Oz 4 - Bible en langue Bulu

Zambe ba Israél be bili ajô

¹ Vôʼôlaʼane nkobô Nti, a mia bone bʼIsraél! Nti a bili ajô a mia bôt mi too si nyô, amu bebela na, nyeʼane bôte bevok a ñyemane Zambe bi ne momo e si jenan.

² Nkanane mengana, meduʼan, mewôé me bôt, wup a mejian bi ntoo abui abui: nkulane metyi wua wo tôñe wu ôvok.

³ Ajô te si ja yôn. A bôte bese be too été be ne nteʼan, nalé fe betite ya fé a anone ya yôp; jaʼana kose ya mañe fe ja ye man.

Betuni ba bo abé

⁴ Sa ve môta môtô nye ba yiane soman nge ve mekua. Ve bia wo bi ne ajô a wo Ntuni nnen, nalé Nti a jô.

⁵ Wo ye kolé ôbak a amôs, mia nkulu mejô fe mia ye kolé ôbak a alu; ma ye jiane nyua wôé.

⁶ Bôte bam ba ye jañ amu ñyemane momo, amu ô nga bene ñyemane mam; ma ye bene wo a wo ye fe beta bo ntuni wom; amu ô nga vuane metiñ me Zambe wôé, ma fe ma vuane bone bôé.

⁷ Bese, abime be né, be nga bo ma abé , ma ye veñesane duma dap e bo ôson.

⁸ Ba nyiñ a bityiʼa , bôte bam ba yiane mekua ba ve, a tindi be na be bo avalʼabé be fe ba bo.

⁹ Jam da ye kui be bôt nde fe da ye kui be betuni. Ma ye yaa be amu ntabane wop, ma ye bo na be tôbane njuʼu yʼabé be nga bo.

¹⁰ Be kusa di abui ba ye bo te jaé; be kusa bo mejian abui, ba ye bo te biaé bon . Ya be nga bene ma, ma Nti, asu ya bo ébamba.

Ayoñe bôte Zambe da lumbu e njañ

¹¹ Ebamba a nsoʼone bilam bia dimili môte fek.

¹² E bôte bam ba sili élé jabe fek, a ntyaé élé wop ñwô wo kate be mam, amu nsisim ébamba wo yale be fé, a nté ba bo ébamba, nté ôte ñwô ba kôlô be Zambe wop.

¹³ Be bili fulu ya bo mimvean, e mebôbône minkôle yôp, a diʼi fe mimvean e bone minkôle yôp, a e bilé mevale mese si, ba dañe nyeʼe éjijine jap! Ajô te bengo benan ba bo ébamba, a mimbome mienan mia bo mejian .

¹⁴ Ma ye bo te bo sitoʼo yʼébamba bengo benan ba bo, nge nyô mejiane mimbome mienan mia bo, amu betuni bebiene fe ba ke avie, ba be binga bʼébamba, a kabane bityiʼa ba be binga ba bo mfufubʼébamba; tame yen ane bôt be nʼasuk ba kee bebiene njañ.

Yuda a saʼaleʼe mboone Israél

¹⁵ Nge wo, Israél, wo bo ébamba, Yuda a tame njaʼa bo te fubu été! Te kean e Gilgal, te betan e Bét Avén, a te kanane ngana na: ane Nti a vee!

¹⁶ Israél a dañeya kañge ane nyak ja ben be futiʼi je ébome tyiñ . Amu jé Nti a yiane ñhe bo be ane bone mintômba ba kee be e vôme beta miñyanebe be né?

¹⁷ Bôte yʼEfrayim be maneya ndamane bebien e be bengunemelan: jôkaʼane be!

¹⁸ Nné ane ba mane nyu, be nga bum ébamba été. Bivete biap bia dañe nyeʼe mam me nʼôson.

¹⁹ Evuñulu ja ye kee be, a ba ye wôʼô metunaʼa mab ôson.