NKÔLAN 34 - Bible en langue Bulu

¹ Ane Nti a nga jô Môze na: Baa bifas mekoʼo bibaé bi too ane bi ya ôsu: Wôna ma ye tili mejô me mbe bifas ô nga bôé e mimfefé bifas bite yôp.

² Tabeʼe nkôman ndip tyé; éyoñ tyé ja lendé, wo ye bete nkôle Sinayi; wo ye tebʼôsu viam, abôbône nkô.

³ Mia môte mfe te betan a môte mfe a boʼo te yené nkôle ôse; nalé fe na toʼo mone mbam nge beta mbam biyem éziñ, a boʼo te di mefôla ya nkôle te.

⁴ Ane Môze a nga ba bifas mekok ane bi ya ôsu. Môze a nga kôlô si ndib tyé a bete nkôle Sinayi avale Nti a nga bendé nye, ane a nga nyoñe bifase mekoʼo bibaé mo mé.

⁵ Nti ve sise nsum nkut été, a tebe fefele jé a yôtan jôé Nti.

⁶ Nti ve lôte ôsu vié a kele a yôtane na: Nti! Nti! Zambe a ko éngôngo a liti mvam , te jiʼa yaa, njalan a mboone mvaé a nyeʼan.

⁷ Nyô a baʼale mboone mvaé wé a kui miaé mi bôt toyini, nyô a jamé ékop, étom nge nsem, ve a ne jôʼé ve môt ane mekua melep , a a ve bon , bendaé a awuabañ melep amu bikobe bʼésaa!

⁸ Ane Môze a nga vitibi a kute meboñ si.

⁹ Ane a nga jô na: A Nti, me yeneya mvam be wo, ajô te Nti a wuluʼu ézezañe jangan, amu bi ne bôt be ne tyiñ ñyemelan; wo ye jamé ékop jangan a nseme wongan, a wo ye nyoñe bia ane ngabe jôé.

Elat a étyi

¹⁰ Nde Nti a nga jô na: O lôô mamien ma bo élat. Ma ye bo bitua bi mam bôte bôé bese be too, avale bitua bi mame te e ngenan te boban si nyô nge meyoñe mese été; bôte bese ô too été ba ye yene mboone Nti, mboon ya ko woñ bia wo bia ye bo.

¹¹ Baʼaleʼe mam mese me maneya bendé wo môse wu. Ma ye titane Be Amoréen, Bekananééñ, Behétieñ, Beférézieñ, Behévieñ a Beyébuzieñ ôsu viôé.

¹² Tabeʼe ntyel ya bo élat a bôte be too si wo ye nyiin amu nalé a za bo wo mbia ôlam.

¹³ Ve mia ye tyam metaʼa metunaʼa map, a bôé mekôn mekôô mab bitun bibaé a mekôn me Akéra map.

¹⁴ Wo ye bo te kute meboñ si asu Zambe mfe. Amu Nye a bili jôé na Abane, a ne Zambe a ne aban .

¹⁵ Te veʼele bo élat a bôte ya si wo ke amu be za loone wo ô nyoñe ngab bisulane biab ba kañe bengunemelan a di biôm ba tyik asu bengunemelan bete.

¹⁶ Nalé fe na ô za nyoñe bengone bap asu bobefame bôé, a éyoñe bengone bete ba ye bo mejian a bezambe bete, ba ye fe dutu bobefam benan na be bo fe mejian a be.

¹⁷ Te kômane bezambe a bizan be nga nyemé nduan.

¹⁸ Wo ye tuʼa baʼale abôʼô belet é ne te mvusan, tañe melu zamgbwa, ane e ne ntelan ngon fôn ja kui mebame na wo ye bo te di belet é ne te mvusan, avale me nga bendé wo, amu ngon fôn ja kui mebam nje ô nga kôlô Ejipte.

¹⁹ Ntôle ôse ô ne éñwom, avale fe ane nnôme éyem ase a taté bialé mimbam miôé, mone nyak a mone ntômba.

²⁰ Wo ye kôté mone éjakas a taté bialé a mone ntômba; nge wo bo te kôté nye wo ye buʼu nye tyiñ; wo ye fe kôté ntôle ya bobefame bôé; a môte éziñ a ye bo te tebe asu dam mo minsoé.

²¹ Wo ye saé môse misaman a semé sabat e môse zamgbwale; wo ye semé sabat toʼo éyoñ ya mbéan nge mvaane bidi mefup.

²² Wo ye jeme abôʼô besondô be mbômô ya fôn, nalé fe abôʼô nkôane bidi amane mbu.

²³ Mbu ôse biyoñ bilaa, befam bôé bese ba ye yene asu Nti, Zambe Israél.

²⁴ Ma ye titane meyoñ ôsu viôé a nene minné miôé; môt éziñ a ye bo te nyamete si jôé éyoñ wo bet a tebe asu Nti, Zambe wôé, mbu ôse biyoñ bilaa.

²⁵ Wo ye bo te kuli metyi ya tit wo tyiʼi ma a belet é ne mvusan; a mvean ba tyiʼi abôʼô Pak wo ye bo te lendane tyé.

²⁶ Wo ye zu ve bembômô bibuma bi ôsu ya si jôé e nda Nti, Zambe wôé. Wo ye bo te yame ékela e menyañ me nyia été.

²⁷ Nti a nga jô Môze na: Tiliʼi mejô mete; amu ma bo élat zañe jam, a énjôé a Israél avalʼane mejô mete ma jô amu mme me ne tin ya élat ma bo zañe bia wo a Israél.

²⁸ Nalé Môze a nga tabe valé tañe melu mewôm menyin a môse mewôm menyin baa Nti. A nji di belet nge nyu mendim. Ane Nti a nga tili awôm bifia ya élat e bifase mekoʼo yôp.

²⁹ Ane Môze a nga so nkôle Sinayi: A bili bifase mekoʼo bibaé ya metiñ ya élat mo, éyoñ a nga sis, a nji yeme na ékôp ya asu dé é nga faé amu nlaan a nga laane Nti,

³⁰ éyoñ Aron a Israél ase be nga fombô Môze be nga yene ékôp ya asu dé é faék; ane be nga ko woñ ya subu nye bebé.

³¹ Nde Môze a nga loone be; ane Aron a bivet bise ya nsamba be nga zu be nye nde ba be Môze be nga laan.

³² Eyoñ minlañ miab mi maneya, ane Israél ase a nga subu nye bebé, nde a nga kalane be mebendé mese Nti a nga ve nye nkôle Sinayi.

³³ Eyoñ Môze a nga mane kobô be ane a nga solé mvom asu jé a éyañese.

³⁴ Eyoñ a mbe a nyiʼin asu Nti na a kobô nye, a mbe a vaʼa éyañese akekui éyoñ a kui atan. Eyoñ a kuiya, a mbe a kateʼe bone bʼIsraél mebendé a te nyoñ.

³⁵ Israél a nga fombô asu Môze a yene na ékôp ya asu dé é mbe é faék; ajô te Môze a nga bo a betaʼa jaé éyañese akekui éyoñ a bulane ke kobô Nti.