Biblia Todo Logo
Bìoball air-loidhne

- Sanasan -

NLITAN 16 - Bible en langue Bulu

1 A me nga wôʼô beta tyiñ a soʼo nda Zambe, a jôʼô beéngele zamgbwale na: Kelan a sôé bisua zamgbwale ya ayaa Zambe e si.

2 E nyô ôsu a nga ke a sôé ésua jé e si. Mbia mefô me nga bi e bôt be nga beʼe ndeme tit a kañe éveʼela jé!

3 E nyô baa a nga sôé ésua jé e mañ. Ane mañ me nga bo ane metyi me mbim, e jôm ése ya mañ é nga bili mvebe ényiñ é nga wu.

4 E nyô lale a nga sôé ésua jé asôé, a e menjeñe mendim: asôé a menjeñ bi nga veñesane metyi.

5 A me nga wôʼô éngele a ne njôô mendim a jôʼô na: O ne zôsôô a mfufup, wo ya ô too, e wo ô nga to, amu ô nga liti e zôsôô wôé.

6 Amu be nga kuli metyi mimfufup a bekulu mejô, a metyi fe mme ô nga nyuu be. Nalé a yiane be!

7 A me nga wôʼô ataʼa metunaʼa e jôʼô na: Yaa, a Nti Zambe a ne ngul ése, mintyiʼane mejô miôé mi ne njalan a benya mejôô a zôsôô .

8 E nyô nyiini a nga sôé ésua jé e jôp. A ngul é nga vebane be je na é diʼi bôt a nduane jé.

9 A bôt be nga dik a beta ayôñ. A be nga kobô jôé Zambe ébiasé, e nyô a bili ngule njôan e be bibubua bite, ve be nji kôñelane minleme na, be kañe nye.

10 E nyô tane a nga sôé ésua jé éto njôane tite yôp. A éjôé jé é nga ku e dibi été. Bôt be nga nyalé ayem a mintaé.

11 A be nga kobô Zambe ya yôp ébiasé, amu mintaé miap a mefôle map. Ve be nji kôñelane minlem mfaʼa mimboone miap.

12 E nyô samane a nga sôé ésua jé ôsôé Efrate, mendim me nga viele a ve bejô bôte ya mfaʼa jôp da tôô zen .

13 A me nga yene mbia minsisim mila mi funaʼane minkongo, mi soʼo anyu dragoñ, e di tit, a e di nkulu mejô minsos.

14 Mi ne foʼo ve mimbia minsisim. Mia bo mesimba, a ke yene bejôô ya si nyô ése, be sulane be asu mewosane ya beta môse Zambe a ne Ngulése.

15 Tame yen, ma zu ane ñwuwup. Ebotan a môt a mombô, a baʼale mengômesane mé, a za kee soé a jôʼé ôsone ya soé jé ô yené.

16 Ane be nga sulane be e vôm ba loone nkobô Hébre na, Armagédoñ.

17 E nyô zamgbwale a nga sôé ésua jé e ñyeme yôp. A beta tyiñ a nga so éto njôan a jôʼô na: E bobaneya.

18 Ane befeleves a metyiñ, a bezoʼoyañ a angôndô mfôʼôsane si ñwô ôte ô ngenan te tame boban avale te ane môt a tabe si nyô bi nga tôñ.

19 Ane beta tison a nga salane zañ bifase bilaa, a bitisone meyoñ bi nga ku.

20 Ane Zambe a nga simesan beta Babilôn, mfaʼa ya ve nye élaé e vôme woone yʼayaa dé a kundi! Ane bikôte bi mañ bise bi nga mate, a minkô mi nga jañ.

21 Beta metaʼa, adit ane betalañ, be nga ku bôt nyôl be soʼo yôp. A bôt be nga kobô Zambe ébiasé amu ébubua metaʼa, amu ébubua te é nga dañ ékowoñ.

© LʼAlliance Biblique du Cameroun, 2009

Bible Society of Cameroon
Lean sinn:



Sanasan