NLAÑANE BÔT 14 - Bible en langue Bulu

Bôt ba bene nyiin e Kanaan

¹ Ane bôte bese be nga bete metyiñ a yôn; be nga yône ngum alu ôte ôse.

² Bone bʼIsraél bese be nga kobô Môze a Aron abé menyiñ a jô be na: Amu jé bi nji ke wu e si yʼEjipte, nge wu e nkôte si!

³ Amu jé Nti a kañese na bi nyiine si éte a wu a nkpwaté mekôn? E binga bangan, a bone bangan ba ye bo biôme ya nsa. Ye e nji bo mvaé mfaʼa wongane na, bi bulan Ejipte?

⁴ Nde môt ase a nga jô nyô mboʼo na: Ntelaʼan évet, bi bulan Ejipte.

⁵ Ane Môze a Aron be nga ku mesu me butu si ôsu ékôane bôt ése ya bone bʼIsraél.

⁶ Wôna Yasua e mone Nun a Kaleb e mone Yefuné, bôte ya nsamba ô nga ke looé si, be nga nyabe mengômesane map

⁷ a kobô ékôane bôt ése na: E si bi nga wulu a looé, é ne angôndô ya étua mbamba si.

⁸ Nge Nti a yene bia mvaé, wôna a ye bo na bi nyiine si éte a a ye ve bia je; si e vôme menyañ a wôé bia len.

⁹ Ve da, te kôlan e ngame Nti, nalé fe te koone bôte ya si éte woñ; amu be ne bia avalʼane bidi, jôme ya kame be é nji fe bo a Nti a ntoo e ngame jangan, te koone be woñ.

¹⁰ Ve ngume nsamba ôse ô nga jô na be lume be mekok . Atemeteme na étôtoʼo Nti é nga faé e mise me bone bʼIsraél, e nda éndelé bendôbaʼan été.

Môze a sili njaman asu ayoñ ése

¹¹ Ane Nti a nga jô Môze na: Ye bôte ba ba ye foʼo jôʼé mbenan ba bene ma? Ye ba ye ke ôsu a bo te tabe ma ndi akôsa bo mendem mese me litiya ézezañe jap?

¹² Ma ye bibi a jiane be a ébubua ôkon, a éyoñe te ma ye bo na ayoñ da dañe ngu a abui a lôte Israél e bialé be wo.

¹³ Eyoñe te Môze a nga yalane Nti na: Bôte yʼEjipte be nga yeme na, ô nga vaa bôte ba e be be a ngu.

¹⁴ Be nga kañete de bôte ya Kanaan, be kik be yemeya na, wo Nti wo wulu bôte ya ayoñe dôé, a na wo yené e be be, ntebe zañe momo; ba yeme na, wo wo kamane be, amu wo wulu ôsu viap e nsume nkut a amôs, e nsume nduan a alu.

¹⁵ Nge wo mane jiane bôte bôé éyoñe jia, meyoñe bikule mese me nga wôʼôtan e mam mese ô nga bo ma ye jô na:

¹⁶ Nti a nji ke bo nguleya wulu e bôte ba a kui be e si a nga kaʼa be; amu ajô te nde a maneya wôé be e nkôte si.

¹⁷ Ajô te ma yeʼelane wo, a Nti, na ô kulu e ngule jôé. Boʼok avale ô nga tuʼa kate bia na:

¹⁸ Me ne Nti, nyô a yeme jibi a mvam abui, ma yeme jibi abé mevale meva, ma yeme fe jibi melo mevale meva. Ve me nji nyoñe môt a bili mekua ane nyô a nji bi étom; abé ya môt a bo melebe yʼété ma tôñ e mvoñe bôte jé a kui e miaé lale, nge miaé nyini.

¹⁹ Ajô te a Nti, amu ô ne avale mbamba fulu te, tame beta jamé abé ya bôte bôé, avale ô zuya wo jamé be, ataté éyoñ be nga kôlô Ejipte.

²⁰ Nde Nti a nga yalane nye na, me jaméya avale wo te sili.

²¹ Ve ane e ne bebela na me vee, a na, étôtoʼo jam ja yiane si nyô ése,

²² e bôte bese be nga yen étôtoʼo jam a mendem me nga bo Ejipte a e nkôte si, a mbe be bôbeleya ma biyoñ awôm, a be nji ke vôʼôlô tyiñe jam,

²³ bese ba ye bo teke yene si me nga kane bʼésaa ngana na ma ye ve be: ba bese be nga soñe ma ba ye bo teke yene je.

²⁴ A amu mbo ésaé wom Kaleb a nga bili avale nsisim afe, a amu a nga tuʼa tôñ e zene jam, ma ye bo na a nyiin e si a nga ke, a e mvoñe bôte jé ja ye nyoñe si éte.

²⁵ Bôte ya Amalék a e ba ya Kanaan be too e mbiʼili; a akiti ma ye bulane mvus a tôñe zene ya nkôte si e mfaʼa ya évele mañ.

Nti a yaa bôte ya ayoñe dé

²⁶ Ane Nti a nga beta jô Môze ba Aron na:

²⁷ Me wôʼôya ane bone bʼIsraél ba kobô ma abé menyiñ. Nté avé ba ye ke ôsu a bo nalé?

²⁸ Kele jôane be na: Ma, Nti a vee, ma kobô ne ngeññ na, ma ye bo mia avalʼane mejô me nga wôʼô mi kobôʼô me né:

²⁹ mia ye mane wu e nkôte si wu. E mia bese mi nga lañeban, mi too mimbu mewôm mebaé a a lôte valé, mia ye wu amu mia kobô ma abé menyiñ.

³⁰ Ma kane de ngana na, mia ye bo te nyiin e si me nga tiñeti mia na, mia ye tabe. Kaléb e mone Yefuné a Yasua e mone Nun étam mbe ba ye nyiin été.

³¹ Ve mfaʼa ya bone benan, ba mi nga jô be na ba ye bo jôme ya nsa e be besiñe benan, ma ye nyiñeli be e si mi nga biasé, a ba ye yeme je.

³² Ve mia, mia ye wu e nkôte si wu,

³³ ve bone benan ba ye baʼale mimbame miap tañe mimbu mewôm menyin. Ba ye beʼe e mam ma tôñ ékotekote jenan, akekui mia ye mane wu bese e nkôte si.

³⁴ Mi nga looé si melu mewôm menyin, ve mia ye tôbane minjuʼu ya abé denan tañe mimbu mewôm-menyin. Môs ôse wo ye veʼane ngume mbu. Eyoñe te mia ye yem jôm é ne na, me ne mia e ngame yat.

³⁵ E jame ma Nti ma kate mia, nde le. A ma kate mia bebela na, ma ye bo mia avale me jôya, mia, ayoñe bôt e ne adite ya beʼe a mi maneya tebe ma e ngame yat: ajô te mia ye mane wu e nkôte si môte wua teke liʼi.

³⁶ Ajô te ba bese Môze a nga lôme na be looé si, mbe bete a mebulan, be nga kobô nkobô ya biasé si éte a tindi fe bôte na be kobô Môze abé ,

³⁷ be nga mane wu; Nti a nga bibi be a ébubua, amu nkobô abé be nga kobô si éte.

³⁸ Yasua a Kaléb étam mbe be nga liʼi ézezañe ya bôte bete.

Bôte ba beta bo ébiasé

³⁹ Eyoñe te Môze a nga zu kate bone bʼIsraél mejô mese Nti a nga kobô. Nde be nga dañe yaa.

⁴⁰ Ajô te, e ndibe tyé, be nga ke e si minkô be jôʼô na: Bi ne mekua! Vʼéyoñe ji bi ne nkômesane ya ke e vôme Nti a nga jôô nye.

⁴¹ Môze a nga sili be na: Jé mia bo ji? Mia bo abendé Nti melo. Mi se nguleya yene mvaé!

⁴² Nti a nji bo mia ngam; ajô te te keane na besiñe benan be bôme mia.

⁴³ Bôte ya Amalék a ba ya Kanaan be ne wé, ôsu vienan; mia ye mane wôéban e mewosane zañ. Amu mi maneya kandane Nti, nde Nye fe aa ye ke bo e ngame jenan.

⁴⁴ Ve ayoʼo dab été, bone bʼIsraél be nga jeñe na be ke e si minkô. Ve Môze a nga liʼi e minkan, nalé fe éwolo é nʼétyi, ndeme ya élate Nti.

⁴⁵ Bôte ya Amalék a ba ya Kanaan be nga sis be soʼo minkô e vôm be nga too, nde be nga bôme bone bʼIsraél a titane be a kui Orma.