NLITAN 8 - Bible en langue Bulu

Efetaʼa zamgbwale

¹ Eyoñ a nga kui éfetaʼa zamgbwale, évôl é nga bo e yôb été bebé étun awolo.

² A me nga yene beéngele zamgbwa be tele asu Zambe, metoñe zamgbwa me nga vebane be be.

³ Engele mbok a nga zu tebe ataʼa metunaʼa yôp. A nga bili ésua ôtu or. A abui be ôlobinda e nga veban e be nye na, a ve be fufulu a meyeʼelan mimfufup mise, ataʼa metunaʼa or e ne ôsu éto njôan.

⁴ A ôtita be Olobinda ô nga kôlô e wo éngele a bet asu Zambe, a meyeʼelane mimfufup.

⁵ Ane éngele a nga nyoñ ésua ôtu a jalé je a nduane ya ataʼa metunaʼa a wua je e si, ane zoʼoyañ, metyiñ befeleves a mimfôʼôsane mi si bi nga boban.

Metoñe mesamane ya ôsu

⁶ Beéngele zamgbwa be nga bili metoñe zamgbwa be nga kômesan nloñan.

⁷ Nyô ôsusua a nga loñe toñe jé. Ane metaʼa a nduan, mbundaʼan a metyi bi nga wuabane si: ane ngabe lale ya si é nga dik, nalé fe ngabe lale ya bilé a bilok.

⁸ Engele baa a nga loñe toñe jé. O nga ye jô na, beta nkôl a yôñe nduan a nga wuaban e mañ été, a e ngabe lale ya mañ é nga bo ve metyi.

⁹ E ngabe lale ya bevevee be biôme be too mañ a nga wu, a ngabe lale besitima é nga ndaman.

¹⁰ Engele lale a nga loñe toñe jé. Ane beta ôteté a nga ku, a yôñôk ane ômes, a nga ku e ngabe lale ya asôé yôp a menjeñe mendim.

¹¹ Jôé dé e ne na yôlôyôlô. E ngabe lale ya mendim é nga veñesan ayô, a abui bôt e nga wu amu mendim me nga bo ayô.

¹² Engele nyini a nga loñe toñe jé. Ane ngabe lale ya jôp, e nyô ngon, a nyô ateté, bi nga namban. Ane ngabe lale jap é nga bo ékukut. Môs ô nga jañele ngabe lale ya mfaane wé, nalé fe alu.

¹³ A me nga wôʼô ndôé é yeleʼe ôzolom yôp é jôʼô tyiñe ngule na: Angônda jam! Angônda jam! Angônda jam e be bôt be too si nyô amu nloñane metoñ beéngele belaa mbe ba yiane beta loñ.