NLAÑANE BÔT 12 - Bible en langue Bulu

Miriam a Aron ba kobô Môze menyiñ

¹ Miriam a Aron be nga kobô Môze abé , amu a nga luʼu ngone ya Kus;

² nde be nga jô na: Ye Nti a nga kobô ve Môze étam? Ye a nji fe kobô bia? Ane Nti a nga wôk ane ba kobô.

³ Môze a mbe étua évôvoé, a lôte bôte bese be nga too si.

⁴ Ane Nti a nga loone Môze, Aron a Miriam a jô be na: Mia belaa kuan atan a ke e nda éndelé. Nde be nga ke.

⁵ Ane Nti a nga sis nsume nkut été a tebe anyiine nda éndelé, a loon Aron ba Miriam. Nde bebaane be nga ke,

⁶ a Nti a nga jô be na: Vôʼôlaʼan e jam ma zu jô mia. Eyoñe môte wua ya be mia a ne nkulu mejô, ma Nti ma yené e be nye, a ma kobô nye a zene ya miñyenan a biyeyem.

⁷ Ve a nji bo nalé mfaʼa mbo ésaé wom Môze, nyô a nyoñe njuʼu ya bôte bame bese ane da yian.

⁸ Ma kobô nye ne ngeññ teke ntebe zañ; ma yené e be nye a a yen ane ma yené e be nye. Amu jé mi nji ko woñe ya ve Môze mbo ésaé wom bijô?

⁹ Ane Nti a nga bulan njalan a ayaa.

¹⁰ Eyoñe nsume nkut ô nga kôlô nda éndelé yôp, nyôle Miriam é nga yian a bifumulu mebat avalʼane sut. Mebate mete me mbe mebate me zam . Eyoñ Aron a nga fombô nye, a nga yene nye a ntoo nzezam.

¹¹ Nde a nga kobô Môze na: Bi ne njalan a mekua. Ve ma yeʼelane wo na te ve bia melep bia yiane me amu asuʼu dulu dangan.

¹² Miriam a boʼo te funane minkeñelé mi bon mia bialé mi too ñwuan a minsône miap mi too ndiʼan éfas éyoñ ba bialé.

¹³ Ane Môze a nga yeʼelane Nti a jô na: A Nti, ma yeʼelane wo na ô saé nye!

¹⁴ A Nti a nga yalane nye na: Nge ésaa a tui nye menden asu nga ôson ô nga ye bi nye tañe ngume sondô? Ajô te be kuliʼi nye e minkan atan tañe ngume sondô fe! E mvuse ya valé étam nje a ye bi nkañesane ya bulan été.

¹⁵ Eyoñe te be nga vaa Miriam e minkan tañe ngume sondô. Ve bone bʼIsraél be nji taté dulu te na Miriam a bulane nyiine minkan.

¹⁶ Eyoñe mam mete me maneya, Israél a nga kôlô Osérôt a ke vule minkan e nkôte si ya Parañ.