Oz 12 - Bible en langue Bulu

Mekua mʼIsraél aso atataʼa

¹ Bôte ya Efrayim ba bômane ma a mboon akut. Nda Israél ki a meduʼan. Ve Yuda nye ba Zambe be ngenane nsamba, a ngenan a wuluʼu e zôsôô Zambe a dañ étyi été.

² Efrayim a di évuñulu, a tôñe fe évuñulu ya jôbe da tôô. Môs ôse, a fôlô minsos a éndaman. Ba Asiri ba bo élat. A ba beʼe mbon a kee wô Ejipte.

³ Nti ba Yuda fe be bili ajô. A ye tôñesane Yakob avalʼane mboone wé ô né. A ye yaʼane nye, avalʼane mimboone mié mi né.

Mimboone mi Yakob aso atataʼa

⁴ A too nyia abum, Yakob a nga bi monyañ étimekili. Eyoñ a ntoo nyamôtô, a nga juane Zambe.

⁵ A nga juane éngele, nye ve dañe nye. Yakob a nga yôn a sili mvam . A nga tôbane Zambe e Bétél, nde Zambe a nga kobô nye.

⁶ Zambe ya émo ése, nyô ba loone na Nti,

⁷ a nga jô Yakob na: wo yiane bulane be ma me ne Zambe wôé. Boʼo mvaé a semé nya ntyiʼane mejôô. Tabeʼe ndi be Zambe wôé melu mese.

⁸ O bili ékotekote kobe mo, ane bekuse kekaa, a Efrayim! A wo nyeʼe wo duʼu bôt.

⁹ Wo kôme jô na: yaa me maneya bik, me biya abui akum. Abé e nji bo na môt a bi minseñge, nalé a nji bo ékop.

¹⁰ Ajô te ñhe ma Nti, e ma me ne Zambe wôé, ataté éyoñ ô mbe Ejipte, ma ye bulane wo ényiñe ya bôt be nji bi ngum étabaʼa, avalʼ anʼéyoñ bia wo bi nga tôban.

¹¹ Me nga kobô bekulu mejô, a lôme be mevale miñyenane mise anyu bekulu mejô, me nga ku minkana asu ya liti mam ma ye bo.

¹² Bôte ya Galad be mbe benya beboo mbia be mam. Jôm éziñe ya be be é nji beta liʼi. E ataʼa metunaʼa ya Gilgal, be mbe be vaʼa bityiʼa beyôm benyak. Ve metaʼa metunaʼa map me nʼéyoñe ji ve mevise mekok me ne teke mfi.

¹³ Yakob a nga tup a ke mfaʼa ya Mézôpôtami, nde a nga saane môte mbok, asu meveʼe me minga. Yaa, amu meveʼe me minga, nde a nga bo mbaʼale mimbame biyem.

¹⁴ Ve Nti a nga belane nkulu mejô asu ya vaa Israél a kôlô Ejipte, nde fe a nga ve nkulu mejô ésaé ya baʼale ayoñe bôte dé.

¹⁵ Bôte ya Efrayim be nga dañe bo Nti na a wôʼôlun abui. Ve Masa wop a ye wua e mam ma tôñe mbia mimboone miap e be bebien, a ye bo na ébiasé jap é suʼulane zu e be bebien.