NLAÑANE BÔT 24 - Bible en langue Bulu

¹ Balam a yene na Nti a nga yene mvaé ya botane Israél nde a nji fe ke jeñe jame ya jô e be Nti avalʼane biyoñe bivok; vʼa nga lum asu dé mfaʼa ya nkôte si.

² Ane a nga bete mis a yen Israél a maneya vule minkan avale meyoñe mé me né. Nde Nsisime Zambe ô nga too be nye.

³ Ane a nga tote mejô ya nkulan a jô na: Nkulane mejô Balam, e mone Béor, nkulane mejô môt a yene mam ane me né,

⁴ nkulane mejô môt a wôʼô mejô me Zambe, môt a yen ñyenane ya Nyô a ne ngulʼése, nyô a kute meboñe si a mise mé ma kuiban,

⁵ A Yakob, menda bindelé môé me nʼabeñ! Menda môé, a Israél!

⁶ Ma mialan ane atôñe mendim, Ane mefube bidi me ne e fefele beta ôsôé Ane meyañe Nti a nga bé, Ane bilé bi sédre nsaʼa ôsôé.

⁷ Mendim ma fuluku e mekobe mé été, a mvoñe jé ja faa mvoʼé amu abui mendim. Njôô bôte wé a dañ Agag, a éjôé jé ja bo bo ngu.

⁸ Zambe a nga vaa nye Ejipte; a bili ngule nyat e mfaʼa wé. A mine meyoñ mese me ne besiñe bé; a buʼu bivese biap, a balé be meveñ a mekoñ mʼélaé mé,

⁹ A sômbô si, a a bômbô si ane ngbwengbwem, a avalʼane ayoʼo tit, za a ye bo nye na a kôlô si? Môt a botane wo a boʼo ébotan, a biyoʼé bi boʼo be nyô ase a yoʼé wo.

¹⁰ Ane Balak a nga yaa Balam; ndʼa nga kute kôp a jô Balame na: Me nga loone wo na ô yoʼé besiñe bam, ve tame yene na ô jaléya be a bibotan tañe biyoñe bilaa.

¹¹ A ntoo éyoñe ji ve tup a ke e jale dôé! Me nga tiñeti na ma ye jalé wo a duma, ve Nti a kamane wo na ô bo te nyoñe bie.

¹² Nde Balam a nga yalane Balaʼa na: Ye sa avale bifia di e nde me nga kobô minlôman ô nga lôme ma:

¹³ toʼo na Balak a ve ma nda jé éto njalan a argent a or, me se nguleya té feʼe éziñ é too mvaé nge abé é too Nti e ngame yat; ve ma ye baʼalan e jame Nti a ye jô?

¹⁴ Eyoñe ji me nga ke e be bôte bam, zaʼak ma ye kate wo e jame ayoñe te da ye bo ayoñe bôte dôé melu ma zu.

¹⁵ Ane Balam a nga kobô mejô mé ya nkulan a jô na: Nkulane mejô Balam, e mone Béor, Nkulane mejô ya môt a yene mam ane me né,

¹⁶ Nkulane mejô ya môt a wôʼô nkobô Zambe, nyô a yem asimesane ya Nyô a dañe yôp, nyô a yene ñyenane ya Nyô a ne ngulʼése, nyô a kute meboñe si a mise mé ma kuiban,

¹⁷ Me lôô nye ve saa éyoñe ji. Ma nyeʼe me lôô nye ve sa ñhe bebé, Oteté wo so be Yakob, Ntum éjôé wo tebe Israél. A balé mevel me Môab meveñ, a a mane wôé bone be Sét.

¹⁸ A nyoñe si Edom a nyoñe nkôle Séyir, a bone bʼIsraél ba dañ.

¹⁹ Nyô a so be Yakob a jôʼô ane mben, a wôé mebukaʼa ya tison.

²⁰ Balam a nga yen Amalék, nde a nga jô na: Amalék a ne ayoñ ôsu ya meyoñ ! Vʼasuʼulan, a ye ke e njañ.

²¹ A nga yene fe Bekénieñ a jô na: Étabaʼa jôé é ne ngu a dumbaʼa dôé e ne akôme yôp.

²² Ve kan a ye bili e minkabaʼa mi nduan été. A Asur a ye suʼulane kee wo e minkôm.

²³ A nga tote mejô mefe a jô na: Ngoʼé! Za a ye nyiñ mvuse mboone Zambe?

²⁴ Ve besitima ba ye so Kitim. Ba ye tibili Asur, ba ye fe tibili Eber; Nye fe a ye ke e njañ.

²⁵ Ane Balam a nga tebe tetele a bulan e jale dé, Balaʼa fe a nga ke e zene jé.