NKÔLAN 7 - Bible en langue Bulu

¹ Ane Nti a nga jô Môze na: Tame yen me boya wo ane zambe éziñ mfaʼa Faraoñ, a Aron, monyoñ, a ye bo nkulu mejô wôé.

² Wo ye jô mam mese ma ye bendé, a Aron, monyoñ, a ye baʼalane me e be Faraoñ, nalé a ye suu bôte ya Israél be kôlô si jé.

³ A ma ye bo e nleme Faraoñ ntip, a ma ye bo mendem a bitua bi mam biam Ejipte.

⁴ Faraoñ a ye bo teke wôʼô mia. Ma ye same wo wom Ejipte a ma ye bo na minsamba miam, e bôte bam, Israél, be kôlô Ejipte a ngule beta mintyiʼan mejô.

⁵ Bôte ya Ejipte ba ye yeme na me ne Nti éyoñ ma ye same wo wom Ejipte a vaa bôte ya Israél ézezañ jap.

⁶ Ane Môze ba Aron be nga bo ane Nti a nga bendé be: nalé be nga bo.

⁷ Môze a nga too mimbu mewôme muam a Aron mimbu mewôme muam a mila éyoñ be nga kobô Faraoñ.

⁸ Ane Nti a nga jô Môze ba Aron na

⁹ nge Faraoñ a kobô mia a jô mia na: Boʼone étua jam! Wo ye jô Aron na: Nyoñe ntum a wua wô ôsu Faraoñ a wo ye veñesane nyo.

¹⁰ Ane Môze a Aron be nga zu e be Faraoñ, nde be nga bo ane Nti a nga bendé be. Ane Aron a nga wua ntume ôsu Faraoñ a bebo bisaé bé: Ane ô nga veñesane nyo.

¹¹ Ane Faraoñ a nga loone beyeme mam, mingbwengbwee a bebo mesimba ya Ejipte: ane be fe be nga bo ane Môze ba Aron be nga bo, ve be belaʼane mezen me ne ndimba a ayaé ya yem e be bôte bese.

¹² Ane be nga wua mintume miab e si, mi ve veñesane benyo. Ve ntume Aron ô nga mane mine émiap.

¹³ Ve nleme Faraoñ ô nga bo ntip, teke vôʼôlô be avale Nti a nga jô.

Mendim ma veñesane metyi

¹⁴ Ane Nti a nga jô Môze na: Nleme Faraoñ ô ne ntip, a nji kômbô suu bôt;

¹⁵ kele e be Faraoñ mametyé amu ô lôô a ye kui a ke ôsôé; éyoñe te wo ye ke tôbane nye nsaʼa ôsôé ô bili fe ntum ô nga veñesane nyo e mo.

¹⁶ Eyoñe te ñhe wo ye jô nye na: Nti, e Zamba Beébre a lômeya ma e be wo a jôʼô na: Suu bôte bam be ke bo ma ésaé e fé été; ve wo, akui éyoñe ji, ô nji vôʼôlô ma.

¹⁷ Avale di nde Nti a jô na: E zene nyô nje wo ye yeme na me ne Nti, ô lôô ma ye bibi mendim ya ôsôé a ntum me bili mo, a ma ye veñesane metyi.

¹⁸ E kos é ne ôsôé ja ye wu, a ôsôé wo ye nyum abé , a bôte ya Ejipte ba ye bo te fe ngul ya nyu mendim ya ôsôé.

¹⁹ Ane Nti a nga jô Môze na: Jôʼô Aron na, nyoñe ntume wôé a same wo wôé e mendim ya Ejipte: Ataté atôñ mendime dap, e mimbale ya beta ôsôé wop, e bitam bi kose biab akui e mevale mendim mese yôp: mese ma ye veñesane metyi. Metyi ma ye yiane si ése ya Ejipte akui bilabaʼa bi ne mboon a bilé nge a mekok .

²⁰ Ane Môze ba Aron be nga bo ane Nti a nga bendé be. Aron a nga bete ntum a bibi mendim me mbe ôsôé e mise me Faraoñ a bebo bisaé bé; ane mendim ya ôsôé me nga veñesan metyi.

²¹ E kos é mbe e mendim ya ôsôé é nga wu, a ôsôé ôbien ô nga nyum abé , bôte ya Ejipte be nji bo ngul ya beta nyu mendim ya été, a metyi me nga yiane si ése ya Ejipte.

²² Ve bebo mesimba ya Ejipte be nga bo fe avale te, be belaʼan mezene mab me ne ndimba a ayaé ya yem e be bôt bese. Ane nleme Faraoñ ô nga bo ntip: a nji vôʼôlô be avale ane njôane Nti ô mbe.

²³ Ane Faraoñ a nga bulane e nda jé a bo teke nyoñe jame te ngap.

²⁴ Ane bôte bese ya Ejipte be nga faʼa menjeñ mendim ya nyu e mefôla ya beta ôsôé wop, amu be nji bo ngule ya beta nyu mendim ya beta ôsôé ate.

²⁵ Eyoñ Nti a maneya ndaman beta ôsôé ate, mingum mi môs mila mi nga beta lôt.

Minkongo

²⁶ Ane Nti a nga jô Môze na: Kele e be Faraoñ a jô nye na, suʼu e bôte bam be ke a bo ma ésaé.

²⁷ Nge ô bo te suu be, ma ye bo na minkongo mi yiane si jôé ése.

²⁸ E beta ôsôé wônan a ye jaé a minkongo, mia ye bet a nyiine e nda jôé, étune nda jôé wo bômbô a énoñe jôé, e nda bebo bisaé a e be bôte bôé, a mevôm ba yame belet a e beta befandé ba fuʼu avut.

²⁹ Minkongo mia ye bete wo nyô, e nyôle bôte bôé a e nyôle bebo bisaé bôé.