NLAÑANE BÔT 18 - Bible en langue Bulu

Bisaé a mengap ma yiane betuni a bone be Lévi

¹ Nti a nga jô Arone na: Womien, bone bôé a nda bôte jôé, mia ye beʼe adite ya ékob ése é ne boban e nda é nʼétyi été: womien a bone bôé mia ye beʼe adite ya ékob ése é ne boban ésaé betuni jenan.

² Mia be bobenyoñ zaʼan, mvôʼô Lévi, ayoñ ésoo, nalé ba ye bo nlatan a wo a volô wo ésaé ôsu ya nda éndelé é bili éwolo élat.

³ Ba ye baʼale mebendé môé a baʼale nda éndelé ése; ve ba ye bo te subu bebé a biôme mebelan bi nʼétyi, nge subu bebé ataʼa metunaʼa, mia be be mi zaa wu.

⁴ Ba ye baʼabe a wo, a ba ye baʼale nda éndelé bendôbaʼan asu ésaé ése yʼété. Te ke nneñ éziñ a ye zu mia bebé.

⁵ Mia ye baʼale vôme yʼétyi a ataʼa metunaʼa, éyoñe te ayaa Nti da ye bo te beta kui e be bone bʼIsraél.

⁶ O lôô, me nyoñeya bobenyoñ, bone be Lévi, ézezañe ya bone bʼIsraél, Amu be ne mvean e be Nti, nde be vebaneya be mia asu ya bo ésaé ya nda éndelé bendôbaʼane.

⁷ Womien a bone bôé, mia ye baʼale bisaé ya éto betuni jenan asu jam ese da fombô ataʼa metunaʼa, a jôm ése é ne e nda été, éndelé ya zañe yat, mia ye bo ésaé yʼété. Esaé betuni jenan é ne e ji me veya mia. Nneñ ase a ye subu bebé a ye wôéban.

⁸ Ane Nti a nga jô Arone na: Ô lôô, me veya wo ô baʼale mimvean mia veban asu dam, ma ve mie e be wo a bone bôé, nalé fe jôm ése bone bʼIsraél ba telé étyi, bi ne mia mveban amu mi ne ñwoʼone mbon, a jame te e ntoo njôan ya nnôm éto.

⁹ E ngabe jôé nyô, ézezañe ya biôme bia dañ étyi bi ne te diʼibane nduan; mimveane miabe mise, mimveane ya avut mise, metunaʼa mabe ya njaman abé mese, a metunaʼa ya mmeman abé ba ye ve ma; biôm bia dañ étyi bite bia ye bo émbiôé a bi bone bôé.

¹⁰ Wo ye di bie avalʼane biôme bia dañ étyi; fam ése ja ye di bie; bi ne biôm bi nʼétyi mfaʼa wôé.

¹¹ E ngabe jôé fe nyô: jôm ba kandé e mimvean ya bone bʼIsraél ô laté a jôm ése ba ye ve a mboone jame ya telé jôme te étyi mfaʼa Nti, ma ve wo bie a bone bôé be ne befam a bobebinga bôé, jame te e too atiñe ya nnôm éto. Môt ase a ne mfuban e nda jôé, a ye di bie.

¹² Ma ve wo bembômô ba ye ve Nti; jôm ése ja dañe mvaé e mimbon, ji ése ja dañe mvaé e mfefé woon a fôn.

¹³ Bembômô bibuma ya si ba ye zu ve Nti ba ye bo émbôé. Môt ase a ye bo mfuban e nda jôé a ye di be.

¹⁴ Jôm ése é ne ntiñetan e be Nti Israél été, ja ye bo énjôé.

¹⁵ Ntôle ya nsôn ôse ba ye ve Nti, bôt a betit, wo ye bo éñwôé, ve wo ye nyoñe ngôtô ya ntôl ôse ya môt, nalé fe ngôtô ya ntôle ya tit é nji bo mfuban .

¹⁶ E tañe ja kôté mie, wo ye nyoñe je ataté éyoñe ntôl ô ntoo ngone jia. Avale womien wo ye yen, tañ éte ja ye bo besikel be argent betan, avale sikel vôme yʼétyi a né, nalé a ne na begram awôm.

¹⁷ Ve wo ye bo te nyoñe ngôtô asu mon ôsu nyak ja taté biaé, nge nyô ngale ntômba a taté biaé, nge nyô ngal ékela a taté biaé: amu bityiʼa bi nʼétyi mbie le. Wo ye miame metyi mabe ataʼa metunaʼa yôp a diʼi avoñe dap ane mimvean mia diʼibane nduan mi too mbamba ényum e be Nti.

¹⁸ Minsône miap mia ye bo émiôé avale fe ane ôngôn ba telé étyi, a avalʼane énam abé ya mbo nnôm.

¹⁹ Ma ve ataté womien, bobefame bôé a kui bobebinga bôé, ane njôane ya nnôm éto, e jôm ése bone bʼIsraél ba ye kandé e mimveane miap mi nʼétyi ba ve Nti. Elate te é ne ji é ne tekʼatyamé nnôm éto mfaʼa Nti, asu dôé a mvoñe bôte jôé.

²⁰ Ane Nti a nga jô Arone na: Wo ye bo teke ngap e si jap, a wo ye bo te bi ngap e zañe jap; ma me ne ngabe jôé a éliʼi jôé e zañe bone bʼIsraél.

²¹ Eliʼi ma ve bone be Lévi Israél été, é ne ngab awômô ése, maʼane ya ésaé ba bo, ésaé ya nda éndelé bendôbaʼane.

²² Bone bʼIsraél ba ye bo te beta subu bebé a nda éndelé bendôbaʼane, be za beʼe mbeʼe ya abé éziñ a wu.

²³ Bone be Lévi ba ye bo ésaé ya nda éndelé bendôbaʼane, a ba ye beʼe adite ya ékobe jap. Njôane wu ô ne wu ya nnôm éto e miaé mienan mise; ba ye bo te nyoñ élik ézezañe bone bʼIsraél.

²⁴ Eliʼi ma ve bone be Lévi é ne mengab awômô bone bʼIsraél ba ye vaa asu Nti; ajô te me nga jô ajô dabe na: Ba ye bo te kʼélik e zañe bone bʼIsraél.

²⁵ Ane Nti a nga kobô Môze a jô na:

²⁶ Wo ye kobô bone be Lévi a jô be na: Éyoñe mia ye nyoñe ngab awômô e be bone bʼIsraél, nje ma ve mia ane élik é soʼo be be, mia ye kandé mvean asu Nti, ngab awômô ya ngab awômô;

²⁷ a jôme mia kandé te, ja ye lañebane mia ane fôn ba vaa afup a avalʼane njalane fandé woon ba vaa e vôm ba miate bibuma.

²⁸ Avale te nde mia fe mia ye kandé mvean asu Nti ô soʼo e mengab awômô mia nyoñ e be bone bʼIsraél, a mia ye kee Aron ntuni mvean mia te kandé asu Nti.

²⁹ E mimvean mise ba ye ve mia, mia ye kandé ngab éziñ asu Nti; e mfaʼa ya jôm ése é nʼabeñ, mia ye kandé ngab é ne ntelan étyi.

³⁰ Wo ye jô be na: Éyoñe mi kandéya ngabe ja dañe mvaé, ngab awômô ja ye lañeban e mfaʼa bone be Lévi avalʼane nkôane bidi ya mefup, a avalʼane nkôane mendim bibuma.

³¹ Mia ye di ngab awômô éte e vôm éziñ mia be bôte ya nda bôte jôé; amu e maʼane menane le, mvolane ya ésaé mia bo e nda éndelé bendôbaʼane.

³² Teke abé éziñ da ye nnambe mia éyoñe mi maneya kandé e ngap ja dañe mvaé, mi nji ke ndaman étyi ya mimveane mi bone bʼIsraél mi nʼétyi, a mia ye bo teke wu.