Oz 14 - Bible en langue Bulu

¹ Bôte ya Samari ba yiane jibi beʼe mam ma tôñ ékobe jap, amu be nga bene njôane Zambe wop: ba ye wu bita, ba ye jiane bone bap a sale bone babe mebum.

Mengakaʼa yʼényiñ

² A Israél, bulaʼan e be Nti Zambe wôé, amu ékobe jôé nje é nga bo na ô ku.

³ Bulaʼane be Nti mi jôʼô nye na: wo jamé minkoban! Nyoñ, ékañaʼa bia kañe wo mvoʼé !

⁴ Asiri a se nguleya nyii bia! Bia ye bo te beta bet e bikabela mewosane yôp. Bengunemelane bangan be ne ve biôm bi ne mboon a mo; bia ye bo te beta jô be na be ne Zambe wongan. Amu wo étam wo yeme liti monenyui mvaé.

⁵ Nti a jô na: ma ye saé Israél mfaʼa bijabô bié. Ma ye bo te tindi mamien, asu ya liti nye nyeʼane wom, amu me nji jeñe nye abé .

⁶ Ma ye bo ane mfô mendim asu Israél, a ye kui sam ane ayañ, a nyiñeli minkañe si été ane bilé ya Libañ.

⁷ Mintyaé mié mia ye mialan, a ye bo abeñ anʼôlivié, a mbamba ényume wé a ye mialan, a ji mefane ya Libañ.

⁸ Embam ba ye bulane zu tabe éjôé jame si. Ba ye bé fôn, a yaé ane ndiʼi woon, Ba ye wum ane beta bewoone ya Libañ.

⁹ Mfulaʼane mbé a ngenan e zañ Efrayim a bengunemelan? Ma, ma yalane meyeʼelane mé, a ma baʼale nye. Ma me ne avalʼane élé Sipré, élé é ne kom ése ve nyumi. Ma ma ve nye bidi a kôan.

¹⁰ Nge môt éziñ a ne fek, a ye wôʼô mejô mʼOzéé. Nge môt éziñ a yeme yemelan, a ye yem atinane yʼété. E ne bebela na Nti a kôme mezen me ne tekʼékotekot. Bebuni be ne wulu été, ve bôte be ne melo ba ye ku été.