Oz 11 - Bible en langue Bulu

Bikalaʼa bʼIsraél a nkoon éngôngole Zambe

¹ Eyoñ Israél a mbe mongô, me nga nyeʼe nye; a me nga loone mone wom a so Ejipte

² ve be nga ke ba be nga loone be ôyap. Be nga ve Bebaal bityiʼa a diʼi bengunemelan be ne nkpwelan ôtu.

³ Ma me nga yeʼele Efrayim dulu; me bili mo mé; ve be nji yeme na ma me nga saé be.

⁴ Me nga limiti be a minkole yʼényiñe bôt, a bengôkobe ya nyeʼan. Me mbe mfaʼa wop ane nyô a te suu ébôñeté jap, me nga ve be jôme ya di.

⁵ Ba ye bo teke bulane si yʼEjipte, ve mon Asirieñ, éyoñe jé, a ye bo njô bôte wop, amu be nga bene bulane be ma.

⁶ Nkpwaté mekôn wo ye biban e bitisone biap, a jiane mefôla ma bômane be, wo ye mine be, amu asimesan be nga bi.

⁷ Bôte bam be ne beyeñeyeñ mfaʼa wom, ba loone be e be nyô a ne yôb été, ve wua yʼété teke kôlô si.

⁸ Ma ye bo wo aya a Efrayim? Ye me ne nguleya kuane wo, a Israél? Me ne nguleya bo wo aya ane Adma? Ye ma ye bo wo ô funane Sebôyim? Nleme wom ô ne ntyendan, biôm bise yʼabum bia fôʼôsane ma.

⁹ Ma ye bo avalʼane ôlune viam wo yôñ. Ma ye bo te zu jian Efrayim, amu ma me ne Zambe, saake môt. Me ne étyi e zañe jôé, ma ye bo te zu a ayaa.

¹⁰ Ba ye tôñe Nti, Nye a ye bam ane ngbwengbwem, amu a ye bam, a bon ba ye mate mbi be soʼo mañ be fôʼôbaʼan.

¹¹ Ba ye mate mbi be soʼo Ejipte, be fôʼôbaʼan anʼônon, be soʼo fe si yʼAsiri, ane zum. A ma ye bo be na be tabe menda map, nalé Nti a jô.