NLAÑANE BÔT 36 - Bible en langue Bulu

Bengon ba nyoñe bilik be nji yiane ke meluk atane ya meyoñe map

¹ Bivete menda me bôte ya mebum me bone be Galad, e mone Makir, e mone Manasé, ya mvôʼô Yôsep, bi nga zu a kobô asu Môze, benya bôtô a bivete ya menda me bôt me bone bʼIsraél na:

² Zambe a nga bendé nti wome na, a kabe si mengap a mboon asimba e be bone bʼIsraél. Nti wom a nga nyoñe fe abendé na, a ve e ngabe Selôfad monyañe wongan, e be bobebinga bé.

³ Nge ba ke meluk e be monafame wua ya meyoñe mefe yʼIsraél, ngabe jap ja ye vas éliʼi bʼésaa bangan a ke lat a ayoñ e ntoo éndap; éyoñe te ngabe jangan é nga zu e be bia a mboon asimba ja ye séʼéban.

⁴ A éyoñe mbu mevak wo ye so asu bone bʼIsraél, ngabe jap ja ye kôʼôlane nyô ya ayoñ e ntoo éndap a vas akabe ya ayoñe bʼésaa bangan.

⁵ Nde Môze a nga kalane bone bʼIsraél mebendé Nti a nga ve na:

⁶ Ayoñe bone be Yôsep da bele. Avale di nde Nti a bendé bengone be Selôfad: be ne fili ya luʼu môt ase ba kômbô luk ve da ba yiane ke meluk abume da ya ayoñ ésaa wop.

⁷ Ngab éliʼi éziñ ya bone bʼIsraél ja ye bo te kôlô ayoñe di a ke ayoñ afe, ve bone bʼIsraél ba ye timbi, môt ase a ngab éliʼi ayoñe bʼésaa.

⁸ Ngone minga ése é bili ngab élik e meyoñe ya bone bʼIsraél, a ye luʼu môte ya abume bôt da ya ayoñ ésaa, éyoñe te bone bʼIsraél ba ye bi, môt ase, ngab éliʼi ya bʼésaa.

⁹ Teke ngab éliʼi éziñ ja ye kôlô ayoñe di a ke ayoñ afe, ve meyoñ yʼIsraél ma ye timbi, ayoñ ese, a éliʼi jé.

¹⁰ Ajô te bengone be Selôfad be nga bo avale Nti a nga bendé Môze,

¹¹ Mala, Tirsa, Ogla, Milka a Nôa, bengone be Selôfad, be nga luʼu bobefam e be bendômenyañe bap;

¹² be nga ke meluk e mebume me bone be Manasé, e mone Yôsep, a ngab éliʼi jap é nga tabe ayoñe ya nda abume bôt ésaa wop.

¹³ Mebendé a minjôan Nti a nga ve Israél a anyu Môze e minjeʼese ya Môab, bebé a Yordan, zôsôôô a Yérikô mbie le.