NLAÑANE BÔT 5 - Bible en langue Bulu

Ntitane bôt be ne mvin

¹ Nti a nga kobô Môze na:

² Bendéʼé bone bʼIsraél na, be titane nzezam ôse ô kôlô minkan, nalé fe nyô ase a kon ôkon éziñ e biôm bi fam nge minga, nge na a ntoo mvin amu nnambane mbim.

³ Toʼo fam nge minga mia ye titane be minkan, amu be za ve minkan mi bo mvin.

⁴ Nde bone bʼIsraél be nga bo nalé. Be nga titane mevale me bôte mete minkan: be nga bo avale Nti a nga jô môze.

⁵ Nti a nga beta kobô Môze na:

⁶ Kobôʼô bone bʼIsraél na: Nge fam nge minga a bo e môte mboʼo abé da ya mebé môt a ne bo émien, a a nji fe bo zôsôôô e mise me Zambe, a a ve fe émiene mekua,

⁷ môt ate a ye mem abé a te bo, a bulane fe jôm a te nyoñ e be môt émien a nee je a abet e too e ngabe tañe ya tañe jôme te ja kui.

⁸ Nge môt a ne jôme te a wuya te liʼi môt éziñ e nda bôte jé a too nyô a yiane nyoñe ntañe te, jôme te ja ye veban e be Nti, nalé a ne na e be ntuni . E môt a nga sebʼétom a ye fe ve nnôme ntômba asu metunaʼa ya njaman ya abé dé: éyoñe te ntuni a ye bo bisaé ya njaman abé mfaʼa wé.

⁹ E ngabʼése ba vaa e mvean ô nʼétyi ñwô bone bʼIsraél ba ve, ngab éte é ne asu ntuni .

¹⁰ Jôm ése môt a telé étyi, ba kalane je ntuni a jôm ése môt a ve ntuni , ntuni a ne nyoñe je é bo énjé.

Atiñ da fombô minga ba nyiñe ajô mejian

¹¹ Nti a nga kobô Môze na:

¹² Kobôʼô bone bʼIsraél a jô be na: Nge fam é bili minga, a minga ate a bo nnôm bijabô,

¹³ vôme fame fe ja jôʼôbô nye asoé, nnôm te yem, nnôm a nji bi ndem amu ngaa éziñ a nji bo, a môt éziñ a nji dilane nye,

¹⁴ ve nnôm a soʼosane nye mfaʼa ya ntabane wé. E ne fe kui na fam ja simesane na ngal a boya mejian , ve nalé a too momo.

¹⁵ Fam éte ja ye zuu ngal e be ntuni a bili mvean asu ngal ate: kili avute fôn éla. A ye bo te sôé mbon avute te yôp nge sôé menyum, amu mvean ôte ô ne asu minsoʼosan ya abé éziñ da yiane kuliban atan.

¹⁶ Ntuni a ye bo na a subu bebé a tebe tetele e mise me Nti.

¹⁷ Ntuni a ye nyoñe mendim me nʼétyi e vieʼe tyia été, a ye nyoñe mbuluk e si ya tabernakel a futi wô e mendim été.

¹⁸ Ntuni a ye bo na minga ate a tebe tetele e mise me Nti, a ye vaa jôm é butu nye nlô, éyoñe te a kee nye mveane ya ésoman, nalé a ne na, mvean ya zes ñwô ô nga veban amu minsoʼosan mi nnôm. Ntuni émien a ye bi mendim me nʼayô ma soo biyoʼé.

¹⁹ A ye yemete minga ate na ba nye be tote bifia bina na: Nge e nji ke bo bebela na mia fam mia te jôʼôbô, a na ô maneya samele womien amu meduʼan wo te duʼu nyo nnôm, biyoʼé mendim me nʼayôle ma soo me me boʼo te nnambe wo.

²⁰ Ve nge ô maneya samele womien a duʼu nyo nnôm, nge fame fe é maneya jôʼôbô wo,

²¹ Nti a vaʼa wo melep : a boʼo wo nkôkôm, a bo na abume dôé e vus, nalé bôte ya si jôé ba ye nyoñe wo anʼéveʼelaʼa éyoñ ba tot ajô biyoʼé;

²² Mendim ma soo biyoʼé ma me nyiʼine wo e miñya a vuse wo abum a bo wo nkôkôm. Wôna minga ate a ye yalane na Amen! Ya, é boʼo nalé!

²³ Ntuni a ye baʼale bifia ya biyoʼé bite ntilan, a ye dube jôm é ntoo ntilane te mendim me nʼayôle mete asu ya tyame bifia bite.

²⁴ Eyoñ a ngenan te kalane minga mendim mete na me nyiʼine nye e miñya ,

²⁵ ntuni a ye taté beta nyoñe mveane ya ésoman e mo mé a liti wô Nti a mboone jame ya nlitan, éyoñe te a zuu wô ataʼa metunaʼa.

²⁶ A ye kandé mveane te tañe ngum akule wo ane jam ya simesan, a diʼi wô ataʼa metunaʼa yôp. Mvus éte, a ye bendé minga na a nyu mendim.

²⁷ Eyoñ a ye nyu me, avale di nde da ye boban: nge minga a nga samele foʼo émien a bo nnôm bijabô, mendim me nʼayô ma soo biyoʼé ma ye nyiine nye e miñya a vusu nye abum, a bo nye nkôkôm. Ataté éyoñe te bôte ya si jé ba ye tote nye ane éfunan éyoñe ba tote bifia biyoʼé.

²⁸ Ve nge minga a nji ke samele émien, nge a nji bo mekua, biyoʼé bia ye bo te kui be nye a a ne nguleya biaé bon .

²⁹ Atiñ da fombô bisoman nde le. Atiñe te e ne asu minga a wulu abé , nyô a samele émien éyoñ a bo nnôm bijabô,

³⁰ nge na nyô nnôm a soʼosane mbia dulu, nnôm a telé ngal e mbôñ ajô e mise me Nti, a ntuni nye a bo mam mese yʼété.

³¹ Nnôm a abé dé nge a bili foʼo mekua.