NKÔLAN 40 - Bible en langue Bulu

¹ Ane Nti a nga kobô Môze a jô nye na:

² Môs ôsu ya ngone ôsu, wo ye telé tabernakel , nda éndélé bisulan.

³ Wo ye futi éwolo élat été a buti je éyé.

⁴ Wo ye soo tebele a telé nye ane da yian. Wo ye zuu ébi bifufub a kôme belambe.

⁵ Wo ye telé ataʼa mvot asu ôlobinda ôsu éwolo ya élat, a wo ye futi éyé anyiine tabernakel .

⁶ Wo ye telé ataʼa mimvean mi ne ngumba ôsu ya anyiin tabernakel a nda éndélé bisulan.

⁷ Wo ye telé fandé zañe nda éndélé bisulan a atak, wo ye futi mendim été.

⁸ Wo ye bômane nseñ a vôme ase, a futi éyé mbé ya nseñ.

⁹ Wo ye nyoñe mbon ba woʼo bôt éyoñ ba telé be bito a woʼo wô e tabernakel a jôm ése é ne été, wo ye telé nye étyi émien a biôm mebelane bié bise a bia ye bo étyi.

¹⁰ Wo ye telé ataʼa mimvean mi ne ngumba mbon a biôme mebelan yʼété. Wo ye telé de étyi nalé da ye dañe dañ étyi.

¹¹ Wo ye woʼo fandé a tine ya été jé ése mbon a wo ye telé nye étyi.

¹² Wo ye bo na Aron a bone bé be subu bebé anyiin nda éndélé bisulan a wo ye woʼo be mendim.

¹³ Wo ye jalé Aron mengômesan me ne étyi, ô woʼo nye mbon a telé nye étyi, a a ye bo ma ésaé ane ntuni .

¹⁴ Wo ye bo na bone bé be subu bebé, ô jalé be melôʼô.

¹⁵ A wo ye woʼo be mbon avale ô maneya woʼo ésaa wop; a ba ye bo ma ésaé ane betuni. Nwoʼone mbone te wo ve be ésaé betuni miaé mise.

¹⁶ Ane Môze a nga bo mam mese Nti a nga bendé nye.

¹⁷ Ngon ôsu ya mbu baa é too alu da nje tabernakel a nga teléban.

¹⁸ E nde Môze a nga telé nye, a futi metin, yʼété, a telé mebam, a futi betyengane a telé beyôm mekôn.

¹⁹ Ane a nga ndamé éndélé e tabernakel yôp, a buti nda éndélé avale Nti a nga bendé nye.

²⁰ Wôna a nga nyoñe mekoʼo metiñ a futi me éwolo été, ve futi mimbôñ éwolo a buti ébutaʼa été yôp.

²¹ Akekui a nga soo éwolo e tabernakel été; a futi éyé ja kandé a solé éwolo élat avale Nti a nga bendé nye.

²² Ane a nga telé tebele nda éndélé bendôbaʼan e tabernakel akôé, ôyab a éyé ja kandé;

²³ E nde a nga taʼa belet (awôm a ébaé) ôsu be Nti, avale Nti émien a nga bendé nye.

²⁴ Ane a nga telé ébi bifufub e nda éndélé bendôbaʼane ôsu tebele, e tabernakel nké,

²⁵ a kôme belambe asu be Nti avale Nti émien a nga bendé nye.

²⁶ A nga telé ataʼa mvot e nda éndélé bendôbaʼan été, ôsu ya éyé ja kandé.

²⁷ Nde a nga bo na be diʼi ôlobinda a nyum mvaé été yôp, avale ane Nti a nga bendé Môze.

²⁸ Ane a nga tyelé éyé anyiine tabernakel .

²⁹ A telé ataʼa mimvean mi ne ngumba anyiine tabernakel ya nda éndélé bendôbaʼane, a ve mvean ba diʼi ngumba a ôfe avale Nti a nga bendé nye.

³⁰ A nga telé fandé e zañe nda éndélé bendôbaʼane a ataʼa metunaʼa a futi mendim ya sôbe mo a mebo été;

³¹ Aron a bone bé be nga sôbe mo a mebo été.

³² Eyoñ ése ba nyiin nda éndélé a subu bebé ataʼa metunaʼa, be nga sôbe mo a mebo avale Nti a nga bendé Môze.

³³ E nde a nga bo nseñ ô bômaʼane tabernakel ba ataʼa metunaʼa a tyelé éyé mbé ya nseñ. Nalé ate Môze a nga sondô ésaé ése.

Etôtoʼo Nti

³⁴ Ane nkut ô nga buti nda éndélé bendôbaʼane, a étôtoʼo Nti é nga jaé tabernakel .

³⁵ Môze a nji bo ngule ya nyiin nda éndélé bendôbaʼane, amu nkut ô mbe njalan été, a étôtoʼo Nti é nga yiane tabernakel .

³⁶ Eyoñ ése nkut wo mane kôlô tabernakel , bôt ya Israél be taté dulu a ke ôsu ya zene jap.

³⁷ A e môse, nkut Nti ô nji bete yôp, be nji téé dulu vʼakekui môse nkut wo beta bet.

³⁸ Amu nkute Nti ô nga yametane nda a amôs, a alu nduan é nga bômane je Israél ase a lôô, e mevôme mese be nga tebe.