NLAÑANE BÔT 31 - Bible en langue Bulu

Israél a dañe bôte ya Madian

¹ Ane Nti a nga kobô Môze a jô na:

² Kele yaa bôte ya Madian, amu abé be nga bo bone bʼIsraél. Eyoñ ô maneya bo jame te nje wo ye kôlô émo ji.

³ Nde Môze a nga jô bôte na: Bôte bʼéziñe ya be mia ba yiane nyoñe menga a ke wosane bôte ya Madian, nalé mia ye ve be melebe Nti a nga tiñeti be.

⁴ Ajô te tobane toyina bôt ayoñ ese.

⁵ Ane be nga top e minsamba mewosane ya Israél, ayoñ ese bôte toyini, nde bezimbi bese be nga kui toyini awôm a ébaé.

⁶ Môze a nga lôme be mewosan, baa be Finéas e mone ntuni Eléazar be nga ke. Finéas a nga kee biôm bi nʼétyi a metoñ asu ya ve ayemé ya ntatane bita.

⁷ Ane be nga wosane bôte ya Madian avale Nti a nga bendé Môze, ane be nga wôé befam bese.

⁸ Be nga wôé fe bejô bôte betane ya Madian: Evi, Rékém, Sur, Ur, a Réba, nalé fe Balam e mone Béor.

⁹ Be nga bi binga a bongô ya Madian mimbôk, a nyoñe betite bap ba belane be mfaʼa ya bisaé, nalé fe mimbame biyeme miap a akume dab ese.

¹⁰ Be nga diʼi bitisone biap a minkane miap,

¹¹ nde be nga ke a biôme ya nsa, bôt a betit be nga mane wôlé.

¹² Be nga kee biôm bise e minkan mi mbe minjeʼese ya Môab, bebé e Yordan, zôsôôô a Yérikô, asu ya liti bie Môze, ntuni Eléazar a ékôane bôt ése yʼIsraél.

¹³ Ane Môze, Eléazar a bivete bivoʼo bise, be nga kui atan a ke tôbane be.

¹⁴ Môze a nga yaa bivete ya minsamba mewosan a minkane bita bi nga so mewosane mete:

¹⁵ jia! Amu jé mi nga liʼi binga bevevee!

¹⁶ Mia tuʼa yeme na, binga ya Madian mbe be nga nyoñe melep e be Balam mfaʼa ya tindi bone bʼIsraél na, be bo abé e nʼangôndô e mise me Nti, éyoñ ajô Péor é nga boban; a mia yeme na mvus éte nje ébubua é nga kui e be bôte be Nti.

¹⁷ Ajô te a ntoo ve wôane bobefam a e binga bese be nga ke meluk.

¹⁸ Ve mi ne baʼale asu denan bengone be binga bese be ngenane bindun.

¹⁹ E bôte bese ya be mia be nga wôé môt éziñ, nge nnambe mbim ba yiane tabe melu zamgbwa e minkan atan; ba ye tune bebien e môse lale a e môse zamgbwale. Abendé te da fombô fe mimbôʼô mienan mi ne binga.

²⁰ Mia ye tune mengômesane menan, a biôme bise bi ne mboon a ékôp, nge a mimvote mi ékela nge a élé.

Nkabane biôme ya nsa

²¹ Ane ntuni Eléazar a nga jô bezimbi be nga ke bita na: Atiñe Nti a nga bendé Môze da jô na:

²² or, argent, mvot, étyé, afiti a ékpwembé,

²³ jôm ése é ne ke e nduan, mia ye wua je nduan, nalé ja ye bo mfuban . Jôm ése é se nguleya ke e nduan, mia ye fubu je a mendim me ne nkômane ya bo ésaé te. Jôm ése ja dik mia ye bo foʼo ve dube je mendim.

²⁴ Eyoñe mi maneya sôbe mengômesane menan e môse zamgbwale, mia ye bo mfuban a éyoñe te mia ye bulane minkan.

²⁵ Ane Nti a nga jô Môze na:

²⁶ Mia Eléazar a bivete ya menda me bôte yʼIsraél, mia ye lañe biôm bise mi nga bi: bôt a betit.

²⁷ Eyoñe te wo ye kabe bie ngab ébaé abime da. Ngabe jia asu bôt be nga ke bita, nyô fok asu bôte bevoʼo bese.

²⁸ E ngap é ne asu bôt be nga wosan, wo ye vaa ngabe jam été: môte wua e bôte mintete mitan été, a tite jia e betite mintete mitan été: ataté benyak, bijakas, mintômba a kui bikela.

²⁹ Biôm bise wo ye vaa nalé asu dam, wo ye kalane bie ntuni Eléazar.

³⁰ E ngap é ne asu bôte bevoʼo yʼIsraél, wo ye vaa môte wua e bôte mewôme metan été, a tite jia e tite mewôme metan été: ataté benyak, bijakas, mintômba a kui bikela a betite bevok, a wo ye kalane biôme bite, bone be Lévi ba bo ésaé e nda jam é nʼétyi.

³¹ Ane Môze a Eléazar be nga bo avale Nti a nga bendé Môze.

³² E biôme ya nsa bewosan be nga nyoñ e be besiñ, mintômba a bikela be nga liʼi toyini mintete misaman, mewôme zamgbwa a étan;

³³ benyak toyini mewôme zamgbwa a ébaé;

³⁴ bijakas toyini mewôm mesaman a jia,

³⁵ bengone be binga be ngenane bindun: toyini mewôm mela a bebaé.

³⁶ E ngap be nga ve bôte mewosan é mbe avale di: mintômba a bikela toyini mintete mila, mewôm mela a zamgbwa a mintete mitan;

³⁷ be nga vaa mintômba a bikela mintete misaman, mewôme zamgbwa a bitan asu Nti;

³⁸ benyak be mbe toyini mewôm mela a ésaman, mewôme zamgbwa a ébaé é too asu Nti;

³⁹ bijakase toyini mewôm mela a mintete mitan, bijakase mewôm mesaman a jia bi too asu Nti;

⁴⁰ bôte toyini awôm a ésaman, mewôm mela a bebaé be too asu Nti.

⁴¹ Ane Môze a nga kalane ntuni Eléazar e ngap be nga vaa asu Nti, avale njôan ô mbe.

⁴² E ngap é mbe asu bone bʼIsraél bevoʼo bese é mbe fe abima nyô bôte mewosan be nga nyoñ,

⁴³ é mbe mintômba a bikela toyini mintete mila, mewôm mela a zamgbwa a mintete mitan,

⁴⁴ benyaʼa mewôm mela a besaman,

⁴⁵ bijakase toyini mewôm mela a mintete mitan

⁴⁶ a bôt toyini awôm a ésaman.

⁴⁷ E ngabe bone bʼIsraél, Môze a nga vaa môte wua e bôte mewôm metan été a tite jia e betite mewôm metan été. A avalʼane Nti a nga bendé nye, a nga kalane bie bone be Lévi ba bo ésaé e nda Nti.

⁴⁸ Ane bivete betoyini minsamba mewosan, bivete betoyini a bi ya mintet be nga zu be Môze

⁴⁹ a jô nye na: Bi maneya lañe bôte mewosan be ne éjôé jangane si, a môt éziñ a nji jeñeban été.

⁵⁰ Ajô te bia ve mimvean asu Nti, nalé binyiñe biangan bia ye bo te jañ; môt ase ya be bia a ve biôm bi ne mboon a or a te yen: bone bengôkop, mekom, bilondo, bimvoñga a minsanga.

⁵¹ Ane Môze a ntuni Eléazar be nga nyoñe biôme bi or bite e mo map.

⁵² Biôm bise bivete ya minkane bita be nga ve Nti bi mbe bebé kili ntet a mewôme zamgbwa.

⁵³ Zesé bezimbi é nga baʼale, môt ase jôme ya nsa jé asu dé émien.

⁵⁴ Môze ba ntuni , Eléazar be nga bôôé biôme bi or bise bivete mewosan be nga ve e nda éndelé bendôbaʼane, nalé Nti a ye bo te vuane bone bʼIsraél.