NLAÑANE BÔT 19 - Bible en langue Bulu

Evele nyak; mendim ma fubu

¹ Ane Nti a nga kobô Môze baa Arone na:

² Njôan ya atiñe Nti a nga ve ñwô wuna na: Kobôʼô bone bʼIsraél na, be zuu évele ngale nyak, é too mvoʼé ne selem, teke ayeñ, é ngenan te beʼe mbeʼe.

³ Mia ye kalane je Eléazar ntuni , nye ki a ye kuʼi je e minkan atan, a ba ye tyiʼi je ôsu vié.

⁴ Eléazar Ntuni a ye nyoñe metyi ya ngale nyaʼate a ônyu éyoñe te a miame me biyoñe zamgbwa ôsu nda éndelé bendôbaʼane.

⁵ Ba ye mane diʼi nyak mise mé me lôô. Ba ye diʼi ékôbe jé, minsône mié a metyi mé a mebi mé.

⁶ Ntuni a ye nyoñe njaʼa élé sédre, élé izôp a évele nsinga a wua bie ézezañe nkabaʼa nduan wo diʼi nyak.

⁷ Ntuni a ye sôbe mengômesane mé a woʼo nyôle jé mendim; éyoñe te a ye bulane minkan, ve a ye tabe te mfuban a kui mamengôʼé.

⁸ Môt a ye diʼi nyak a ye sôbe mengômesane mé a mendim a wobane fe mendim, a a ye tabe te mfuban akekui mamengôʼé.

⁹ E môt a ne mfuban a ye kôane asube ya nyak a kee de e minkan atan, e vôm a ne mfuban; ba ye baʼale asube te asu ékôane mendim ma wosane mvin. Metunaʼa ya njaman abé le.

¹⁰ Môt a te kôane asube ya nyak a ye sôbe mengômesane mé a a ye tabe te mfuban a kui mamengôʼé. Njôane ya nnôm éto ñwô le asu bone bʼIsraél, asu ntabe a too be zañ.

¹¹ Môt a nnambe mbim, avale mbim ese, a ye tabe te mfuban tañe melu zamgbwa.

¹² A ye tun émien a mendim mete e môse lale a e môse zamgbwale, éyoñe te a ye bo mfuban . Ve nge a bo te tuneban ataté môse lale a e zamgbwale, aa ye ke bo mfuban .

¹³ Môt ase a ye nnambe mbim ve teke tun émien, a ve tabernakel Nti mvin, ba ye vaa môt ate Israél été; amu be nji ke miame nye mendim ma wosane mvin, a mvine jé é ngenan e be nye.

¹⁴ Atiñ nde di: Nge môt a wu e nda éndelé été môt éziñ a too été, môt ate a ye beʼe mvin tañe melu zamgbwa;

¹⁵ élabaʼa ése é yoo teke ébutaʼa été ja ye bo te mfuban .

¹⁶ Môt ase a ye nnambe môt a te wu nkpwaté mekôn e nlame mvus, nge nnambe mbim, bivese bi môt nge soñ, môt ate a ye tabe tee mfuban tañe melu zamgbwa.

¹⁷ Asu môt a ne tee mfuban , ba ye nyoñ asub asu étyiʼa ya njaman abé é nga diʼiban, a fulane de a benya mendim élabaʼa éziñ été.

¹⁸ Môt a ne mfuban a ye nyoñ abusa izôp a dube de mendim; éyoñe te a ye miame me e nda éndelé, e bilabaʼa bise, e be bôte bese be ne valé, e be môt a nnambe bivese bi môt, e môte be nga wôé, mbim nge avus.

¹⁹ Môt a ne mfuban nye a ye miame mendime mete e be môt a ne tee mfuban; a ye bo jame te e môse lale a e môse zamgbwale, a a ye fubu nye e môse zamgbwale. A ye sôbe mengômesane mé a wobane mendim; wôna mamengôʼé, a ye bo mfuban .

²⁰ Môt a nji bo mfuban a a nji tuneban, ba ye vaa nye ékôane bôt été, amu a maneya ndaman étyi ya vôme Nti a nʼétyi; amu be nji ke sôé nye mendim ma wosane mvin, nde a ne mvin.

²¹ Njôane ya nnôm éto e mfaʼa wop ñwô le. Môt a miame mendim ma wosane mvin a ye bo tee mfuban a kui mamengôʼé.

²² Jôm ése môt a ne te mfuban a nnambe é ntoo te mfuban a môt a nnambe nye a ye bo te mfuban a kui mamengôʼé.