NLAÑANE BÔT 3 - Bible en langue Bulu

Elañe bôt a bisaé bone be Lévi

¹ Mvoñe bôt Aron a Môze, melu Nti a nga kobô Môze e nkôle Sinayi yôp nje nyô.

² Biyôlé bi bone bʼAron: Nadab, ntô, Abiyu, Eléazar a Itamar.

³ Be nga teléban étyi ane betuni, be taté fe mboon ésaé.

⁴ Ve Nadab a Abiyu be nga wu e mise me Nti, e nkôte si ya Sinayi; be nji ke biaé. Eléazar ba Itamar be nga bo ésaé yʼétyi, Aror ésaa wop a too be évet.

⁵ Ane Nti a nga kobô Môze na:

⁶ Loʼone bone be Lévi, a futi be éjôé Arone si be bo ma ésaé.

⁷ Ba ye bo ésaé jap ôsu ya nda éndelé bendôbaʼan, be volôʼô Aron a ngume nsamba bôt ôse yʼIsraél, ba ye bo bisaé bia fombô vôm a nʼétyi.

⁸ Ba ye baʼale biôm mebelan bise ya nda éndelé bendôbaʼan a biôme bone bʼIsraél ba yiane baʼale.

⁹ Wo ye ve bone bʼIsraél e bʼAron a bone bé; ba ye veban e be be señe ya bone bʼIsraél bese.

¹⁰ Wo ye bendé Aron ba be bone bé na, be baʼale bisaé biabe yʼétyi; môt ase a ne nneñ a ye subu bebé vôm a nʼétyi, a ye wôéban.

¹¹ Ane Nti a nga kobô Môze na:

¹² Me nyoñeya bone be Lévi Israél été, e señe ya mintôle ya bone bʼIsraél, ajô te bone bʼIsraél ba ye bo émbam.

¹³ Amu ntôl ôse wo taté bialé ô ne éñwom; e môse me nga wôé mintôle mise yʼEjipte, ñwô me nga telé mintôle mise yʼIsraél étyi e mfaʼa wom: ataté mi ya bôt a kui mi ya betit, mia ye bo émiam, ma me ne Nti.

Elañe bôt ôsu ya bone be Lévi

¹⁴ Nti a nga kobô Môze e nkôte si ya Sinayi a jô na:

¹⁵ Lañe bone be Lévi avale menda me bôt a mebume map me né; wo ye lañe befam bese, ataté ngone jia a ke ôsu.

¹⁶ Nde Môze a nga lañe be avale Nti a nga bendé, avale Môze a nga nyoñ abendé.

¹⁷ Biyôlé bi bone be Lévi bi: Gerson, Kehat a Merari.

¹⁸ Bone be Gerson ane mebume map me né:

¹⁹ Amram, Yisehar, Ebroñ a Uziél;

²⁰ bone be mérari ane mebume map me né: Mali a Musi. Mebum me Lévi mme le, ane menda me bôte map me né.

²¹ Mebume Libni a Simeyi ma téé e be Gerson: ajô te be ne mebume ya be Gerson.

²² Ba be nga lañeban, befam bese ataté ngone jia a ke ôsu, be mbe toyini zamgbwa a mintete mitan.

²³ Mebume me Gerson me nga vule minkan e mvuse tabernakel e mfaʼa jôp da dim.

²⁴ Evete jap é mbe Eliasaf e mone Laél.

²⁵ E nda éndelé bendôbaʼane, be nga ve bone be Gerson be baʼale biôm avale di: nda été a atan, ébutaʼa ja buti nda ése, éndelé ja tyebe anyiine nda ,

²⁶ biyé asu mimfine ya nseñ; éndelé anyiine ya nseñ; mbômaʼane tabernakel a nyô ya ataʼa metunaʼa a minkole mise ya nda éndelé: mbe be nga yiane baʼale biôm bite bise.

²⁷ Bone be Amram: Yisehari, Ebroñ a Uziél ba so e be Kehat.

²⁸ Befam bese ataté ngone jia a ke ôsu, be mbe toyini muam a mintete misaman. Be nga bo ésaé ya baʼale biôm bi nʼétyi.

²⁹ Mebume me bone be Kéhat me nga vule minkan e tabernakel e mfaʼa ya nké.

³⁰ Evete jap é mbe Elisafam e mone Uziél.

³¹ Be nga baʼale éwolo élat, e tawôlô ba beté belet é nʼétyi, ébi bifufup, metaʼa metunaʼa, biôm ba boo bie ésaé e vôm a nʼétyi, éyé ya e zañe tabernakel a biôme bise yʼété.

³² Evete bivet e bone be Lévi été é mbe Eléazar e mone Aron Ntuni; a nga bo ésaé ya fombô e ba be mbe be baʼaleʼe vôme yʼétyi.

³³ Mebume Mali a Musi ma so e bone be Merari.

³⁴ Befam bese be nga lañeban ataté ngone jia a ke ôsu be mbe toyini ésaman a mintete mibaé.

³⁵ Evete jap é mbe Turiél e mone Abihayil. Be nga vule minkan e tabernakel akôé.

³⁶ Bone be Merari be nga baʼale mebame ya tabernakel , mimbôñe mié, mekône mé a metine mé, biôme mebelane bié a biôm bife bise bi tii a tabernakel .

³⁷ Be nga baʼale fe mekône ya nseñ mbômaʼane tine jap, mefanaʼa map a minkole miap.

³⁸ Môze, Aron a bone bé be nga vule minkan ôsu tabernakel mfaʼa jôp da tôô; be nga baʼale vôme yʼétyi e señe bone bʼIsraél, môt ase a ye veʼele subu bebé vôm yʼétyi te na a ne môte ya nda bôte betuni a nga ye foʼo wôéban.

³⁹ E bone be Lévi bese Môze a Aron be nga lañ, avale Nti a nga bendé, ane mebume map me né, befam bese ataté ngone jia a ke ôsu, be mbe toyini mewôm mebaé a ébaé.

Nkôtane mintôle mise

⁴⁰ Ane Nti a nga jô Môze na: Lañe mintôle mi ne befam e bone bʼIsraél été, ataté ngone jia a ke ôsu; éyoñe te wo tili mie e ngume vôm avale biyôlé biap bi né.

⁴¹ Bone be Lévi ba ye bo e mfaʼa wome mamien, e señe mintôle mise ya bone bʼisraél, avale te fe mimbame biyeme miap éjiane mintôle biyem mise mi bone bʼIsraél.

⁴² Nde Môze a nga lañe mintôle mise ya bone bʼIsraél avale Nti a nga bendé nye.

⁴³ Mintôle befam be nga lañ, ane môé map me né, ataté ngone jia a ke ôsu, mise mi mbe toyini mewôm mebaé a ébaé, mintete mibaé, mewôme zamgbwa a mila.

⁴⁴ Nde Nti a nga kobô Môze na:

⁴⁵ Nyoñe bone be Lévi éjiane mintôle mise ya bone bʼIsraél, nalé fe mimbame biyem mi bone be Lévi éjiane ya mimbame miap; bone be Lévi be nʼémbam: ma me ne Nti.

⁴⁶ Asu ya kôté mintôle mi bone mintete mibaé, mewôme zamgbwa a mila ya bone bʼIsraél ba dañe bone be Lévi,

⁴⁷ Wo ye nyoñe bifase bi sikel bitan e nlô ya môt ase. Wo ye nyoñe bie ane sikel ya vôme yʼétyi a né, nye a ne begram awôm.

⁴⁸ Eyoñe te wo ye kalan Aron a bone bé moné ate asu ya kôté e tañe bôt bone bʼIsraél ba dañe bone be Lévi.

⁴⁹ Ane Môze a nga nyoñe moné asu ya kôté e bôte bone be Lévi be nji bo nguleya tyendé.

⁵⁰ A nga nyoñe moné asu mintôle mi bone yʼIsraél mite, tañe besikel toyini jia, mintete mila, mewôm mesaman a betan, avale sikel ya vôm yʼétyi a né.

⁵¹ Eyoñe te a nga kalane nye e mo mʼAron a bone bé avale Nti a nga bendé nye.