Oz 5 - Bible en langue Bulu

Mbia beyeʼele yʼIsraél

¹ Vôʼôlaʼane jame dina, mia betuni, vôʼôlôʼô a nda bôt Israél, keʼe alo a nda njô bôt, amu ntyiʼane mejô ô ne jôme jenan, ve mi nga viane bo ôlam e Mispa, a avot é yaa e nkôle Tabor,

² Ebé é nʼédok e Sitim. Ve ma ma ye ve bese melep ma yian, nalé Nti a jô.

³ Ma yem Efrayim, a Israél a se nguleya sobô ma, amu éyoñe ji a Efrayim, ô nyiineya ébamba été, a Israél a veya émiene mvin.

⁴ Mimboone miap mi nji fe ve bʼafôla ya bulane be Zambe wop, amu nsisim ébamba wo vuñe be be, a be nji ke yeme Nti.

⁵ Mebune mʼIsraél ma boʼolô nye. Israél a Efrayim ba sendé ékobe jabe yôp, ba be Yuda fe ba sendé.

⁶ Ba beta zu jeñe Nti, be bili mintômba, bikela a benyak, ve ba ye bo te yene nye. A kandaneya be.

⁷ Be kuaneya Nti, amu be biaéya bone mejian; éyoñe ji, teke kui ngume ngon, ba ye jañ a akume dab ése.

Bita e zañ Efrayim a Yuda

⁸ Loñane toñe nlak e Gibéa a nya toñe e Rama! Bômane nkul ébañ e Bét Avén! Tabeʼe ntye e mvuse jôé a Bényamin!

⁹ Efrayim a ye bo bilik e môse melep ma ye kui be nye. Ma kate foé é ne bebela e meyoñe yʼIsraél été.

¹⁰ Bivete ya Yuda bi ne bôt ba vaa minné e vôm mi mbe; ma ye sôé be ayaa dam ane mendim

¹¹ Ba tibili Efrayim, ba buʼu nye e ntyiʼane mejô été, amu a nga bo melo ya tôñe momo.

¹² A ma ma ye bo anʼako mfaʼa Efrayim, a avalʼanʼôkone mesôñ e nda bôte Yuda.

¹³ Efrayim a yemeya abé dé, a Yuda angôndô ya mboone wé, éyoñe te Efrayim a nga kôñelan mfaʼa yʼAsiri, a nga lôme bôt e be beta njô bôt. Ve njô bôt ate a se nguleya kôm mbia jame wé, nge yet ôkone vienan, a mia bôte yʼEfrayim.

¹⁴ Amu ma Nti ma jimbi mia ane ngbwengbwem, a bi Yuda anʼétoñe ngbwengbwem. Ma ma ye nyap, a ma ye kee jôm ma te bi, a teke môt a ye bo nguleya wôlé ma je.

¹⁵ Ma ye ke a beta bulane vôme wom, akekui be kañeseya mekua map a jeñ asu dam. Olune wob été, ba ye taté na ba jeñe ma.