁵ Ve da na ma me nga ve be ngu! Ve be nga bi mfaʼa wom ve mbia bʼasimesan.

¹⁶ Nge ba bulane be môt éziñ, sa ñhe be ma. Ba ve ateʼe nyô ane élaé é nʼékotekot. Bivete biap bia ye wu bita amu nkobô ébiasé wop, a ba woé jame te Ejipte.