NLAÑANE BÔT 27 - Bible en langue Bulu

Nguleya nyoñ élik e be binga

¹ Mala, Nôa, Ogla, Milka a Tirsa be mbe bobebinga be Sélôfad, e mone Efer, e mone Galad, e mone Makir, e mone Manasé, e mone Yôsep.

² Binga bete betan be nga zu tebe asu Môze, Eléazar ntuni , benya bôtô a ngum ékôane bôt ôse, anyiine nda éndelé bendôbaʼane a jô na:

³ Ésaa wongan a nga wu e nkôte si; a nji ke bo e nsamba ya ba be nga tebe Nti e ngame yat, ve a nji ke biaé monafam.

⁴ Amu jé jôé ésaa wongan da ye jañ abume bôte dé été, amu na a nji ke biaé monafam? Ajô te vaʼa bia ngap e bobenyañ bʼésaa wongan été.

⁵ Ane Môze a nga kee ajô dap e be Nti.

⁶ Nde Nti a nga jô Môze na:

⁷ Bobebinga be Selôfad ba bele. Wo ye ve be ngab élik ézezañe ya bobenyañ bʼésaa wop, a mbe ba ye nyoñ éliʼi ésaa wop.

⁸ Wo ye kobô bone bʼIsraél na: Nge môt a wu te liʼi bobefam, ngo jé ja ye nyoñ éliʼi jé.

⁹ Nge a nji liʼi monaminga, bobenyañ ba ye nyoñ éliʼi je.

¹⁰ Nge a nji bi bobenyañ, bobenyañ bʼésaa ba ye nyoñ éliʼi jé.

¹¹ Nge a nji bi bobenyañ bʼésaa, môt a dañe nye bebé abume bôte dé nye a ye nyoñ éliʼi jé, a nye a ye nyoñe je. Bone bʼIsraél ba ye bi njôane te ane atiñ avalʼane Nti a nga bendé Môze.

Yasua a tobane ntyendé Môze

¹² Ane Nti a nga jô Môze na: Betek e nkôl Abarime wuna a yene si ma ve bone bʼIsraél.

¹³ Wo ye yene je; ve mvuse valé wo ye wu avale monyoñ Arone fe a nga wu,

¹⁴ amu mi nga biasé abendé dam e nkôte si ya sin, éyoñ ékôane bôt é nga kobô ma abé a mia, teke telé ma étyi e mise map éyoñe ya ajô mendim. Mendime ya nkobô ébiasé, e Kadés, e nkôte si ya Sin.

¹⁵ Nde Môze a nga kobô Nti a Jô na:

¹⁶ Nti Emien, Zambe minsisime ya minsône mise, a teléʼé ékôane bôte ji môt,

¹⁷ nyô a kui ôsu viap, a nyô a nyiin ôsu viap, nyô a bo na be kui a bo fe na be nyiin, nalé ékôane bôte Nti ja ye bo te bo avalʼane mintômba mi nji bi mbaʼale.

¹⁸ Ane Nti a nga jô Môze na: Nyoñe Yasua e mone Nun, e môt nsisim ô too be nye; a wo ye beté wo wôé e be nye.

¹⁹ Wo ye telé nye asu be Eléazar ntuni a asu be bôte bese, a wo ye ve nye mebendé mise map me lôô.

²⁰ Wo ye kalane nye ngab éziñ ya ngule jôé, nalé bone bʼIsraél bese ba ye wôʼô nye.

²¹ Vʼémien a yiane yen Eléazar ntuni; a ntuni nye a ye sili nkômbane wom a zene ya Urim a tumim. Yasua a bôte bese ba ye wulu biyoñe bise avalʼane mebendé mé me né.

²² Ane Môze a nga bo avale Nti a nga bendé nye. A nga nyoñe Yasua a telé nye ôsu be Eléazar ntuni , a ôsu ékôane bôt ése.

²³ Nde a nga beté mo mé e be nye, a ve nye mebendé, avale Nti a nga jô Môze.