NLAÑANE BÔT 25 - Bible en langue Bulu

Bengunemelan e minjeʼese ya Môab

¹ Israél a nga too e Sitim; nde bôt be nga taté na ba bo bijabô a bengone ya Môab.

² Bengone bete be nga dutu bôte ya Israél na be ve bezambe ya si jap mimvean metunaʼa. Bone bʼIsraél be nga nyoñe fe ngap e mindian mi nga boban asu bezambe bete, a kañe fe bezambe babe bete.

³ A dañe dañe na Israél a nga nyoñe ngap nkañane ya kañe zambe Baal ya Péor, ajô te Nti a nga yaa Israél.

⁴ Ane Nti a nga jô Môze na: Nyoñe bivete bise yʼayoñ a tyelé bie yôp asu be Nti mi lôô jôp. Nalé ayaa Nti da ye kôlô be Israél.

⁵ Nde Môze a nga jô betyiʼi mejô yʼIsraél na: Môt ase ya be mia a wôék ba ya bôte bé be nga fulan a Baal ya Péor.

⁶ Bone bʼIsraél be yônôk anyiine nda éndelé bendôbaʼane, ateme na fam éziñe ya bone bʼIsraél é nga zu é bili ngone ya Madian e be bobenyañ, Môze a lôô, ékôane bôt ése ya bone bʼIsraél é lôô fe.

⁷ Eyoñ a nga yene jame te, Finéas, e mone Eléazar, e mone Aron ntuni , a nga kôlô si ézezañe bôt, a nyoñ akoñe wo,

⁸ a tôñe môte ya Israél ate e nda éndelé jé été, a jii de bebaane, fam yʼIsraél a minga abume si. Eyoñe te ébubua é nga tebe e be bone bʼIsraél été.

⁹ E bôt be nga wu ébubua be mbe toyini mewôm mebaé a ényin.

¹⁰ Ane Nti a nga kobô Môze a jô na:

¹¹ Finéas e mone Eléazar, e mone Aron ntuni a te vôôn ayaa dam e lôt Israéle yôp, amu a te kamane ma ézezañe jap; ajô te me nji fe mane jiane bone bʼIsraél ayaa dam été.

¹² Ajô te wo ye jô nye na ma bo nye mvean élate jam asu mvoʼé .

¹³ Elate te ja ye bo e mfaʼa wé a e mfaʼa mvoñe bôte jé, ji ya ésaé betuni nnôm éto, amu a nga suñ aban asu e Zambe wé a bulu nsem asu bone bʼIsraél.

¹⁴ Jôé môte yʼIsraél a nga wôéban ba ngone ya Madian e mbe Zimri, e mone Salu; a mbe évete ya nda bôte jia ya bone be Siméon.

¹⁵ Eyôlé minga ya madian a nga wôéban é mbe Kôzbi, ngone Sur, évete ya abui mebume ya nda bôt éziñe ya Madian.

Israél a yiane wôé bôte ya Madian

¹⁶ Ane Nti a nga kobô Môze a jô nye na:

¹⁷ Belaʼane bôte ya Madian ane besiñ a wôé be;

¹⁸ Amu be nga liti na be ne besiñe benan, amu be nga joñôlô mia éyoñ ajô Kôzbi, ngon évete ya Madian, kale jap, nye a nga wôéban e môs ébubua é nga boban amu ajô Péor.