Oz 2 - Bible en langue Bulu

Beta môse Yizrél

¹ Ve tañe bone bʼIsraél ja ye bo ane nseleʼe ya mañ ñwô be se nguleya vek nge lañe tañ; a ye bo na vôme be nga jô be na: mi nji fe bo bôte bam, ba ye jô be na: mi ne bone be vevea Zambe.

² Eyoñe te Yuda a Israél ba ye beta bo jôme jia, ba ye telé bebien évete jia a vambane si éte, amu môse Yizrél wo ye bo beta môs .

³ Loʼone bobenyoñe benane na: bôte bam, a bekale benane na: ba ma dañe nyeʼe!

Israél minga bijabô

⁴ Boʼone nyua wônane mejô, boʼone nye mejô, amu a nji fe bo minga wom, a ma me nji fe bo nye nnôm; a tame vaa mendem mʼébamba me ne nyʼasu, a ma mejian me ne nye mebé.

⁵ Nalé momo wôna ma ye telé nye soé ne ngeññ ane môs a nga so nyia abum. Ma ye bo nye éfunan ane nkôte si, éfunan ane si é nʼayet a bo nye na a wôʼô évé.

⁶ Ma ye bo te ko bone bé éngôngo

⁷ amu be ne bone mejian . Yaa! E nyia wop a boya mejian . Nyô a nga nyoñ abume dap, a jaléya émien a ôson, éyoñ a mbe a jôʼô na: ma ye tôñe bibone biam, ba ba ve ma bidi a mendim, mevule me ntômba mam a ndombo, mbon a menyu.

⁸ Ajô te ma ye dibe zene jôé a biyo, a dibe je a nkaʼalé, nalé a ye bo te beta yene mezene mé.

⁹ A ye tôñe bibone bié ve teke koone bie, a ye jeñe bie, ve teke yene bie. A ye jô na: ma zu bulan e be nnôm wom me nga taté bi, amu éyoñe te nje me nga dañe yene mvaé a dañ éyoñe ji.

¹⁰ A nga bo teke yeme na ma me mbe me vaʼa nye fôn, mfefé woon, mfefé mbon, a me mbe me vaʼa nye abui argent a or, ve a nga belane bie asu Baal.

¹¹ Ajô te ma ye bulane zu nyoñe fône jam éyoñ ba kôane je, a mfefé woone wom éyoñ ba miate wô. Ma ye wôlé nye mevule me ntômba mam a ndombo jam, mbie bi mbe bi butiʼi soé jé.

¹² Eyoñe ji ma zu kulan ôsone vié e mise bibone bié, a teke môt a ye wôlé nye e wo wom.

¹³ Ma ye bo avaʼa dé ese na e man, nalé fe mebôʼô mé, meté me ngone mé, besabate bé a e beta bisulane bié bise.

¹⁴ Ma ndamane ndiʼi woone wé, a e figié wé, mbie a mbe a jôʼô na: tame yene maʼane bibone biam bi veya ma. Ma ye bo ndiʼi woone te a befigié bete afan, a bia ye bo bidi betite ya fé.

¹⁵ Ma ye bo na a simesane melu bezambe ba loone Bebaal, Mbe a mbe a dikiʼi bityiʼa a jaék bilondo a bivongo biap. A mbe a tôñe bibone bié, ve a mbe a vuʼane ma, nalé Nti a jô.

Môs Elat

¹⁶ Ajô te ma ma ye wone nye a kee nye e nkôte si, ma ye kobô nleme wé.

¹⁷ E wé nye ma ye bulane nye mefube mindiʼi mi woone mé; ma ye bo mbiʼili Akor ô bo nye wu wo ve nye ndi nlem : éyoñe te a ye yalane, ma ane melu a nga too ésoé ngone minga, avalʼane môs a nga kôlô Ejipte.

¹⁸ A ye bo môs ôte na: wo ye loone me na: nnôme wom, nalé Nti a jô; ve wo ye bo te beta loone me na: Masa wom.

¹⁹ Ma ye vaa biyôlé bi Baal anyu dé, a ba ye bo te beta tot éyôlé jap.

²⁰ Môs ôte ma ye bo élat asu bôte bam, ba be betite ya fé, anone ya yôp, a betit ba nyiʼitane si; elaé, nkpwaté mekôn a bita, ma ye vaa bie a bia ye bo momo si éte; a ma ye bo na bôt be too été, be ke ôyo teke woñ éziñ.

²¹ Ma ye luʼu wo nnôm éto, wo ye bo minga wom amu zôsôô , nya ntyiʼane mejôô, nyeʼan a binyeñge ma ye liti.

²² Ma ye luʼu wo a nyeʼan ôse, a wo ye yeme ma na me ne Nti.

²³ Môs ôte, nalé Nti a jô, ma ye bo e Zambe a yalane miñyangan: Ma ye yalane jame yôp da yange, a yôp da ye yalane jame si ja yange,

²⁴ a si ja ye yalane jame fôn ja yange, e ne na mfefé woon a mfefé mbon, a biôme bite ki bia ye yalane jame Yizrél a yange.

²⁵ Ma ye bé yʼIzréél asu dam e si éte. Ma ye nyeʼe Bebene, a ma ye jô nyô a ne jôé na: Lô Ami na: ô nʼayoñe bôte dam, a nye ki a ye jô na: ô ne Zambe wom.