NLITAN 7 - Bible en langue Bulu

Ayoñe Zambe

¹ E mvuse mame mete, me nga yene beéngele benyin be tele mekuʼu menyin ya si. Be feteya bivuñulu binyine ya si, ane évuñulu éziñ é ne bo te vuñ e si, e mañ, nge e be élé éziñ.

² A me nga yen éngele mfe a soʼo mfaʼa jôp da tôô. A nga bili sitame vevea Zambe. A nga kobô e beéngele be nga nyoñe ngule ya ndeñele si a mañ tyiñe yôp a jô na:

³ te ndeñelane si a mañ a bilé, akekui bi maneya futi sitam e mesu bebo bisaé be Zambe wongan.

⁴ A me nga wôʼô tañe ba be nga futibane sitam e mvome mesu. Be mbe betoyini ntet a mewôm menyin a benyin, be soʼo e meyoñe mese me bone be Israél.

⁵ Ayoñe Yuda, be nga futiban sitam mvome mesu toyini awôm a ébaé! E mvôʼô Ruben toyini awôm a ébaé, e mvôʼô Gad toyini awôm a ébaé. E

⁶ mvôʼô Azér toyini awôm a ébaé, e mvôʼô Néftali toyini awôm a ébaé.

⁷ E mvôʼô Siméoñ toyini awôm a ébaé, e mvôʼô Isakar toyini awôm a ébaé,

⁸ e mvôʼô Yôsep toyini awôm a ébaé. E mvôʼô Bényamin, be nga futibane ndem e mvome mesu toyini awôm a ébaé.

Bizuʼu Mintobane mi bôt

⁹ E mvuse mame mete, me nga fombô a yene beta nsamba bôt. Teke môt a mbe ngule ya lañe tañe jap. Be soʼo meyoñe mese, a e be bôte bese, a minkobô mise. Be nga tele betetele asu éto njôan a asu Mone Ntômba, be beʼe bifumulu bizingi be bili mebui melen e mo.

¹⁰ Be nga yôtane tyiñe yôp a jô na: Nyian ô ne jôme Zambe wongan, nyô a too éto njôan, a e jôme Mone Ntômba.

¹¹ A beéngele bese be nga sulan, mbômaʼan éto njôan a bemvendé, a betite benyiin be nga ku si bubutu asu éto njôan a kañe Zambe.

¹² Be nga bo be jôʼô na: Amen. Ekañaʼa, étôtok, fek akéva, duma, éwôlô a ngu bi boʼo e be Zambe wongan nnôm éto a nnôm éto! Amen.

¹³ Wua ya bemvendé a nga nyoñ nkobô a jô me na: E bôt be beʼe bifumulu melôʼô ba, be ne beza, a ba so vé?

¹⁴ Me nga yalane nye na: A Nti wom, wo wo yem. Ane a nga jô me na: Ba so e beta meveʼele été. Be nga sôbe melôʼô map a dube me éfumulu e metyi me Mone Ntômba été.

¹⁵ Ajô te be tele ôsu éto njôane Zambe, a kañe nye môs baa alu e nda Zambe été. A nyô a too éto njôan a ye buti be e nda éndelé jé été.

¹⁶ Baa ye fe wôʼô zaé nge évé. Jôp a nduane jé bia ye bo te beta diʼi be.

¹⁷ Amu Mone Ntômba a tele ézezañ éto njôan a ye bo mbaʼale wop. A a ye kee be vôme menjeñe mendim me né. A Zambe a ye fimi miliʼi mese e mise map.