NLITAN 6 - Bible en langue Bulu

Besitam besaman ya ôsu

¹ Nde éyoñ Mone Ntômba a nga kui éfetaʼa ôsu ya bifetaʼa zamgbwa, me nga wôʼô tit ôsu ya betite benyiin é jôʼô a tyiñe zoʼoyañ na, zaʼak.

² A me nga yen éfumulu ékabela, e môt a nga bete je yôp a nga bili akoñ élaé , ékate duma é nga vebane be nye, a nga ke ane medañe, mfaʼa ya ke dañ.

³ Eyoñ a nga kui éfetaʼa baa, me nga wôʼô tite baa é kobôʼô na: Zaʼak!

⁴ Ane ékabela éfe é nga vam ane nduan. Ngule ya vaa mvoʼé e si na bôt be wôan é nga veban e be nyô a nga bete je yôp. A beta nkpwaté mekôn a nga vebane be nye.

⁵ Eyoñ a nga kui éfetaʼa lale, me nga wôô e tite lale é kobôʼô na: Zaʼak! A me nga yen: évindi ékabela. Nyô a nga bete je yôp a nga bili kop e wo.

⁶ A me nga wôʼô jôm aval ane tyiñ , ézezañe betite benyiin é jôʼô na: ô veʼe nlisi wua tañe denié wua, aveʼe fôn ala, tañe denié wua. Ve mfaʼa mbon a woon, te nambe bie.

⁷ Eyoñ a nga kui éfetaʼa nyini, me nga wôʼô tite nyini é jôʼô na: Zaʼak!

⁸ Ane me nga fombô e teme na, ékabela é too ékukut. E nyô a nga bete je yôp, be loʼone nye jôé na awu, étabaʼa miñwuan é tôñe nye mvus. Ane ngul é nga vebane be be mfaʼa ngap jia ya mengap menyiin ya si na be wôé bôt a nkpwaté mekôn, a zaé, a awu, a miñyôyoʼo betite ya si.

⁹ Eyoñ a nge kui éfetaʼa tane, me nga yen ataʼa metunaʼa si minsisime ya ba be nga wôéban amu ajô Zambe a amu nkañetane be nga kañete ane bengaa.

¹⁰ Be nga yôtan a ngule tyiñ , a jô na: Ntéavé a Masa a ne étyi a bebela, wo ye yange asu ntyiʼane mejô a nkunane metyi mangan e be bôt be too si nyô?

¹¹ Wôna éfumulu ézingi é nga veban e be môt ase ya be be, be nga jô be na, be tame jibi nté éziñ, akekui tañe beébe bebo bisaé bap a bobenyañe bap é jalébaneya, mbe ba yiane wôéban avale fe ane be.

¹² Eyoñ a nga kui éfetaʼa samane, beta mfôʼôsane si a nga bo. Jôp e nga bo dibi aval ane éyé melina, a ngon ése ki ane metyi.

¹³ Ateté ya yôp e nga ku si aval ane bityese bibuma bi figié éyoñ ôkôs wo suʼu bie.

¹⁴ Yôp e nga kôlô aval ane kalate ba vuluku. Minkôle mise a bikôte bi mañ bise bi nga fôʼôsan.

¹⁵ Bejô bôte ya si nyô, e ba benen, bivete minsamba mewosan, minkukum a mingungu, bese, belo a beti, be nga sobô e mimbase mekok a mekôme ya minkô.

¹⁶ Be mbe be jôʼô minkô a mekôme na kpwaʼane bia yôp, a solaʼane bia ôyap a nyô a too éto njôan, a ôyap a ayaa Mone Ntômba!

¹⁷ Amu beta môse ya ayaa dap a soya, a za a ye nyiñ?