NLITAN 17 - Bible en langue Bulu

Nkuane Babilôn

¹ A wua ya beéngele zamgbwa, be nga bili bisua zamgbwa, a nga zu a jô me na: Zaʼak a ma ye liti wo ntyiʼane ajô beta minga ébamba a too éwome mañ.

² Bejôô bôte ya si nyô be nga bo ébamba a nye a e bôt be too si nyô be nga sok woone yʼébamba jé.

³ Wôna a nga beʼe ma, e nsisim été, a kee ma e nkôte si. A me nga yene minga éziñ, a too évele tit ne zôññ e yôp, njalan a môé me nkobô ébiasé e nyô, a beʼe minlô awôm a minlaʼawôm.

⁴ Minga a beʼe évele veleves, a ngembaʼan a or, mekoʼo me ne édima a metabe. A nga bili élaé or, njalan a mam abé , e ne na, mvite ya ébamba jé!

⁵ Ntilan ô nga too e mvom asu jé, ndimba, ô too na: Beta Babilôn, nyia binga bʼébamba a mbia be mame ya si.

⁶ A me nga yene minga, mbilan a metyi mimfufup, a e ma bengaa be Yésus. Eyoñe me nga yene nye, me mbe feʼe ne vema.

⁷ Wôna, éngele a nga jô me na: Amu jé wo ku avem? Ma ye kate wo ndimba jame minga ate a e nyô tit é beʼe nye é too minlô zamgbwa a minlaʼawôm.

⁸ E tit wo te yen é nga too, ve é nji beta bo. Ja ye so mbiʼili a ke e njañ. A e bôt be too e si nyô mbe môé me nji bo ntilan e kalate ényiñ ane si nyô é nga téban, ba ye semé éyoñ ba yene tit éte, amu é nga too, ve é nji beta bo, ve ja ye beta so.

⁹ Eyoñe ya bo atyeñe fek ja faé éfufup e nje ji. Minlô zamgbwa mi ne minkôle zamgbwale minga a too. Be ne fe bejô bôte zamgbwa.

¹⁰ Betane ya be be, be kuya, nyô samane a jôô, nyô zamgbwale a ngenane te so, vʼéyoñ a ye so, a ye tabe ve ôyôme nté.

¹¹ E tit é nga too a é nji fe bo éyoñe ji, é ne ébien e njô bôte muame. E ne nlañan e nsamba betite zamgbwa, a ja ke njañ.

¹² Minlaʼawôm ô nga yen, mi ne bejôô bôt awôm be ngenane te nyoñ éjôé, ve ba ye kabane ngule ya njôô bôt awolo da, baa be tit.

¹³ Be bili jame ba sôñ e ne na, be ve ngule jap a éwôlô jap mfaʼa ya bo tit ésaé.

¹⁴ Ba ye wosane Mone Ntômba, a Mone Ntômba a ye dañe be. Amu a ne Nti ya beti a Njôô ya bejôô. E ba be ne nloon, mintoban, a e ba ba nyeʼe nye, ba ye dañ baa be nye.

¹⁵ Ane a nga jô me na, mendim ô nga yen e vôme minga bijabô a too, me ne bôt, bizuʼu bi bôt, meyoñ me bôt a minkobô .

¹⁶ Minlaʼawôm ô nga yen a tit, ba ye vini minga ébamba, ba ye telé nye éndômba a soé. Ba ye di minsône mié, a diʼi mie nduan.

¹⁷ Amu Zambe a nga kôme minleme miap na be bo nkômbane wé ôbien, e ne na, éjôé jap é bo tit ésaé akekui mejô me Zambe ma ye tôéban.

¹⁸ A, e minga ô nga yen, a ne beta tison a jôô bejô bôte ya si nyô.