NLAÑANE BÔT 21 - Bible en langue Bulu

Israél a dañe bôt ya Kanaan; benyo ba lôban abui

¹ Eyoñe njôô bôte ya Arad, môte ya Kanaan a mbe a too Négéb, a nga wôʼô na Israél a kuuya e zene yʼAtarin, a nga wosane nye a bi bôte bé minkôm.

² Ane Israél a nga tiñeti atiñ e be Nti a jô na: Nge wo ve ayoñe bôte di e mo mam, bitisone biap bia ye tyamban bise.

³ Nde Nti a nga wôʼô tyiñ Israél a ve bôte ya Kanaan e mo map; be nga mane jiane be, bebien a bitisone biap: Nde be nga yôlé vôm ate jôé na Orma.

⁴ Ane be nga kôlô e nkôle Hor, a lôte zene ya évele mañ asu ya saʼale sii Edom. Vʼézezañe zen , minlem mi nga bili bôt atek.

⁵ Amu ateʼe nleme te, nde bôt be nga kobô Zambe a Môze abé a jô na: Amu jé mi nga soo bia Ejipte na bi mane zu jañ e nkôte si va? Amu bidi momo, mendime fe momo, a bi kateya di mana bidi bi zaé nyô.

⁶ Ane Nti a nga lôme benyo be bili nsu ô nʼényan abui, nde be nga lôbe bôt a abui e nga wu Israél été.

⁷ Nde bôt be nga ke be Môze a jô nye na: Bi boya abé amu bi kobôya wo a Nti abé . Ajô te yeʼelaʼane Nti na benyo ba be ke bia ôyap. Nde Môze a nga yeʼelan asu bôt.

⁸ Ve Nti a nga jô Môze na: Boʼok éveʼela nyo ja lôan a tyelé je ôlé; môt ase nyo é lôbeya, nge a fombô je, a ye nyiñ.

⁹ Nde Môze a nga kôme nyo a mvot, a tyelé je ôlé; a e môt ase nyo é nga lôp a a fombô nyo mvot éte, a nga nyiñ.

Nyoñane si ya Yordane yat

¹⁰ Ane bone bʼIsraél be nga kôlô a vule minkane Obôt.

¹¹ Akôlô ya Obôt, nde be nga vule minkan e lyé-Abarim, nkôte si ô ne bebé a sii Môab, mfaʼa jôp da tôô.

¹² Akôlô ya valé, be nga vule minkan e mbiʼili Zéréd.

¹³ Akôlô ya valé be nga vule minkan ôsôé Arnone yat, wo lôt e nkôte si, a kui e si Beamorééñ.

¹⁴ Avale da jôban e kalate bita bi Nti été na: Vahéb e mfaʼa ya Sufa, a mimbale mié, Arnon

¹⁵ a mimbale mié, nsaʼa wé ô ne e mfaʼa ya Ar a ñwô ô ne nné si Môab.

¹⁶ Akôlô ya valé be nga kui e Bir. Vôm ate Nti a nga jô Môze na: Sulaʼane bôte na me ve be mendim.

¹⁷ Eyoñe te bone bʼIsraél be nga yia e jia jina na: Mendim me vame ñhe menjeñ, a nkutane mefas!

¹⁸ Bivet bi nga faʼa me a minkukume mi nga vundi me. A mintume miabe ya éjôé a mintume bejô bôte miap.

¹⁹ Akôlô ya nkôte si nde be nga ke Matana; akôlô ya Matana be nga kui Nahaliél; akôlô ya Nahaliél be nga kui Bamôt.

²⁰ Akôlô ya Bamôt be nga kui mbiʼili ô ne afane ya Môab abôbône nkôle Pisga; mbiʼili te wo lumbu mfaʼa ya nkôte si.

Israél a tabe e sii Beamorééñ

²¹ Ane Israél a nga lôme minlôman e be Sihoñ, njô bôte Beamorééñ a jô nye na:

²² Ma kômbô lôte si jôé; bia ye bo te tulane mefube bidi, nge mefube mindiʼi mi woon, a bia ye bo te nyu mendime ya menjeñ, ve bia ye tôñe tetela zen akekui bi lôteya si jôé.

²³ Ve Sihoñ a nji kañese na Israél a lôte si jé; ane Sihoñ a nga sulan e bôte bé bese a ke tôbane Israél e nkôte si; a nga kui e Yahat a wosane Israél.

²⁴ Nde Israél a nga bôé nye a meyo me nkpwaté mekôn a nyoñe si jé ataté ôsôé Arnon a kui ôsôé Yabôk, a kui nnéa bone bʼAmmon, amu nnéa bone bʼAmon a mbe ngu.

²⁵ Israél a nga nyoñe bitisone bite bise. Israél a nga tabe e bitison Beamoréén bise, e Hesboñ a bitisone bise bia wôʼô a Hesboñ.

²⁶ Amu Hesboñ a mbe tisone Sihoñ, njô bʼAmorééñ; a nga bo bita a njô bôte ya Môab a nga too te na mfefé njô bôt ô nyoñ éto, nde a nga wôlé nye si jé ése a kui ôsôé Arnon.

²⁷ Ajô te betili bevok ba jô na: Zaʼan e Hesboñ a beta lôñeban! A beta kômban, tisone Sihoñ!

²⁸ Amu nduane ya Hesboñ é kuiya; Nkabaʼa nduane tisone Sihoñ ô maneya mine Ar-Môab, a bivete bikôndôʼô bi Arnon.

²⁹ Ngoʼo wo, a Môab! Mi jañeya a bôte ya Kemôs! A boya bone bé na be tup, a kuaneya bobebinga bé minkôm e be Sihoñ! Njôô bôte Beamorééñ.

³⁰ Bi maneya lume be bibaé minfane biañgan. Ataté Hesboñ a kui Divôn biôme bise bi maneya wu. Bi maneya sa biôm a kui Nôfa. E biôm bise bi né a kui Madaba.

³¹ Ane Israél a nga tabe e si Beamorééñ.

³² Môze a nga lôme bôt be ke looé Yaézer, be nga nyoñe fe bitison bi mbe éjôé jé si a titane Beamorééñ be nga to été.

³³ Nde be nga tyendé zen a ke mfaʼa zene ya Basañ. Ane Og, njô bôte ya Basañ ba be bôte bé bese be nga ke tôbane be na be wosane be Edré.

³⁴ Ane Nti a nga jô Môze na: Te ko nye woñ; amu me veya nye e mo môé, émien, bôte bé bese a e si jé, wo ye bo nye aval ô nga bo fe Sihoñ, njô bôte Beamorééñ a nga too Hesboñ.

³⁵ Ane Môze a nga bôé nye, émien, bone bé a bôte bé bese, teke liʼi ve môte wua, nde be nga nyoñe si jé.