NLAÑANE BÔT 20 - Bible en langue Bulu

Awu Miriam, mendime ya Mériba, melebe me Môze

¹ Ekôane bôt ése ya bone bʼIsraél be nga kui e nkôte si ya sin e ngon ôsu a bôt be nga tabe e Kadés. Vôm ate nye Miriam a nga wu a e nne fe a nga jambe valé.

² Bôt be nga yi mendim; nde be nga sulane na ba tebe Môze ba Aron e ngame yat.

³ Bôt be nga jeñe Môze ntañete be jôʼô na: Ngoʼé nge bi too ye wu na Nti! Emien a bibi bia bia be bobejañ.

⁴ Amu jé mi nga zuu bia e nkôte si wu, e bia bi ne ayoñe bôte Nti? Ye amu na bi mane zu jañ a mimbame biyeme miangan?

⁵ Amu jé mi nga vaa bia Ejipte? Ye asu ya zuu bia angônda vôme nyô? Teke jôm be ne bé va, e vana teke bilé bi figié, nge mindiʼi mi woon nge bilé bi grenadié, mendim mebiene ya nyu momo.

⁶ Nde Môze ba Aron be nga kôlô e vôme bone bʼIsraél be nga too a ke anyiine nda éndelé bendôbaʼane, a ku mesu me buti si. Ane étôtoʼo Nti é nga yené e be be,

⁷ nde Nti a nga jô Môze na:

⁸ Nyoñe ntume wôé a sulane bone bʼIsraél; wo ye kobô akôme di bebien be lôô, a da ye ve mendim; yaa wo ye bo na mendim me vam akôme di a ve bone bʼIsraél a mimbame miabe mendime ya nyu!

⁹ Nde Môze a nga ke nyoñe ntume wé e nda Nti, avale a nga nyoñ abendé.

¹⁰ Nde baa Aron be nga loon ékôane bôt, be tebe ôsu ya akôme Nti a nga jô de a kate be na: Vôʼôlaʼan a mia bebene njôan! Ye bi ne nguleya kuli mia mendim me soʼo akôme di?

¹¹ Nde Môze a nga bete wo a bibi akôm biyoñ bibaé a ntume wé. Awolo te ebien nde abui mendim é nga vam akôme te, a bone bʼIsraél be nga bo nguleya vaa évé jap, nalé fe mimbame biyem.

¹² Ve Nti a nga jô Môze a Arone na: Mi nji ke tabe ma ndi, mi nji ke jôʼé na étyi jam é yené e mise bone bʼIsraél! Ajô te ñhe saa fe mia mia ye wulu e bôte ba a kui be e si ma ve be

¹³ Mfaʼa ya beta jam ate, ba kobô ajô mendime ya Mériba, e ne na, mendime ya ntañete, amu bone bʼIsraél be nga jeñe Nti mintañete, ve Nti a nga belan éyoñe te mfaʼa ya liti étyi jé.

Bone bʼIsraél ba kômbô tulan e sii bone bʼEdom

¹⁴ Israél a too Kadés, nde Môze a lôme minlôman e be njôô bôte ya Edom be jô nye na: Avale di monyoñ, Israél, a jô na: Wo yem minjuʼu mise mi kuiya be bia.

¹⁵ Betate be nga ke Ejipte, a bi nga tabe wé a ayap. Ve bôte yʼEjipte be nga tibili bia, biabebien a bʼésaa bangan.

¹⁶ Nde bi nga yôn e be Nti, ane a nga wôʼô tyiñe jangan a lôme éngele wé a vaa bia Ejipte. Ajô te bia bi ne Kadés dene ba, tisone ya akuʼu da ya si jôé.

¹⁷ Ma kômbô lôte si jôé; bia ye bo te tyii e mefube bidi été nge mefube mindiʼi mi woon, a bia ye bo te nyu mendime ya menjeñ me ne mfaʼan; bia ye tôñe nnôma zen , teke yale mbo nnôm, nge mbo ngal, akekui bi maneya lôte si jôé.

¹⁸ NdʼEdom a nga yalane nye na: Woo ye ke lôte be ma! Nge mi veʼele zu lôt, ma ye bo mia bita!

¹⁹ Nde bone bʼIsraél be nga jô nye na: Bia ye tôñe ve zen étam; nge bia nyu mendime môé, mamien a mimbame biyeme miam, ma ye yaʼan; ajô é nji ke bo valé; jôkéʼé ma me lôte vʼa mebo.

²⁰ NdʼEdom a nga yalane na: Woo ye ke lôt! NdʼEdom a nga ke tôbane nye a beta nsamba bôte mewosan.

²¹ Ajô te Edom a nga bene na Israél a lôt e si jé, nde Israél a nga tyii zene fe.

Awu Aron

²² Ane Ekôane bôt ése ya bone bʼIsraél be nga kôlô Kadés a kui e nkôle Hor.

²³ Ane Nti a nga jô Môze a Aron e nkôle Hor, e nné si Edome na:

²⁴ Aron a mbeme wu. E ne bebela na, a ye bo te nyiin e si ma ve bone bʼIsraél, amu mi nji ke bo abendé dame mewôk anjeñe ya Mériba.

²⁵ Ajô te a ntoo ve nyoñ Aron a mone wé Eléazar a bete be e nkôle Hor.

²⁶ Vaʼa Arone biôme bié a jalé bie Eléazar e mone wé. Vôm ate nye Aron a ye nyoñeban a wu.

²⁷ Ane Môze a nga bo avale Nti a nga bendé nye. Nde be nga bet e nkôle Hor ékôane bôt ése é lôô.

²⁸ Ane Môze a nga vaa Aron mengômesane mé a jalé me mone wé Eléazar. Nde Aron a nga wu vôm ate, abôbône nkôle yôp. Môze ba Eléazar be nga ke e nkôle si.

²⁹ Ekôane bôt ése é nga yene na Aron a wuya, nde nda bôt Israél ése é nga yôn Aron tañe melu mewôm mela.