NLITAN 9 - Bible en langue Bulu

¹ Engele tane a nga loñe toñe jé. Ane me nga yen ôteté ô kpwaʼa si. A édibaʼa ya susuʼa édoʼo ébé é nga veban e be nye.

² E nga diin anjeñ édoʼo ébé, ane ôtita ô nga kui ô funaʼane wu mbeʼe nduan. Jôp e nga bo dibi, jaʼane ñyeme yôp.

³ A bitandak bi nga so ôtita wu été, a yandane si nyô. Ngul é nga vebane be be, é funaʼane nyô alete ya si.

⁴ Ve be nga nyoñ atiñe ya bo te ndaman biloʼo ya si, e biôm bia leʼeban, nge élé, ve e bôt be nji bi sitame Zambe e mesu.

⁵ Be nga nyoñe ngu, saa nyô ya wôé be, ve nyô ya ndeñele be nté ngon étan. A éndeñelaʼa te é funaʼane ji môt ôlet wo te lôp.

⁶ Melu mete bôt ba ye jeñ awu, ve teke de yen. Ba ye kômbô wu, ve da ye tube be.

⁷ Bitandak bi nga funane bikabela bi ne nkômesane ya bo bita, e minlô miabe yôp jôm ane ékate duma or, a mesu map me funaʼane mesu me bôt.

⁸ Be nga beʼe ésil ane ji binga, a mesôñe map ve ane ma me ngbwengbwem.

⁹ Be nga yené ve ane ba be beʼe kôt étyé, a éduñe mefap map é mbe ane ji mengale me abui bikabela bia ke mbil e bita.

¹⁰ Be beʼe menjem ane ma alet me bili minsoñ nguleya ndeñele bôt nté ngon étan é too e menjeme map.

¹¹ Njô bôte wop a ne éngele njañan, nye ba loon e nkobô be Hébre na Abadoñ, a e nkobô Begrék na Apôlion.

¹² Bidime bi ôsu bi lôteya. Bidime bife bibaé bia zu.

¹³ Engele samane a nga loñe toñe jé. A me nga wôʼô tyiñ é soʼo minlaʼa mi ataʼa metunaʼa or a nee asu Zambe.

¹⁴ E nga jôban e be éngele samane a nga bili toñe na: Suʼu beéngele benyiin be ne ntiñetan e beta ôsôé Efrate.

¹⁵ Ane be nga suu beéngele benyin be nga too nkôman awolo, môs , ngon a e mbu be nga yiane wôé ngabe lale ya bôt.

¹⁶ Tañe minsamba bewulu bikabela mewosan é mbe beakutu bebaé ya beakutu. Me nga wôʼô tañe yʼété.

¹⁷ Avale me nga yen bikabela a ba be nga bete bie yôp, nde le. Be nga beʼe bibene bi nduan, yaseñte a sufre. Minlô bikabela mi mbe ane minlô bengbwengbwem, a menyu map me nga bo me yôô nduan, ôtita a sufre.

¹⁸ A bibubua mite bilaa, nduan ôtita a sufre, mbie menyu map me mbe me yôôk, ngabe lale ya bôt é nga wu, a bibubua bite: nduan, ôtita a sufre menyu map me nga yô.

¹⁹ Amu ngule ya bikabela é ne e menyu map a e menjeme map. Yaa! Menjeme map ma funane benyo, me beʼe minlô, a zen éte, be ne nguleya ndeñele bôt.

²⁰ Ve mfaʼa bôt be nga liʼi teke wu e bibubua bi, be nji kôñelane minlem a jôʼé mimboone ya mo map, be nga ke ôsu a kañe mimbia minsisim, bengunemelane be or a ba be silba a mvot, mekok nge bilé, mbe be se nguleya yen, nge wôk, nge wulu.

²¹ Be nji jôʼé ñwôane bôte wop, nge bemviʼi, nge ébamba jap, nge wube wop.