NLAÑANE BÔT 6 - Bible en langue Bulu

Atiñ asu Benazirieñ

¹ Ane Nti a nga kobô Môze na:

² Kobôʼô bone bʼIsraél a jô be na: Éyoñe fam nge minga ja kandan e bôte bevok a tyili émiene mam ma futi nye e nsamba Benazirieñ, asu ya ve émien e mboon ésaé Zambe,

³ a ye bo te nyu woon, nge bilam bi ne ngu; a ye bo te nyu woon a ne sañ nge bilam bi ne ngu bi too sañ; teke jôm ba nyu ja so bibuma bi ndiʼi woon a ye nyu, a a ye bo te di bibuma bi ndiʼi woon, toʼo bi ne nyumi nge nkôt.

⁴ Nté ôse a ye bo nazirieñ , a ye bo te di jôm éziñ ja so ndiʼi woon, ataté mefes a kui ékôp.

⁵ Nté ôse a ne nazirieñ , jôm ése ba tyembane je ja ye bo te lôt e nlô wé yôp, akekui éyoñ melu émien a nga tiñeti asu Nti me kpwaneya: a ye bo étyi, a ye jôʼé ésile ya nlô wé é yaé te tyiʼi je.

⁶ Nté ôse ya melu a nga tiñeti asu Nti, a ye bo te subu mbime bebé;

⁷ a ye bo te ve émiene mvin awu ésaa, nyia, monyañ nge kale jé amu a beʼe ntelan étyi Zambe wé e nlô wé.

⁸ Nté a ye bo nazirieñ , a ye bo étyi asu Nti.

⁹ Nge môt a wu nye e fefe atemetem, a nalé a bo na nlô wé ô bo te fe mfuban , e môse ya ntunane wé a ye tyembane nlô; a ye tyembane wô e môse zamgbwale.

¹⁰ E môse muam, a ye zu ve ntuni adu abaé, nge zum ébaé, anyiine nda éndelé bendôbaʼane.

¹¹ Ntuni a ye ve ônone wua ane étyiʼa ya njaman abé, a ônon ôvok ane mvean ô ne ngumba, a a ye bo mame ya bulu nsem asu môt ate amu awu te. A môt a ne nazirieñ a ye fubu nlô wé môs ôte.

¹² A ye beta telé éyoñ éfe ya éto nazirieñ asu Nti, a a ye ve ntômba ô ntoo mbu wua ane metunaʼa ya nkôman étom; melu a nga taté tabe nazirieñ ma ye bo te lañeban amu éto nazirieñ jé ya melu mvus é nga bili mvin.

¹³ Atiñe da fombô Benazirieñ nde di: éyoñe melu mé ya ntéléban étyi me kpwaneya, ba ye zuu nye anyiine nda éndelé bendôbaʼane.

¹⁴ A ye liti Nti mveane wé: ntômba ô ntoo mbu wua, ô too teke ayeñ, asu metunaʼa ya nlatane ngbwa;

¹⁵ mone nkoé belet é ne teke mvusan, akekebe biwôlé bi ne teke mvusan, bi too mmiamane mbon a mimvean miʼavut a woon mia tôñe mimveane metunaʼa.

¹⁶ Ntuni a ye liti mimveane mite ôsu Nti, a a ye ve étyi, a asu njaman abé, nalé fe mvean ô ne ngumba;

¹⁷ a ye ve Nti nnôme ntômba asu metunaʼa ya nlatane ngbwa, ô laté a nkoé belet é ne te mvusan; ntuni a ye suʼulane ve mimvean miʼavut a woon.

¹⁸ Eyoñe nazirieñ a ye tyeñe nlô wé anyiine nda éndelé bendôbaʼane; a ye nyoñ ésile ya nlô wé ô nga teléban étyi a futi je e nduan ja yôñ e metunaʼa ya nlatane ngbwa si.

¹⁹ Ntuni a ye nyoñe mbelan éname nnôme ntômba ya wo, nalé fe éwôlé é ne te mvusan e mone nkoé été, a ékekeb éwôlé é ne te mvusan. A ye bôé biôm bite e mo me nazirieñ a maneya tyembane nlô wé ô ne ntelan étyi.

²⁰ Ntuni a ye bo bie ndeñkolô ôsu Nti a jôme te é ntoo étyi, é ntoo jôme Ntuni avale fe anʼôngône ba ve a éname ya abé ba vaa. Ataté éyoñe te nje nazirieñ a ntoo nyu woon.

²¹ Atiñe nazirieñ a ve ntiñetan nde le; mvean a ve Nti amu éto nazirieñ jé ñwô fe le; a ne ve biôme bife nge a bili ngu; ve a yiane ve jôm a nga tiñeti avale atiñe ya nazirieñ é né.

Bifia ya botane bôt

²² Ane Nti a nga kobô Môze na:

²³ Kobôʼô Aron a bone bé na: Mia ye botane bone bʼIsraél a jô be na:

²⁴ Nti a botaʼane wo a a baʼaleʼe wo!

²⁵ Nti a faé éfufup ya asu dé be wo, a mvamaʼane wo!

²⁶ A beteʼe asu dé e be wo a ve wo mvoʼé !

²⁷ Avale di nde ba ye tote jôé dam asu ya botane bone bʼIsraél, a Mamien ma ye ve be ébotane jam.