NLAÑANE BÔT 4 - Bible en langue Bulu

Bisaé bone be Lévi

¹ Nti a nga kobô Môze a Aron a jô na:

² Lañe bone be Kehat tañ ézezañe ya bone be Lévi avale mebum a menda me bôte map me né,

³ ataté mimbu mewôm mela a ke ôsu a kui mimbu mewôm metan, ba bese ba yiane bo ésaé éziñ e nda éndelé bendôbaʼane.

⁴ Esaé bone be Kehat be nga yiane bo e nda éndelé bendôbaʼane nje ji, ésaé ja fombô jôm ése ja dañ étyi.

⁵ Eyoñe bone bʼIsraél ba ye taté dulu, Aron a bone bé ba ye taté vaa éyé é tyele e zañe tabernakel a buti je éwolo élate yôp;

⁶ ba ye buti ékôb abañ éyé te yôp, a yalé éndelé éfe yôp é too nyôle blum e vôm ase; ba ye suʼulane some mimbôñe mi éwolo élat.

⁷ Ba ye beté éndelé é ne nyôle blum e tawôlô belet yʼétyi ja bebe, a telé bone bisua bilaé, bidoʼo bisua a bone mekob asu mmiamane beôlobinda été yôp;

⁸ Ba ye yalé évele éndelé e biôm bite yôp a suʼulane buti mfinga bikôb bi abañ été yôp; ba ye suʼulane some mimbôñe ya tawôlô.

⁹ Ba ye nyoñ éndelé é ne blum a buti je ébi bifufub asu éfufup, belambe bé, mebase mé ya dim éfufup, bikutan asube bié a mevieʼe me mbon me ne asu ésaé jé;

¹⁰ Ba ye vuluku ébi bifufube te a biôme mebelane bié bise e mfinga bikôb biʼabañ été a beté je ôlañe yôp.

¹¹ Ba ye buti éndelé é ne blum ataʼa metunaʼa e ne mboon a or yôp a vuluku de ékôb abañ été; éyoñe te ba suʼulane futi mimbôñe mié.

¹² Ba ye nyoñe biôme mebelane bise ya nda yʼétyi, a futi bie éndelé é ne nyôle blum été, éyoñe te ba suʼulane futi bie ôlañ été.

¹³ Ba ye vaa asube ya ataʼa metunaʼa a beté éndelé é ne nyôle mfô été yôp;

¹⁴ Ba ye beté biôm mebelan bise yʼété yôp; metyeʼe me nduan, bilum, bisobelé a bilaé, biôm mebelan bise yʼataʼa metunaʼa, ba ye buti ékôb abañ été yôp, mvus éte, ba ye suʼulane futi mimbôñe yʼataʼa metunaʼa.

¹⁵ Eyoñ Aron a bone bé be maneya buti jôm ése é nʼétyi, a biôm mebelan bise ya vôm a nʼétyi, bone be Kehat ba ye beʼe bie éyoñ awolo ya kôlô e kpwaneya. Ve ba ye bo te nnambe jôm é nʼétyi, be za viane wu. Esaé bone be Kehat, e nda éndelé bendôbaʼane, nje le.

¹⁶ Eléazar e mone Aron ntuni , nye a ye baʼale mbon ba futi e belambe yʼébi bifufup, ôlobinda a nyume mvaé, mveane ya mefup bôt ba ve éyoñ ése a mbon ba woʼo bôt éyoñ ba telébane bito; a ye baʼale tabernakel ase a jôm ése é nʼété, vôm yʼété a biôme mebelane bié bise.

¹⁷ Ane Nti a nga kobô Môze a Aron na:

¹⁸ Wo ye baʼale e jame di na, mebum me bôt me bone be Kehat me tabe kom ése ézezañe bone be Lévi bevoʼo été,

¹⁹ nde ba ye bo te wu, nge ba nnambe biôm bi nʼétyi. Ajô te mia ye bo avale di: Wo Aron a bone bôé, mia ye kee môt ase ya be be e vôme wé a liti nye e jam a yiane bo nge jôm a yiane beʼe.

²⁰ Ajô te ba ye bo te fombô toʼo ve monʼétun éyoñ, biôm bi ne ntelan étyi, nalé a za dutu be awu.

Bone be Gerson

²¹ Nti a nga kobô Môze na:

²² Lañe fe tañe bone be Gerson avale mebum a menda me bôte map me né;

²³ wo ye lañe be ataté mimbu mewôm mela a ke ôsu a kui mimbu mewôm metan, e nda bendôbaʼane.

²⁴ Esaé bone be Gerson, ésaé jap a mbeʼe wop mbie bi:

²⁵ ba ye beʼe bindelé ya tabernakel a nda éndelé bendôbaʼane, ébutaʼa bikôbe beyôm mintômba jé a ji ékôp ja yalé ngume tabernakel ôse, éndelé ja tyebe anyiine nda éndelé,

²⁶ a bindelé bi tyele mfaʼa ya nseñ a éndelé ya anyiine mimbé ya nseñ mbômaʼan a tabernakel a ataʼa metunaʼa, minkole miap a biôme mebelane biap bise. Ba ye fe bo bisaé bise yʼété.

²⁷ Aron a bone be Gerson: mbeʼane biôm a bisaé bivoʼo bise ba yiane bo. Aron a bone bé mbe ba ye kate be jam ba yiane bo a jôm ba yiane beʼe.

²⁸ Esaé menda me bôte ya bone be Gerson ba yiane bo e nda éndelé bendôbaʼane nje le, nalé fe biôm ba yiane baʼale. Itamar e mone Aron ntuni nye a ye bo évete jap.

²⁹ Wo ye lañe bone be Merari ane mebume map me né a ane menda me bôte map me né;

³⁰ wo ye lañ ataté bôt be ne mimbu mewôm mela akui mewôm metan, ba bese be ntoo nguleya saé e nda éndelé bendôbaʼane.

³¹ Biôm ba yiane baʼale mfaʼa ésaé ya nda éndelé bendôbaʼane mbie bi: bityimbi ya tabernakel , mimbôñ, mekôn a metine ya été;

³² mekôn ma bômane nseñ, metine map a mefanaʼa map, minkole miap, biôm mebelan bise yʼété a jôm ése é ne ntelan mfaʼa ya ésaé jap. Mia ye ve môt ase biôm a yiane baʼale.

³³ Esaé mvôʼô Merari nje le: ésaé jap ése ya nda éndelé bendôbaʼane, Itamar e mon Aron ntuni a too ntebʼôsu wop.

³⁴ Môze, Aron a bivete bi bôt be nga lañe bone be Kehat, ane mebum a menda me bôte map me né.

³⁵ Ba bese be mbe nguleya saé e nda éndelé bendôbaʼane be too mimbu mewôm mela a lôte valé, a kui mimbu mewôm metan.

³⁶ Ba be nga lañeban avale mebume map me né be mbe toyini ébaé, mintete zamgbwa a mewôm metan.

³⁷ Bôte bese be nga lañeban e mvôʼô Kehat mbe le, bese be nga saé e nda éndelé bendôbaʼan. Môze a Aron be nga lañe be avale Nti a nga bendé Môze.

³⁸ Bone be Gerson be nga lañeban avale mebume map a menda me bôte map me né,

³⁹ ataté mimbu mewôm mela alôte valé, a kui mimbu mewôm metan, ba bese be mbe nguleya saé e nda éndelé bendôbaʼane.

⁴⁰ Ba be nga lañeban avale mebume map a menda me bôte map me né, be mbe toyini ébaé, mintete misaman a mewôm mela.

⁴¹ Bôte ya mvôʼô Gerson be nga lañeban mbe le. Bese be nga saé nda éndelé bendôbaʼane. Môze baʼAron be nga lañe be avale Nti a nga bendé Môze.

⁴² Bôte ya mebum me bone be Merari be nga lañeban, avale mebum a menda me bôte map me né,

⁴³ ataté mimbu mewôm mela alôte valé, a kui mimbu mewôm metan, ba bese be mbe nguleya saé e nda éndelé bendôbaʼane,

⁴⁴ ba be nga lañeban avale mebume map me né be mbe toyini éla a mintete mibaé.

⁴⁵ Bôte be nga lañeban e mvôʼô Merari mbe le. Môze a Aron be nga lañe be avale Nti a nga bendé Môze.

⁴⁶ E bôte bese ya mvôʼô Lévi mbe Môze, Aron a bivete yʼIsraél be nga lañ, avale mebum a menda me bôte map me né,

⁴⁷ ataté mimbu mewôm mela a lôte valé, a kui mimbu mewôm metan, be too nguleya bo ésaé bevolô a bebeʼe biôme ya nda éndelé bendôbaʼane,

⁴⁸ be mbe toyini muam, mintete mitan a mewôme muam.

⁴⁹ Be nga lañe be avale Nti a nga bendé Môze, môt ase a bili ésaé jé a mbeʼe wé.