NLITAN 18 - Bible en langue Bulu

¹ Wôna me nga yen éngele mfe a sise si a soʼo e yôp. A nga bili beta ngu. A si é nga faé a étôtoʼo jé.

² A nga yôtan a tyiñe ngu a jô na: A kuya, a kuya, beta Babilôn. A ntoo étabaʼa mimbia minsisim, étabaʼa mimvimvine minsisim mise, étabaʼa anon ese e ne mvin a abé .

³ Amu a nga nyuu meyoñe mese woone ayoʼo ya ébamba. Bejô bôte ya si nyô, be nga bo ébamba fufulu a nye. A bebo makit ya si nyô be nga bik a ngule ya nyanga jé.

⁴ A me nga wôʼô tyiñe fe é soʼo yôp é jôʼô na: Kôlaʼane nlame wu a bôte bam, mi za nyoñe ngabe ya mbia be mame bé, a kabane bibubua bi ne asu dé.

⁵ Amu e mam abé mé me ntoo abui a kui e yôp. A Zambe a simesaneya bikotekote bié.

⁶ Yakaʼane nye a e moné wé émien. Bulaʼane nye mimboone mié tañe mebime mebaé. Elaé a nga bo a bundaʼane bewoone béé, tundaʼane be asu déé biyoñe bibaé.

⁷ Abim a nga nyeʼe étôtok a nyanga, abime te vaʼane nye éndeñelaʼa a awu. Amu a jô e nleme wé été na: Ma ma dañ, a me nji bo nkus, a teke me yeʼe veʼele yen awu.

⁸ Amu ajô te bibubua bi ne ntiñetan mfaʼa wé, bia ye zu e be nye môse wua, e ne na: Awu, mbia ôlun zaé, a a ye diʼibane nduan. Amu Nti, Zambe nyô a tyiʼiya nye ajô a ne ngu.

⁹ Ajô te bejô bôte ya si nyô be nga nyoñe ngap a ébamba jé, a nyanga jé ba ye yôn a tat, éyoñe ba ye yen ôtita ya ndiʼane wé.

¹⁰ Ba ye tebe ôyap amu woñe ya mintaé mié a jô na: Bidim! Bidim! Ngoʼo beta tison, Babilôn, e ngungule tison, e nga sili ve awolo da na, ô tyiʼiban ajô!

¹¹ A bebo makit ya si nyô ba yôn a nyoñe ngabe ya ôlune vié, amu teke môt a beta kus akume dap,

¹² akume or a silba, mekoʼo me ne édima, a metabe, nya ndomboo a ngômesan é ne ébubut, veleves a angôô, bilé bia nyume mvaé, biôme bi ne mbañ a bilé bi ne édima, mvot, étyé nge akoʼo Marbre.

¹³ Elé kanél a amône beôlobinda, mir a ôtu, woon a mbon, ékekeb avut a fôn, benyak a mintômba, bikabela a bevagoñ, alo a minkôm.

¹⁴ Ebuma ya e nleme wôé ô nga kômbô é keya wo ôyap. Jôm ése é ne abeñ a étôtok é ntoo momo be wo. Teke na be ne beta yeme je.

¹⁵ Bekuane biôm a nga bo kum amu makite mete, ba ye tebe ôyap amu woñe ya éndeñelaʼa jé. E du été a ôlun été,

¹⁶ ba ye jô na: Bidim! Bidim! Beta tison, nyô a nga beʼe ndombo, ngômesan é ne ébubut a nyô é ne angôô, é ngembaʼane or, mekoʼo me ne édima a metabe,

¹⁷ akume te ese e maneya saaban vʼawolo da étam! A bewulu beavion bese, ba bese ba wulu besitima e mefôla ma bôman, bewulu mañ a ba bese ényiñe jap é tii mañ be nga tele ôyap,

¹⁸ be yôtaʼan a ñyenan ôtita ya ndiʼane wé na: Tisone fé é mbe veʼane beta tison?

¹⁹ Be mbe be kute mbuluk e minlô, be yônôk, miliʼi mis a ôlune na: Bidim! Bidim! Beta tison nyô afoʼo dé e nga bo ba bese be bili besitima mañe kum, ase a maneya saaban vʼawolo da étam!

²⁰ Vaʼak, a yôp amu nkuane wé! Mia mimfufup, minlôman a bekulu mejô fe vaʼan, amu Zambe a kobôya ajô denan éyoñ a maneya tyiʼi ajô Babilôn.

²¹ Eyoñe te ngungul éngele éziñ ô nga nyoñ akok e ne anen, akoʼo ba koʼo de bidi a wua de mañ été a jôʼô na: Avale ngule di nde ba ye wua Babilôn, beta tison, ba ye bo te beta yene nye.

²² Ba ye bo te beta wôʼô jia bebôme mvet a beyeme mezik, bebôme mfañ a toñ e be wo.

²³ Efufube lambe ja ye bo te beta faé be wo. Ba ye bo te beta wôʼô tyiñe ndôman é ndôme luk ba ngale be wo, amu bebo makite bôé be mbe biwôlô bi bôte ya si nyô, amu mam me ngbwee me nga wone meyoñ mese,

²⁴ a amu be nga koone metyi bekulu mejô, ma mimfufup a ma me ba bese be nga wôéban e si nyô be wo.