NLAÑANE BÔT 11 - Bible en langue Bulu

Nduane Nti

¹ Bôt be nga kobô e menyiñ a Nti a nga wôʼô mboone te abé . Eyoñ a wôʼôya jame te, ayaa dé e nga yôñ ane nduan. Nduan a nga lôm é nga mane diʼi éfase minkan.

² Nde bôt be nga yeʼelane Môze a beta miñyôn. Môze a nga yeʼelane Nti, a nduan é nga dim.

³ Ane be nga yôlé vôm ate na Tabéra, nalé a tinane na: Nduan ja diʼi, amu vôm ate Zambe a nga diʼi minkan.

Bôt ba kômbô di tit

⁴ Môs éziñ, beyeñ be mbe Israél été be soʼo mevôm mevôm, be nga jaé ne lut a nkômbane ya di tit; jaʼana bone bʼIsraél bebiene fe be nga beta taté nkobane menyiñ a jô na: Ngoʼé nge bi bili tite ya di!

⁵ Bia simesan e kos bi nga di zesé Ejipte, ngon, mebok, bitetam, anyon a laé.

⁶ Eyoñe ji ngule jangan é maneya. Jôme ya di é ntoo momo, vengevenge ve mana bia di môs ôse nyô.

⁷ Mana a mbe ane bone mefes, éfumulu é tôñe nyôle mfô.

⁸ Bôt be nga mialan asu ya kôane nye; be nga koʼo nye e mekoʼo bityé, nge tyaʼa nye bone mintuba. A mbe zam anyu ane biwôlé bi ne ñyaman a mbon.

⁹ Eyoñ mfô a ku a alu e minkan, éyoñe te fe mana a ku.

¹⁰ Môze a nga wôk ane bôt ba yôn, môt ase e vôme wé, anyiine nda éndelé. Eyoñe te ayaa Zambe e nga dañe yôñ a Môze a nga wôʼô jame te abé .

¹¹ Nde a nga jô Nti na: Amu jé wo bo ma avale te? Amu jé wo bene liti ma mvame jôé? Amu jé wo beté ma mbeʼe ya wulu e bôte bana bese e bituu?

¹² Sa ñhe ma me nga beʼe abume ya bôte bana nge biaé be, ve ô maneya bendé na me beʼe be e mo mam ane minga a nyaa nkeñelé mon, na me wulu be a kui be e si ô nga kaʼa bimvame biap.

¹³ Ma ye kooé tite ya di asu bôte bese ba yône ba a yemete na me ve be je vé?

¹⁴ Me se nguleya beʼe mbeʼe ya bôte bana bese étam. Mbeʼe te ô dañeya ma adit!

¹⁵ Nge nne wo kômbô bo ma nalé, jibiʼi wôé ma! Eyoñe te wo ye liti ma mvame jôé, a ma ye bo te bo ngaa ya bidime biame mamien.

¹⁶ Ane Nti a nga jô Môze na: Sulaʼane bôt mewômezamgbwa be soʼo e be bemvendé yʼIsraél ba wo yeme ma be ne foʼo bemvendé a be kobô mejô a zuu be e nda éndelé bendôbaʼane, vôm ate mia be be mia ye tebe tetele.

¹⁷ Ma ye sise valé a kobô wo; ma ye nyoñe ngab éziñe ya nsisim me nga ve wo a sôé wô e be be; éyoñe te ba ye bo nguleya volô beʼe wo mbeʼe ya bôte ba, a wo ye bo te beta bo ésaé te étam.

¹⁸ Wo ye jô bôte na: Tunane miabebien asu yʼakiti a mia ye di tit, amu mia mi nga yôn e melo me Nti me wôʼô na: Za a ye ve bia tite ya di? Amu bi mbe bi nyiñe mvaé Ejipte. Nti a ye ve mia tit a mia ye di je.

¹⁹ Mia ye bo te di je môse wua, mibaé, mitan, awôm nge mewôm mebaé,

²⁰ ve ngume ngon, akekui ja ye vame mia e mimbile mi môé a bo mia abume mintaé, amu mi nga biasé Nti a ne mia e zañ, a amu mi nga yône be nye a jô na: Amu jé bi nga kôlô Ejipte?

²¹ Môze a nga semé a jô na: Bôte ba bômane ma ba be ne toyini mintete misaman, éyoñe te wo kôme jô na wo zu ve be tite ya di tañe ngume ngon!

²² Toʼo bia wôé mintômba miañgan mise, bikela biangan bise a benyaʼa bangan bese, abime te da ye bo fe ve tyôtyoé!

²³ Ane Nti a nga yalane Môze na: Ye wo Nti wo ye bo étun? Wo ye yen éyoñe ji nge jam ma te jô wo da ye boban nge momo.

²⁴ Eyoñe te Môze a nga ke kate bôt mejô me Nti. Ane a nga sulane bôt mewôme zamgbwale ya bemvendé yʼIsraél a telé be mbômaʼan a nda éndelé bendôbaʼane.

²⁵ Nde Nti a nga sis e nsume nkut été a kobô Môze. Ane a nga nyoñe ngab éziñ ya nsisim ô mbe be nye a sôé wô e be bemvendé mewôme zamgbwa. Eyoñe nsisim ô nga sis e be be, be nga taté na ba kulu mejô, ve teke kee wô ôsu.

²⁶ Bôte bebaé môé na Eldad a Médad be nga liʼi e minkan, a nsisim ô nga sis e be be; be fe be mbe ntilan ve be nji ke e nda éndelé; be nga taté na ba kulu mejô e minkan.

²⁷ Ane ndôman éziñ é nga mate a ke kate Môze foé a jô na: Eldad a Médad ba kulu mejô e minkan.

²⁸ Nde Yasua e mone Nun, baʼa Môze aso mongô, a nga jô na: A Môze Tate wom, baméʼé be!

²⁹ Ve Môze a nga yalane na: Ye wo bo ma éviele? Ke ma dañe yene mvaé nge ayoñe bôte Nti ese e bili foʼo ve bekulu mejô, a ngoʼé nge Nti a ne sôé nsisim e be be!

³⁰ Ane Môze a nga ke e minkan baa be bemvendé yʼIsraél.

³¹ Nti a nga bo na évuñulu é vuñ; é nga soo abem mfaʼa ya mañ a zuu de minkan tañe nté dulu ngume môs mfaʼa ya li, nalé fe mfaʼa ya li, mbômaʼan a minkan, afip tañe menyiʼi me mo mebaé a kui si.

³² Ngume môs a ngum alu, a ngume môs ôvok ô nga tôñe valé, bôt be nga kôlô si a ke ba kôan abem. Môt a nga dañe kôane tyôtyoé a nga kôane tañe betoyini bekili. Be nga yané de mbômaʼane minkan;

³³ Tit é ngenane be mesôñ te nyalé je, nde ayaa Nti é nga yôñ e nyôle ayoñ ese, a Nti a nga wôé bôt a beta ébubua.

³⁴ Be nga yôlé vôm ate na: Kibrôt-Atava, nalé a ne na: Mesoñe ya nkômban, amu vôm ate be nga jame bôte ya ayoñ be nga dañe bili a nkômbane ya di tit.

³⁵ Akôlô ya Kibrôt-Atava, bone bʼIsraél be nga ke Azérôt, e vôm be nga vule minkane miap.