NLAÑANE BÔT 29 - Bible en langue Bulu

Abôʼô mfefé mbu asu nkañane Zambe

¹ E ngone zamgbwale é too alu da, mia ye sulan asu ya kañe Nti. Mia ye bo te bo ésaé éziñe ya bisaé bienan ya môs ôse, amu ô ne mia môse ya nloñane metoñ.

² Mia ye ve Nti nnôm nyaʼa wua, nnôme ntômba wua a bitoñe mintômba zamgbwa asu mimvean mi ne ngumba, mi too mbamba menyum e be Nti.

³ Mia ye fe ve avut, mfuʼan a mbon: kili ébu asu nnôme nyak, kili ésaman asu nnôme ntômba,

⁴ a kili éla asu étoñe ntômba ése.

⁵ Nnôm ékela wua, asu njaman abé: éyoñe te mbulane nsem wo ye boban asu denan.

⁶ Mimveane mite mise mia ye veban te lañe mveane ya môs ôse ô ne ngumba a mimvean mi ne ngumba ya môs ôsu ya ngon, a mimvean mi avut a mi mi woon. Nti Emien a ye wôʼô mbamba menyum yʼété mvaé.

Môse ya beta njaman

⁷ E Ngone zamgbwale nyô é too melu awôm, mia ye sulan asu ya kañe ma, mia ye tyi bidi a bo teke bo ésaé.

⁸ Mia ye ve Nti mimvean mi ne ngumba, mi too mbamba menyum: nnôm nyaʼa wua, nnôme ntômba wua, a bitoñe mintômba zamgbwa bi ne mbu wua, biôm bite bise bi too tekʼayeñ.

⁹ Tit ése ja ye veban, a mvean avut mfuʼan a mbon: kili ébu asu nnôme nyak, kili ésaman asu nnôme ntômba,

¹⁰ kili éla asu étoñe ntômba ése.

¹¹ Mia ye fe ve nnôm ékela asu ya nyoñe njaman . Mimvean mite mise mia ye veban ane metunaʼa ma veban asu njaman abé ya môs ôte, ñwô ô ne beta môse ya njaman abé, te lañe fe mimvean mi ne ngumba mia vebane môs ôse, a mimvean mi avut a woon.

Abôʼô menda bindelé

¹² E ngone zamgbwale é too melu awôm a metan, mia ye sulan asu ya kañe Nti, a mia ye bo te bo ésaé éziñ ya bisaé mi wôʼô bo. Mia ye jem abôk tañe melu zamgbwa asu Nti.

¹³ E môs ôsu mia ye ve nye mimvean mia diʼibane nduan, mi too mbamba menyum e mfaʼa Nti: beyôm benyak awôm a belaa, beyôm mintômba bebaé, bitoñ mintômba bi ne mbu wua awôm a binyin, biôm bite bise bi too ne selem.

¹⁴ Tit ése ja ye veban a mvean avut, mfuʼan a mbon: kili ébu asu beyôm benyaʼa awôm a belaa; kili ésaman asu nnôme ntômba ase,

¹⁵ a kili éla asu étoñ ése ya bitoñ mintômba awôm a binyin.

¹⁶ Mia ye fe ve nnôm ékela asu metunaʼa ya nyoñe njaman . Mimvean mite mise mia ye bebe e mimvean mi ne ngumba ya môs ôse yôp a mimvean mi avut a woon.

¹⁷ E môse baa, mia ye ve bitoñ beyôm benyaʼa awôm a bibaé, beyôm mintômba bebaé a bitoñ mintômba awôm a binyin bi ne te kʼayeñ,

¹⁸ a mimvean mi woon asu beyôm benyak, beyôm mintômba a bitoñ mintômba, avale tañe jap é né, a avalʼane mvinda é né.

¹⁹ Mia ye ve nnôm ékela asu njaman abé, te lañe mimvean mi ne ngumba ya nnôm éto, a mvean avute wé a mveane woone wé.

²⁰ E môse lale mia ye ve beyôm benyak awôm a wua, beyôm mintômba bebaé a bitoñe mintômba awôm a binyin, bi too ne selem,

²¹ a mvean avut, a woon asu beyôm benyak, beyôm mintômba a bitoñe mintômba ane tañe jap é né, a avalʼane mvinda é né.

²² Mia ye fe ve nnôm ékela asu njaman abé, te lañe mimvean mi ne ngumba ya nnôm éto, mvean avute wé a mveane woone wé.

²³ E môse nyini, mia ye ve beyôme benyaʼa awôm, beyôme mintômba bebaé a bitoñe mintômba bi ne te kʼayeñ awôm a binyin,

²⁴ a mvean avut a woon, asu beyôm benyak, beyôm mintômba a bitoñ beyôm mintômba, ane tañe jap é né, avale mvinda é né.

²⁵ Mia ye fe ve nnôm ékela asu njaman abé, te lañe mimvean mi ne ngumba ya nnôm éto, mvean avute wé a mveane woone wé.

²⁶ E môse tane mia ye ve beyôm benyaʼa ébu, beyôm mintômba bebaé a bitoñ mintômba bi ne tekʼayeñ awôm a benyin,

²⁷ a mvean avut a woon asu beyôm benyak, beyôm mintômba a bitoñe mintômba, ane tañe jap é né, avale mvinda é né.

²⁸ Mia ye fe ve nnôm ékela asu njaman abé, te lañe mimvean mi ne ngumba ya nnôm éto, mvean avut a mveane woone wé.

²⁹ E môse saman mia ye ve beyôm benyaʼa muam, beyôme mintômba bebaé, a bitoñe mintômba bi ne te kʼayeñ awôm a binyin

³⁰ a mvean avut a woon asu beyôm benyak, beyôme mintômba a bitoñ mintômba ane tañe jap é né, avale mvinda é né.

³¹ Mia ye fe ve nnôm ékela asu njaman abé, te lañe mimvean mi ne ngumba ya nnôm éto, mvean avute wé a woone wé.

³² E môse zamgbwale, beyôme benyak zamgbwa, beyôme mintômba bebaé a bitoñe mintômba bi ne te kʼayeñ awôm a binyin,

³³ a mvean avut a woon asu beyôm benyak, beyôm mintômba a bitoñe mintômba ane tañe jap é né, avale mvinda é né.

³⁴ Mia ye fe ve nnôm ékela asu njaman abé, te lañe mimvean mi ne ngumba ya nnôm éto, mvean avute wé a woone wé.

³⁵ E môse muam, ñwô mia ye sulan asu ya dib abôk; mia ye bo te bo ésaé ya bisaé mia bo éyoñ ése.

³⁶ Mia ye ve Nti mimvean mia diʼibane nduan, mi too mbamba menyum e be Nye: nnôme nyaʼa wua, nnôme ntômba wua a bitoñe mintômba bi ne te kʼayeñ awôm a binyin.

³⁷ Tit ése ja ye veban a mimvean mi avut a woon.

³⁸ Mia ye fe ve nnôm ékela asu metunaʼa ya njaman abé. Mimveane mite mia bebe e mimveane mi ne ngumba ya môs ôse a mimveane mi avute yʼété a woon.

³⁹ Mimvean mia yiane ve Nti mimôse mebôk mmie le; mimvean mite mia ye bebe e mimvean mi ne ngumba, e mimvean mi avut a e mimvean mi woon, nalé fe e metunaʼa ya nlatane ngbwa mi ne ve nye avalʼane nlem wo kômbô nge asu ya jalé ntiñetan éziñ.