NLAÑANE BÔT 13 - Bible en langue Bulu

Belooé si ya Kanaan

¹ Nti a nga kobô Môze na:

² Lôme bôt be ke looé si ya Kanaan nje ma ve bone bʼIsraél. Mia ye lôme môte wua yʼayoñ ése, môt ase asu ayoñe beésa bé. Ba ye nyoñeban e betebʼôsu ya ayoñ Israél été.

³ Ane Môze a nga lôm be akôlô nkôte si ya Parañ, avale Nti a nga bendé; bôte bete bese be mbe bivete yʼIsraél.

⁴ Biyôlé biap mbie bi: e be bone be Ruben: Samua e mone Zakur;

⁵ e be bone be Siméoñ: Safat e mone Ori;

⁶ e be bone be Yuda: Kaléb e mone Yefuné;

⁷ e be bone be Isakar: Yigal e mone Yôsep;

⁸ e be bone bʼEfrayim: Oséa e mone Nun;

⁹ e be bone be Bényamin: Palti e mone Rafu;

¹⁰ e be bone be Zabuloñ: Gadiél e mone Sodi;

¹¹ e be bone be Yôsep: mvôʼô Manasé: Gadi e mone Susi;

¹² e be bone be Dañ: Amiél e mone Gemali,

¹³ e be bone be Azér: Setur e mone Mikaél;

¹⁴ e be bone be Néftali: Nabi e mone Wofsi;

¹⁵ e be bone be Gad: Géuél e mone Maki;

¹⁶ biyôlé bi bôte Môze a nga lôme na be ke looé si mbie le. Môze a nga yôlé Oséa e mone Nun jôé na: Yasua.

¹⁷ Ane Môze a nga lôme be be ke looé si ya Kanaan a jô na: Tyiʼan e zen ja lôte nkôte si ba loone négéb , éyoñe te mia ye bete nkô.

¹⁸ Mia ye yene si avale é né a avale bôt be too été, nge be ne mingungu nge mintetek, nge be ne tañe tyôtyoé ngʼabui;

¹⁹ avale si bôte bete be too é né, nge é ne mbamba nge mbia si; avale bitison be too bi né, meban nge alem;

²⁰ avale si é né, atek nge ayet, nge bilé bi ne été nge momo. Boʼon ayoʼo minleme ya zuu bibuma yʼété. Mbu ôte ô mbe wu bibuma mindik bia taté tôlôbô.

²¹ Be nga ke looé si ataté nkôte si ba loone sin a kui rehôb, anyiin Amat.

²² Be nga lôt e zene ya Négéb a kui Ebroñ e vôm Ahiman, Sékayi a Talmayi, bone be Anak, be nga too. A Ebroñ zoʼone Ejipte, Ebroñ nye a nga taté lôñeban mimbu zamgbwal ôsu.

²³ Be nga ke a kui mbiʼili Eskol vôm be nga tyiʼi ntyaé ndiʼi woon ésañeté bibuma é too été, be nga beʼe wô bebaé e mbôñ; be nga nyoñe fe bibuma bi grenad a bibuma bi fig.

²⁴ Be nga yôlé vôm ate na mbiʼili Eskol amu ésañeté bibuma bi ndiʼi woon bone bʼIsraél be nga tyiʼi vôm ate.

²⁵ Eyoñe melu mewôm menyin me lôteya, be nga bulane minkan.

²⁶ Eyoñ be nga kui minkan, be nga ke e be Môze, Aron, a bôte bese yʼIsraél. Vôm ate a mbe Kadés e nkôte si ya Parañ; nde be nga kate be foé a bôte bese yʼIsraél; be nga liti fe be bibuma ya si éte.

²⁷ Be nga kate Môze foé avale di: Bi nga kui foʼo e si ô nga lôme bia. Si éte é ne foʼo vôme menyañ a wôé bia len, bibuma yʼété mbie bi.

²⁸ Ve bôt be too été be ne biwôlô, bitison nlôñan alem a anen, bi nga yene fe bone bʼAnak.

²⁹ Bone bʼAmalék be too si ya Négéb; Behétieñ, Beyébuzieñ a Beamorééñ be too nkôle yôp, a Bekananééñ be too bebé mañ a e minsaʼa mi ôsôé Yordan.

³⁰ Nde Kaléb a nga tooé bôte bivô, amu be nga kobô Môze abé e menyiñ. Nde a nga jô na: Nkelan, a bia ye nyoñe si amu bia ye dañe je!

³¹ Ve bôte baa be be be nga ke be nga jô nye na: Bi se nguleya ke wosane bôte bete, amu ba dañe bia ngu.

³² Nalé be nga soo mbia foé ajô si be nga ke looé a kate je bone bʼIsraél be jôʼô na: E si bi maneya wulu a looé, é ne si ja min, e bôt be too été a e bôte bese bi nga yen été be ne meyabe me bôt.

³³ Bi nga yene minkpwese mi bôt, bone bʼAnak, mvoñe bôt é ne meyab abui. Bi yene biabebien vʼane bitandak, avale te fe bi nga yené e mise map.