Oz 13 - Bible en langue Bulu

Awu ya bôte ba bene Zambe

¹ Eyoñ Efrayim a mbe a kobôʼô, bôte bese be mbe be ko woñ. A mbe mben ayoñ Israél été. Ve mekua me nga zu be nye éyoñ a nga kañe Baal, a jame te é nga soo nye awu.

² Eyoñe ji tame yenan ane bôt ba kañge e mboon abé , be boya bebien éveʼelaʼa a argent a ne nyeman, bengunemelan bebien be nga té; bese be too mboone mo me bôt. Ba jô ajô dabe na: bia yiane ve bityiʼa ! Jame ya kame na bôt ba wubane bitoñe benyak! Mi lôô avale mboone te nga?

³ Ajô te ñhe bôte bete ba ye jañ ane nkute ya mametyé, ane mfô mendime ya mametyé, ane minkôte bilok ba vaa e nseñ ba tyaʼa bidi, anʼ ôtita wo kui nlom.

⁴ A ma me ne Nti e Zambe wôé, ataté si yʼEjipte. O nji yeme Zambe mfe ve ma, a ma étam me ne nyii bôtô.

⁵ Ma, me nga yeme wo e nkôte si, e si é nʼayôñ abui.

⁶ Vʼéyoñe be nga bi bidi betit, be nga jaé, a éyoñ be jaéya, minleme miap mi nga bo mebun, ajô te be nga vuane ma.

⁷ Ma ye bo ane ngbwengbwem e be be; ane ze e zene yôp, mise mam ma ye fombô be e vôm ase ba ke.

⁸ Ma ye yaa be ane ñyôyoʼo tit ba te wôlé bon , ma ye nyab édibe ya nleme wop, a mine be ane ngale ngbwengbwem. Betite ya fé ba ye nyabe be mefus mefus.

Amu jé Israél a tyamban

⁹ Jam da jiane wo a Israél, e ne amu ô nga ke me ngame yat, nyô a mbe nguleya volô wo.

¹⁰ Njô bôte wôé a ne ñhe vé éyoñe ji? A tame ñhe nyii wo e bitisone biôé bise été! Bejô bôte bôé be ne vé, mbe ô mbe ô jôʼô na: vaʼa me njô bôt a bivet?

¹¹ Ayaa dam été, me nga ve wo njô bôt, ñyaane wom été ma ye vaa nye.

¹² Bikobe bi bôte yʼEfrayim bi ne ntilane ngume vôm, mam ma boʼolô ékobe jé me ne mbaʼalan mbamba vôm.

¹³ Mintaé ya nyô a kôʼôlô mie mia ye kui be nye. Ve mon ate a ne akut, amu a bene kui atan abume nyia éyoñ éyoñ é kuiya.

¹⁴ Ve ma Nti, ye ma yiane vaa bôte bete e biaé bi awu, a kôté be vôme miñwuan? A awu, mengale môé me ne vé? A vôme miñwuan, ngule jôé ya Jian é ne vé? Dise dam é ne ndiman mfaʼa éngôngo.

¹⁵ Efrayim a kôsa yaé a bo kum ézezañe bobenyañe bé, ve évuñulu ya jôp da tôô ja ye zu, mfebe Nti, ô soʼok e nkôte si, wo ye kôtô anjeñe dé, a vele vôm a labe mendim. Ba ye mane kee akum a biôm bise bi nʼédima.