NLITAN 10 - Bible en langue Bulu

¹ A me nga yen éwôlô éngele éfe é soʼo yôp. E nga beʼe nkut , étôtok é nga bôman asu dé. Asu dé e mbe aval ane jôp, a mebo mé aval ane minsum mi nduan.

² A nga bili mone nkulane kalate e wo wé. A nga telé abo dé ya mbo nnôm e mañ, e di ya mbo ngale ke e si.

³ A nga kobô tyiñe ngu, aval ane ngbwengbwem ja bam. Eyoñ a nga bam, bezoʼoyañ zamgbwa be nga kuli metyiñe map.

⁴ Eyoñe bezoʼoyañ be maneya bam mbôlô me nga ye tili, me nga wôʼô tyiñ é soʼo yôp é jôʼô me na: Baʼaleʼe nsolane jame ya bezoʼoyañ zamgbwa, a te tili wô.

⁵ A éngele me nga yen a tele e mañ a si, a bete mbo nnôme yôp

⁶ a kane ngana a jôé nyô a too nnôm éto, nyô a nga té yôp a biôm bi nee été, si a biôme bi nee été, mañ a biôm bi nee été a jôʼô na: Nté éyoñ ô nji fe bo.

⁷ Ve melu ba ye wôʼô éngele zamgbwale a tatéʼé nloñane toñe jé, éyoñe te nsolane jame Zambe wo ye kpwaan, aval ane ô nga kateban e be bebo bisaé bé bekulu mejô.

⁸ A tyiñ me nga wôk é soʼo yôp é nga beta kobô ma é jôʼô na: Kele nyoñe nkulane kalate e wo éngele été, nye a tele mañ a si.

⁹ Me nga ke éngele bebé, a yeʼelane nye na a ve ma mone kalate. Nde a nga jô me na: Nyoñôk a di nye. A ye bo ayô e miñya miôé été, ve anyu dôé été a ye bo zam ane wôé!

¹⁰ Ane me nga nyoñe mone kalate e wo éngele, a di nye. Anyu dam été a mbe zam ane wôé. Ve éyoñ me diya nye miñya miam mi nga boban ayô.

¹¹ Ane be nga jô me na: Wo yiane beta kulu mejô e be bôt, e be meyoñe me bôt, minkobô a e be bejô bôt abui.