NKÔLAN 9 - Bible en langue Bulu

Ebubua ôkone betit e mimbam biyem

¹ Ane Nti a nga jô na: Kele e be Faraoñ a jô nye na: Avale di Nti, e Zamba Beébre a jô na: Suʼu e bôte bam be ke bo ma ésaé.

² Nge ô bo te suu be a nge wo beta bi be,

³ ô lôô ayaa Nti da ye zu e be mimbam biyeme miôé mi ne e mefup; bikabela, bijakas, bekamel, mimbam mi ne menen a mi mi ne tyôtyoé, mbia bim a ye suan e be mie.

⁴ Nti a ye ve nkandan e zañe mimbam ya Israél a mi ya Ejipte. Teke jôm éziñ ya biôm bise bôte ya Israél be bili ja ye jañ.

⁵ Nti a teléya éyoñ a jôʼô na: A akiti, Nti a ye bo ane a jôya e si ya Ejipte.

⁶ Tyé kpwaa, ane Nti e nga tôé njôane wé: ane mimbam mise ya Ejipte mi nga wu; ve teke wua ya mi bôte ya Israél ô nga wu.

⁷ Ane Faraoñ a nga lôme bôt be ke yemelan: Ô lôô teke toʼo ve éyeme jia ya mimbam mi Israél é nga wu. Ve nleme Faraoñ ô nga bo ntip, a nji ke suu bôt.

Beta môt

⁸ Ane Nti a nga jô Môze ba Aron na: Jalaʼane mo menan a ndub asub ôtita ya di, éyoñe te Môze a wua je e yôb asu Faraoñ.

⁹ Ja ye veñesane mbuluk e si ya Ejipte ése a ve fe mot a meton njalan a avin e si ése ya Ejipte: e be bôt a e be betit.

¹⁰ Ane be nga nyoñe ndub asub ôtita ya di a tebe asu Faraoñ; ane Môze a nga wua je yôp, ane é nga ve bôt a betit mot a meton njalan a avin e nyôl.

¹¹ Bebo mesimba be nji bo ngul ya beta tebe asu Môze amu mote mete: Amu mefôl me mot me mbe e nyôle bebo mesimba avale fe ane me mbe e be bôte bese ya Ejipte.

¹² Ane Nti a nga bo e nleme Faraoñ ntip, a nji vôʼôlô be avale ane Nti a nga kobô Môze.

Metaʼa

¹³ Ane Nti a nga jô Môze na: Kôlôʼô si ndibe tyé a ke e be Faraoñ a jô nye na: Avale di nde Nti, Zamba Beébre a jô na: Suʼu e bôte bam be ke bo ma ésaé.

¹⁴ Amu éyoñ ji ma zu lôme bibubua biam bise bi wosane womien, bebo bisaé bôé a e bôte bôé, ndemben wo ye yeme na jôm éziñ éfe é nji bo ane ma e si nyô ése.

¹⁵ Eyoñe ji nge me nga ye same wo wom a bibi wo a bim, ôkone betit, womien a bôte bôé, ô nga ye jañ e si nyô.

¹⁶ Ve me nga jôʼé wo ényiñ: Nalé ate me liti wo e ngule jam a na e jôé dam e katebane si ése.

¹⁷ Nge wo beta bo jôm ja kolé e bôte bam ôbak, a nge wo bo te suu be be ke,

¹⁸ avale awolo di a akiti, ma ye noo mveñ metaʼa é ne teke ajibi: Avale mveñe te e ngenan te tame noñ Ejipte ataté éyoñ Ejipte é nga téban a kui éyoñe ji.

¹⁹ Boʼo na, mimbame miôé a jôm ése é ne énjôé e mefub bi bi asoé ya buni, amu metaʼa ma ye ku bôt a betite yôp; ba ba ye yené e mefub a ba ba ye bo te tabe menda été, ba ye wu.

²⁰ E ba ya bebo bisaé be Faraoñ be nga ko njôane Nti woñ be nga jiʼa nyiñeli bebo bisaé bab a mimbame miab e menda été.

²¹ Ve ba be nga biasé nkobô Nti, be nga liʼi bebo bisaé bab a mimbame miab e mefup.

²² Ane Nti a nga jô Môze na: Same wo wôé yôb a metaʼa me kpwaʼak e si ése ya Ejipte yôp: Bôt, betit a éloʼo ése ya mefub e si ya Ejipte été.

²³ Ane Môze a nga same ntume wé yôp, e nde Nti a nga lôme zoʼoyañ a metaʼa, a nduan é nga sise si. Ane Nti a nga noo metaʼa e si ya Ejipte.

²⁴ Metaʼa me nga yené a nduan é nga bundan a me; metaʼa mete me mbe étua ngu avale e nji tame boban Ejipte ataté éyoñ Ejipte é nga bo ngume ayoñ.

²⁵ Ejipte ase été, metaʼa me nga wôé jôm ése é mbe e mefup, ataté bôt a kui betit; me nga wôé fe biloʼo bise ya mefub, a kpwé fe bilé bise ya mefup.

²⁶ Metaʼa me nga bo te ku ve Gôzen vôme bôte ya Israél be nga too.

²⁷ Ane Faraoñ a nga loone Môze ba Aron a jô be na: Éyoñe ji me boya abé . Nti nye a kabe, ve ma a e bôte bam bia ku.

²⁸ Ajô te yeʼelane Nti na zoʼoyañ a metaʼa bi man; ma ye suu mia mi ke a môt éziñ a ye bo te beta bi mia.

²⁹ Ane Môze a nga jô nye na: Éyoñ ma ye kôlô tison, ma ye same mo mam e yôp, zoʼoyañ ja ye tebe a metaʼa fe ma ye man, ndemben wo ye yeme na si é ne jôme Nti.

³⁰ Ve ma yeme na womien a bebo bisaé bôé, mi ngenan te ko Nti Zambe woñ.

³¹ Elé sut a fôn bi nga ndaman, amu valé fôn é mbili mebam a sute ke sam.

³² Ve nlisi a ne mefes anen a nyô a ne mefes tyôtyoé be nji ndaman amu be ne te jiʼa faa.

³³ Ane Môze a nga kôlô e be Faraoñ a tison; ve same mo e be Nti, nde zoʼoyañ a metaʼa bi nga man, a mveñ é nji fe noñe si.

³⁴ Eyoñ Faraoñ a nga yeme na mveñ, metaʼa a zoʼoyañ bi maneya, a nga ke ôsu a bo abé , a bo nleme wé ntip, émien a bebo bisaé bé.

³⁵ Ane nleme Faraoñ ô nga bo ntip, a nji suu bôte ya Israél be ke aval ane Nti a nga kobô a anyu Môze.