NLAÑANE BÔT 15 - Bible en langue Bulu

Minyeʼelan asu mimvean avut a mimbon

¹ Ane Nti a nga kobô Môze a jô na:

² Kobôʼô bone bʼIsraél, a jô be na: Éyoñe mia ye kui e si ma ve mia na mi lôñe bitabaʼa bienan,

³ a mia ye ve Nti mimvean mia diʼibane nduan, mi too mimvean mia diʼibane ngumba, nge mimvean ba ve asu ya tôé atiñ , nge mvean ane nlem wo kômbô, nge na e mebôʼô menan été, asu ya kulu jôm é ne mbamba menyum e be Nti, é soʼo e beta mimbam nge bone mimbame biyeme bienan été,

⁴ môt a bo Nti mimveane mié, a ye fe zuu kili avut éla, mfuʼan a lita mbone jia a étun,

⁵ a lita woone jia a étun asu mone ntômba ase a veban e mimvean mi ne ngumba, nge mimvean asu nlatane ngbwa.

⁶ Nge étyiʼa é ne nnôme ntômba, ba ye zuu fe kili avut ésaman, mfuʼan a lita mbon ébaé,

⁷ a lita woon ébaé; ma ye nyeʼe mbamba ényume ya ôtita yʼété.

⁸ Nge nnôme nyak nye ba ve asu mimvean mi ne ngumba, nge mimvean asu nlatane ngbwa, asu ya tôé atiñ , nge asu ya te ngume jam,

⁹ ba ye zuu fe kili avut ébu, mfuʼan a lita mbon éla,

¹⁰ a lita woon éla: ma ye nyeʼe mbamba ényume ya ôtita yʼété.

¹¹ Avale te da yiane boban éyoñ étyiʼa é ne nnôme nyak, nnôme ntômba, étoñe ntômba nge étoñ ékela.

¹² E tañe betit ése mia ye ve, mia ye baman tit ése yʼété a mimvean avut mi ne njôan.

¹³ Bone bʼIsraél bese ba ye tôñe minjôane mite éyoñ ba ye ve ma mimvean mi ôtita ô ne mbamba menyum.

¹⁴ Beyeñ be too be mia nté éziñ e si jenan, nge ba menda me bôte map me tabeya miaé miaé, mia be be bese mia ye tôñ avale minjôane da nge ba kômbô ve ma mimvean mi ôtita ô ne mbamba menyum.

¹⁵ Miñyeʼelan mia ye bo avale da asu bôte bese, asu mia bone bʼIsraél a asu beyeñ, a miaé mise mia ye bo miñyeʼelane mite ésaé. Ma Nti, ma belane bone bʼIsraél avale da fe ane beyeñ:

¹⁶ metiñ a miñyeʼelan bi ne avale da asu denan a asu dap.

¹⁷ Ane Nti a nga jô Môze na:

¹⁸ A kalane bone bʼIsraél minjôane mi: éyoñ mia ye nyiin e si ma kee mia

¹⁹ a di bidi ya vôm ate, mia ye vaa ngab éziñ a ve me je.

²⁰ Mia ye yame mon éwôlé ya mimvean a ébañ avut be ndôme mane fuk, mia ye zuu ma je ane ba zuu mveane mefes, éyoñ be ndôme mane tyaʼa nlisi.

²¹ Ajô te mia ye ve ma éwôlé ôsu mia ye taté yam. Nyeʼelane wu ô ne fe asu miaé mise mia zu.

²² Nge mia kop e mfuʼan a bo te baʼale mebendé mete mese mme Nti a nga ve Môze,

²³ mam mese Nti a nga bendé mia a Môze, ataté môse Nti a nga ve Môze mebendé, a kui miaé mienan mi nga tôñe mvus;

²⁴ nge mbia mboon a nga yené e mfuʼan, bôte bese te yeme mboone te; ékôane bôt ése ja ye ve étoñe nnôme nyak asu mveʼan ô ne ngumba, ô too mbamba menyum e be Nti, mbundaʼan a mvean avut a mbon avale nyeʼelan yʼété ô né; a ye fe ve nnôm ékela asu metunaʼa me njaman abé.

²⁵ Ntuni a ye bulu nsem asu ékôane bôt ése ya bone bʼIsraél, wôna ba ye nyoñe njaman : amu ékobe te é ne fuʼan, a be soya mvean wo diʼibane nduan asu be Nti; be soya fe étyiʼa asu be Nti mfaʼa njaman abé amu fuʼan ékobe wop.

²⁶ Ekôane bôt ése yʼIsraél ja ye nyoñe njaman nalé fe ntabe a too e zañe jap, asu bôte bese, amu ékobe te é ne fuʼan.

²⁷ Nge môte wua nye a te bo abé e fuʼan, a ye ve ngal ékela a ntoo mbu wua ane metunaʼa asu njaman abé.

²⁸ Ntuni a ye bulu nsem asu be Nti ajô môt a nji vañe bo abé; éyoñ a maneya bulu nsem asu dé, a ye nyoñe njaman .

²⁹ Eyoñe môt a nji vañe bo jam, atiñe da da ye bo ésaé mfaʼa bialébialé a mfaʼa ntabe a too e zañe jap.

³⁰ Vʼéyoñe bialébialé nge ntabe a vañe bo jam, a taya Nti; ba ye vaa môt ate e zañe bôte bé.

³¹ A biaséya mejô me Nti a a tyameya atiñe dé: ba ye vaa môt ate a a ye beʼe adite ya ékobe jé.

Melebe ma tôñ e môt a tyame sabat

³² Valé bone bʼIsraél be ngenan e nkôte si, nde be nga koone môt a tyaa njaʼa e môse sabat .

³³ Bôt be nga koone nye a tyaa njaʼa be nga zuu nye be Môze, Aron a ékôane bôt ése.

³⁴ Nde be nga kôme baʼale nye amu jam be nga yiane bo nye e nji ke kateban.

³⁵ Ane Nti a nga jô Môze na: Môt ate a yiane wôéban; bôte bese ba ye lume nye mekok e minkan atan.

³⁶ Ane bôte bese be nga kee nye e minkan atan a lume nye mekok , nde a nga wu avale Nti a nga bendé Môze.

³⁷ Ane Nti a nga jô Môze na:

³⁸ Kobôʼô bone bʼIsraél na: E miaé ôse été, ba ye bo mezeʼele e ñwôndé ya mengômesane map.

³⁹ Mezeʼele mete me ne asu ya simesane mebendé me Nti a bo me; mia ye bo te tôñe minkômbane ya minleme mienan nge mi me mise menan, mi za dutu mia na mi bo bijabô.

⁴⁰ Avale di mia ye simesane mebendé mam, a mia ye bo me, éyoñe te mia ye bo étyi asu e Zambe wônan.

⁴¹ Ma me ne Nti, e Zambe wônan, nyô a nga soo mia Ejipte na a bo e Zambe wônan. Me ne Nti, e Zambe wônan.