Oz 10 - Bible en langue Bulu

Israél a tôbane minjuk

¹ Israél a mbe ndiʼi woon ô nʼatek, a wumu bibuma. Ve abime bibuma bié bi nga dañe bo abui, nde nye ki a nga ke ôsu a dañe lôñ abui metaʼa metunaʼa. Abim ane si jé é nga dañ abeñ, nde nye ki a nga dañe bo mekôn mʼazezambe mé abeñ.

² Nleme wop ô ne nkaban: ba ye beʼe mekua yʼété. Nti a ye bôé metaʼa metunaʼa map, a tyame mekôn mʼazezambe map.

³ Eyoñe ji ba jô na: bi nji fe bi njô bôt, amu bi nji ke ko Nti woñ; a jé njô bôt a ye bo asu dangan?

⁴ Ba tote bifia, be kane mengana me ne teke mfi, a bo fe bilat. Ajô te ntyiʼane mejô wo ye faa ane ébébéa é bili nsu, e minnoñ yʼafub été.

⁵ E bôt be too Samari, ba ye ko woñ ajô bone benyaʼa ya Bét-Avén. Bôt ba ye yône ngunemelan été. A betuni ba saane je ba ye fôʼôban ajô dé, ajô duma dé nde da kôlô e zañe jap.

⁶ Ba ye fe kee mone nyaʼate Asiri a bo mvean ba ve njô bôte Yaréb. Oson via ye bi Efrayim ajô te, a Israél a ye wôʼôsone yʼasimesane dé.

⁷ A maneya mfaʼa Samari a njô bôte wé, avalʼane avul e mendime yôp.

⁸ Bito ya bikôndôʼô yôp Bét-Avén, vôm Israél a nga bo abé bia ye tyamban; biyo a ndôé bia ye faʼa e metaʼa metunaʼa mabe yôp. Ba ye jô minkôle na: butaʼane bia! A bone minkôle na: kpwaʼane bia yôp!

⁹ Ataté melu Gibéa, o nga bo abé , a Israél! Be ngenane teke tyendé. Ngaa da yiane na bita bi kui e be bewôé bôte bete foʼo ve Gibéa?

¹⁰ Ma ye ve be meleb avale mamiene ma kômbô, a meyoñ me bôt ma ye sulan a wosane be, éyoñe ba ye kaʼa be ngataʼa amu be boya abé biyoñ bibaé.

¹¹ Efrayim a nʼétoñe ngale nyak be nga yeʼele, a nje ja nyeʼe é tyaʼa fôn. Vʼéyoñ me lôteya a yene mbamba tyiñe wé, nde me nga futi nye ndutane bikalik. Yuda a boʼo ésaé ya senane si, Yakob ki ji ya bôé bibañkelek.

¹² Ve mia, béane mbamba ntaban, éyoñe te mia ye kôane mvoʼé . Liane mfefé afup, amu éyoñ é kuiya be mia na mi kôñelane be ma Nti, akekui me zuya sôé ényiñe be mia.

¹³ Ve mi nga bé abé , a kôane mewôé me bôt, a di ébuma akute mboon; amu ô nga tabe zene jôé ndi a tañe biwôlô bi bôte jôé.

¹⁴ Beta zôʼé a ye bo e bôte bôé été, a bitisone biôé bi ne nlôñan alem bia ye tyamban, avale njô bôte Salman a nga tyame Bét-Arvél e môse bita bi nga boban. A vôm ate nyia bon a nga fiteban e bone yôp.

¹⁵ Jame Bétél a ye dutu mia nde le, amu nkpwala wônan ô nembaneya. Melende me tyé, éyoñe mewosan ma taté, a maneya mfaʼa njô bôte yʼIsraél!