NLITAN 4 - Bible en langue Bulu

Eto njôane Zambe a biôme ya yôp

¹ Eyoñe mam mete me lôteya, me nga yene mbé ô yoo yôp, a tyiñ ôsu me nga taté wôk é kobôʼô ma é funaʼane nyô toñ, é nga jô me na: Betek e va, a ma ye liti wo e jam da yiane tôñe valé.

² Eté été, Nsisim a nga bi ma. A ô lôô, éto njôan é nga tele yôp, a môt éziñ a too je yôp.

³ Nyô a nga too éto njôane yôp a mbe a funaʼan akoʼo ba loone Yaspe a di ba loone Sardôan. Etôtok é mbe é bômaʼan éto njôan a minkôkô mi émerôd.

⁴ Bito mewôm mebaé a binyin bi mbe bi bômaʼan éto njôane ji, bemvendé mewôm mebaé a benyin be mbe be too bito mewôm mebaé a binyin, be beʼe bifumulu mengômesan, bikate bi or bi too be minlô.

⁵ Befeleves, metyiñ a zoʼoyañ bi mbe bi soʼok éto njôane te. Beta belambe zamgbwa be mbe be yôñôk éto njôan. Belambe bete be ne minsisim mi Zambe zamgbwa.

⁶ Ôsu éto njôan, jôm é too ane mañ mʼévet é funaʼane kristal. Betite benyiin, njalan a mis ôsu a mvus, be tele ézezañ éto njôan, be bômaʼane je.

⁷ E tit ôsu é funaʼane ngbwengbwem, e nyô baa é funaʼan étoñe nnôme nyak, e nyô lale, é funaʼan asu môt, e nyô nyini é funaʼan aval ane ndôé ja yele.

⁸ Betite bete benyiin be nga bili, tit ése, mefap mesaman njalan a mis mbômaʼan été a atan. Be ne te jôʼé jô môs baa alu na: Etyi, étyi, étyi, Nti, Zambe a ne ngul ése, nyô a nga too, nyô a too, a nyô a zu.

⁹ A, éyoñ ése betit be nga ve étôtok, duma a akéva e be Nyô a too éto njôan a a vee nnôm éto a nnôm éto,

¹⁰ bemvendé mewômebaé a benyiin be nga kumbu si asu nyô a too éto njôan, be nga kañe Nyô a vee nnôm éto a nnôm éto, be wuʼa bikate biap asu éto njôan, be jôʼô na:

¹¹ wo wo yiane nyoñe duma, étôtok a ngu, a Nti e Zambe wongan, amu wo ô nga té biôme bise; ô nga kômbô na bi boban, ane bi nga téban.